Zacarías
Judá runakuna Tayta Dios munashqanno kawananpaq nishqan
13 “Tsay witsanmi pukyupita pashtamuq yakuwan maylaqno Davidpita miraqkunata y Jerusaléncho taq runakunata jutsankunapita perdonashaq”.*
2 Lapanta mandaq TAYTA DIOSMI kayno nin: “Tsay witsanmi intëru kay nacioncho ïdulukunata ushakätsishaq. Tsaymi qepa yuriqkuna tsay ïdulukunapa jutinkunatapis manami musyanqanatsu. Tsaynölami lula profëtakunatapis y lutanta yarpätsiq *supaykunatapis ushakätsishaq. 3 Noqapa jutïcho pipis lulakur wilakuptinqa kikinkunapa taytan y mamanmi kayno nipäkunqa: ‘¡Qamqa kikikipa yarpaynilaykipitami Tayta Diospa wilakuqnin kashqaykita niykanki! Tsayno nishqaykipitami wanunkipaq’. Tsayno nirmi lutanta wilakuykaqta kikinpa maman y taytan tuksipäkunqa.
4 “Tsay witsanmi lapan lula profëtakuna lulakur wilakushqanpita pasaypa penqakärinqa. Tsaymi profëta aylukushqan qaratsapita rurashqa mantunta imaypis aylukärinqanatsu ni profëta tukärinqanatsu. 5 Tsaypa trukanqa kaynömi nipäkunqa: ‘Noqaqa manami profëtatsu kä. Chakra runala karmi wamra kashqäpita patsa noqaqa chakralacho winashqä’. 6 Pipis ‘¿imanirtaq cuerpuyki kutsushqa kaykan?’* nir tapuptin kaynömi nipäkunqa: ‘Tsaytaqa amïgükunapa wayincho arurmi malograkushqä’ ”.
7 Lapanta mandaq TAYTA DIOS kaynömi nin:
“Espäda, uyshata mitsinanpaq churashqä amïgüpa contran rikakuy.
Uysha mitsiqta wanuykatsiptï uyshankuna wakpa kaypami aywakärinqa.*
Uysha malwakunatapis ushakätsishaqmi.
8 Tsaymi kay nacioncho taqkunaqa pulanpita mas wanupäkunqa.
Wakilannami kawapäkunqa.
9 Kawaykar quëdaqkunataqa jutsaynaq kananpaqmi purificatsishaq.
Qellayta ninawan fundiqno y qorita ninawan qanranta jorquqnömi paykunata purificashaq.*
Paykuna manakamaptinqa mayashaqmi.*
Tsaymi kayno nishaq: ‘Qamkunaqa kuyashqä wamräkunami karkaykanki’.
Paykunanami kayno nipäkamanqa: ‘Noqakunapa Diosnïqa QAMMI kanki’ ”.