Números
Israel nacionpa lindërunkuna maypa kananpaq tantiyatsishqan
34 Moiséstami TAYTA DIOS kayno nirqan: 2 “Israel runakunata kayno niy: ‘*Canaánman chayaptikiqa qamkunapaqmi tsay parti kanqa. Lindërunkuna kaynömi kanqa:
3 “ ‘Sur kaq läduman tinkuranqa Zin nishqan chunyaq jirkapita Edom nacionyaq. Inti jeqamunan kaq lädupitami lindërun qalaykunqa *Kachi Lamarpa ura lädun kuchunyaq. 4 Tsaypita sur kaq lädupa lindëru aywaranqa Acrabim cuestayaq. Zin partipa pasar chayanqa Cades-barnea nishqanyaq. Tsaypitana Hasar-adarpa pasar chayanqa Asmón partiyaq. 5 Asmónpa pasar chayanqa Egipto raqrayaq. Tsaypitana lindëru chayanqa Mediterráneo Lamaryaq.
6 “ ‘Inti jeqanan kaq lädupaqa lindëru kanqa Mediterráneo Lamar kuchunpa.
7 “ ‘Norti kaq lädupanami lindëru kanqa Mediterráneo Lamarpita Hor puntayaq. 8 Hor puntapitanami lindëru chayanqa Hamat partiman yaykunayaq y tsaypitana chayanqa Zedad partiyaq. 9 Zedad partipitana chayanqa Zifrón partiyaq. Nirkurnami norti kaq lindëru ushanqa Hazar-enán particho.
10 “ ‘Inti jeqamunan kaq lädupanami lindëru kanqa Hazar-enánpita qalaykur Sefam partiyaq. 11 Sefampa pasarnami chayanqa Ribla partiyaq. Riblaqa Aínpita inti jeqamunan kaq läduchömi kaykan. Tsaypitanami lindëru pasanqa Cineret qocha inti jeqamunan kaq lädupa. 12 Nirkur lindëru pasanqa Jordán mayupa Kachi Lamarman chayananyaq.
“ ‘Tsaynömi Israel runakuna tänanpaq kaykaq nacionpa lindërunkuna kanqa’ ”.
Chakrata aypunakushqan
13 Tsaypitami Israel mayinkunata Moisés kayno nirqan: “Tsay naciontami isqun trïbu runakuna y pulan Manasés trïbu runakuna chaskinanpaq TAYTA DIOS nimashqantsi. Tsaymi tsay nacioncho chakrakunata suertita jitaypa aypunakärinki.*
14 “Rubén trïbu runakuna, Gad trïbu runakuna y pulan Manasés trïbu runakuna chakrankunata maynami chaskishqa.* 15 Tsay chakrakunaqa kaykan Jericó y Jordán mayu tsimpan inti jeqamunan kaq lädupami”.
16 Moisésta TAYTA DIOS kayno nirqan: 17 “Chakrakunataqa cüra Eleazarwan Nunpa tsurin Josuémi aypupäkunqa. 18 Tsaynöpis cada trïbupa mandaqninta churanki aypüshinanpaq. 19 Tsay aypüshiqkunaqa kaykunami kanqa:
Judá trïbupita Jefonipa tsurin Caleb,
20 Simeón trïbupita Amiudpa tsurin Semuel,
21 Benjamín trïbupita Quislónpa tsurin Elidad,
22 Dan trïbupita Joglipa tsurin mandaq Buqui,
23 Josépa tsurin Manasés trïbupita Efodpa tsurin mandaq Haniel,
24 Efraín trïbupita Siftánpa tsurin mandaq Kemuel,
25 Zabulón trïbupita Parnacpa tsurin mandaq Elizafán,
26 Isacar trïbupita Azánpa tsurin mandaq Paltiel,
27 Aser trïbupita Selomipa tsurin mandaq Ahiud,
28 Neftalí trïbupita Amiudpa tsurin mandaq Pedael”.
29 Tsay mandaqkunatami TAYTA DIOS churarqan *Canaáncho Israel runakunata posisionta aypupäkunanpaq.