Ezequiel
Tiro markapaq wilakushqan
26 Babiloniaman prësu apapäkamashqan chunka juk wata qalaykunan junaqmi TAYTA DIOS kayno nimarqan: 2 “Runapa tsurin, Tiro marka runakunami* Jerusalénta ushakätsiptin kushipar kayno nishqa: ‘¡Benëchu ushakätsishqa! ¡Maytsay nación runakuna negociunkunawan chayanan marka kananqa ushakashqami kaykan! ¡Ushakätsishqa kaptinmi noqantsimanna suerti tikramushqa! ¡Kananqa noqantsinami paykunano rïcuyäshun!’
3 “Tsaymi noqa TAYTA DIOS kayno nï: Tiro marka, qampa contraykimi kaykä. Wayrämuptin lamar altuyaq pulchaqyar kuchunman chayaqtanömi juk lädu nación runakunata atacashunaykipaq apamushaq. 4 Tsaparäshuqniki murällaykikunatapis juchutsirmi ushakätsinqa. Rikachakunayki törrikikunatapis ushakätsinqami. Chipyaq pitsaypa alpatapis ushakätsirmi rumilatana kachaykushayki. 5 Kashqayki islapis red mashtakuna rumilanami rikakunqa”. TAYTA DIOSMI tsayno nin.
“Imaykaykitapis juk nación runakunami apakärinqa. 6 Lamar kuchuncho taksha markaykikunatapis espädawanmi ushakätsinqa. Tsayraqmi tsaycho taqkuna TAYTA DIOS kashqäta musyapäkunqa.
7 “Noqa TAYTA DIOSMI kayno nï: Qamta ushakätsishunaykipaqmi norti kaq lädupita Babilonia nacionpa mandaqnin rey Nabucodonosorta apamushaq. Payqa lapanpitapis mas munayniyuq rey karmi carrëtankunawan y cawallun muntashqa atska soldädunkunawan shamunqa. 8 Lamar kuchuncho taksha markaykikunata atacarmi tsaycho taq runakunata espädawan wanutsipäkunqa. Nirkurmi markaykiman yaykunanpaq perqa waqtankunapa törrikunata sharkatsipäkunqa, alpata qotupäkunqa y escüdunkunawanmi tsapakärinqa. 9 Markayki tsaparaq perqaykikunatapis mäquinawanmi juchutsipäkunqa. Rikachakunayki törrikunatapis talamarmi ushapäkunqa.
10 “Tsaynölami marka punkukunatapis talamar yaykapäkunqa. Atska cawallunkunawan shamuptinmi qoshtaynöraq polvu sharkur tsapäshunkipaq. Patatarraq cawallukuna shamushqan mayakaptin y jaqrararraq carrëtakuna shamushqan mayakaptinmi murällaykikunapis kuyunqa. 11 Intëru cällikikunatami cawallunkuna lutskar ushanqa. Qamcho taykaq runakunatami espädawan wanutsipäkunqa. Raku tushaykikunatapis tunitsirmi ushapäkunqa. 12 Lapan riquëzaykikunatapis qechushushpaykimi negociuykikunatapis apakärinqa. Perqa murällaykikunata juchurkatsirmi kuyaylapaq wayikikunatapis talamapäkunqa. Talamarkurmi rumikikunata y qeruykikunatapis lamarman jitapäkunqa.
13 “Tsaynöpami kushishqa cantashqaykita upälatsishayki. Arpaykikuna waqashqanpis manami mayakanqanatsu.* 14 Markaykita alpaynaq qaqatanölami kacharishaq. Red mashakunalamanmi tikraratsishaq. Mananami imaypis yapay sharkatsishunkinatsu. Noqa TAYTA DIOSMI tsayno nï”.
15 TAYTA DIOSMI Tiro markata kayno nin: “Bunrururraq wayikikuna juchushqanta mayar, däñakushkuna qaparashqanta mayar y runakunata wanutsipäkushqanta mayarmi lamar kuchuncho kaykaq nación runakunapis mantsakuywan siksikyanqa. 16 Tsay nacionkunapa mandaqnin reykunapis trönunpita sharkurmi cäpankunata y shumaq bordashqa röpankunatapis loqtirir lütutana jatikärinqa. Ushakashqaykita musyarmi fiyupa mantsakuywan pampacho siksikyar jamarpanqa. 17 Tsaymi ayata cantapashqan cantata cantapäshushpayki kayno nipäkunqa:
“ ‘Wakin markakunapitapis masmi *büquikikunawan lamar jananpa purishqanki.
Kananqa ¿imanöpataq ushakaykushqanki?
Pïmaypitapis reqishqa markami karqayki.
Qamcho taq runakuna munayniyuqmi karqan.
Nawpaykikunacho kaq nacionkunatapis lapantami mantsakätsirqayki.
18 Ushakashqaykita mayarmi lamar nawpancho kaykaq markakuna siksikyaykan.
Pasaypa elqashqana kaptikimi islacho taqkunapis fiyupa espantar mantsakashqa karkaykan’.*
19 “Tiro markatami TAYTA DIOS kayno nin:
Pipis manana tashqan markakunatano raqälatanami kachaykushayki.
Lamarpita atska yaku yarqamur apashunaykipaqmi kamakätsishaq.
20 Tsaynöpami unay wanuqkuna kaykashqanman jitarpushayki.
Patsa ruriman qarpuptïmi imaypis kankipaqnatsu.
Unay wanuqkunawanna kaptikimi marka kanaykipaq pipis mana sharkatsishunkipaqnatsu.
Qamcho manami pipis tanqanatsu.
21 Chipyaq ushakätsiptïmi kashqayki markapis fiyupa mantsakuypaq rikakunqa.
Ashishushpaykipis manami tarishunkinatsu”.*
TAYTA DIOSMI tsayno nin.