Apocalipsis
Salvashqa kaqkuna cantashqan
14 Tsaypitanami rikarqä *Sión jirkancho Carnish ichiraykaqta. Paypa nawpanchömi pachak chusku chunka chusku waranqa (144,000) runakuna kaykarqan. Paykunapa urkunchömi Carnishpa jutin y Carnishpa Taytanpa jutin qelqaraykarqan.* 2 Jana patsapitami mayakämurqan atska yaku raqrapa bunyaypa bunyar aywaqno y räyu bunruruqno. Tsay mayakämushqan karqan tsaytsika arpakunata tukamushqannömi. 3 Tsayqa karqan mushuq alabanzata cantapäkushqanmi. Tsayta cantapäkurqan Tayta Diospa trönun nawpancho, chusku kawaykaqkunapa nawpancho y tsaycho kaq ishkay chunka chusku (24) mayor runakunapa nawpanchömi.
Wakin runakunaqa manami tsay alabanzata yachakuyta kamäpakurqantsu. Tsaypa trukanqa tsay pachak chusku chunka chusku waranqa (144,000) salvashqa runakunalami yacharqan. 4 Paykunaqa warmiwan mana kakuq runakuna karmi virgen jipashno *püru karkaykan.* Imano nakarpis Carnish munashqannömi kawapäkurqan. Paykunata salvarqan Tayta Diospaq y Carnishpaq *primiciano kananpaqmi.* 5 Imaypis mana lulakur jutsaynaqmi karkaykan.* *
Kimsa angilkuna wilakushqan
6 Tsaypitanami rikarqä juk *ángel altupa päriykaqta. Paymi mana ushakaq ali wilakuyta apamurqan. Tsay wilakuy kaykan maytsay nación runakunapaq, maytsay trïbu runakunapaq, ima idiömata rimaqkunapaq y maytsaycho taq runakunapaqmi. 7 Tsay angilmi qayakuypa kayno nimurqan: “¡Tayta Diosta *mantsakur payta alabapäkuy! ¡Höra chayamushqanami lapan runakunata juzgananpaq! ¡Jana patsata, kay patsata, lamarta y pashtaq yakukunatapis kamaq Tayta Diosta adorapäkuy!”
8 Tsay angilpa qepanta juk angilpis aywarmi kayno nirqan: “¡Ushakashqanami, ushakashqanami jatunkaray Babilonia marka!* ¡Babiloniami vïnuwan shinkatsiqnöpis lapan nación runakunata mana ali costumbrinkunata yachatsirqan!”
9 Tsay angilpa qepantanami mas juk angilpis aywar qayakuypa kayno nirqan: “Mayqanpis *anticristuta y ïdulunta adorar señalninta urkunman o makinman churatsikuq kaqkunataqa 10 cöpa junta winaraykaq rabyaynintami Tayta Dios mana kuyapaypa uputsinqa.* Carnish y *santu angilninkunapis rikaykaptinmi tsay runakunaqa azufriwan talushqa nina rataykaqcho rupar nakapäkunqa.* 11 Paqasta junaqta mana upiypa rupaptinmi imaypis qoshtay sharkunqa.* Tsaynölami anticristuta y ïdulunta adorar señalninta churatsikuqkunaqa paqasta junaqta nakapäkunqa”.
12 Tsay ángel nishqanno kananpaq kaykaptinqa Jesucristuman yärakuqkuna Tayta Diospa mandamientunkunata cäsukur mana ajayaypa payman yärakäritsun.
13 Tsaypitanami mayarqä jana patsapita kayno nimuqta: “Kay nishqäta qelqay: ‘Kananpitaqa Jesucristuman yärakuykar wanuqkuna kushishqami kapäkunqa’ ”.
Espíritu Santupis kaynömi nirqan: “¡Paykunaqa mananami nakanqanatsu, sinöqa jawkanami kawakärinqa! Payman yärakur alilata rurashqankunata Tayta Dios manami qonqanqatsu”.
Juiciu final kananpaq wilakushqan
14 Rikärishqächömi rikarqä yoraq pukutay janancho runapa tsurin niraq jamaraykaqta.* Paymi kaykarqan qori coronashqa y mikuq ösin aptashqa. 15 Tsaypitanami jana patsacho kaykaq templupita juk *ángel yarqarkamur pukutay janancho jamaraykaqta qayakuypa kayno nirqan: “¡Cosëcha poquraykannami! ¡Cosechanaykipaq tiempu chayamushqanami! ¡Ösikita aptakurkur cosechamunaykipaq ayway!”*
16 Tsayno niptinmi pukutay janancho jamaraykashqanpita shamur ösinta aptakurkur kay patsacho runakunata shuntamurqan.
17 Tsaypitanami mas juk ángel jana patsacho kaykaq templupita ali mikuq ösin aptashqa yarqamurqan. 18 *Altarcho kaykashqanpitanami yapay mas juk angilpis yarqamurqan. Paymi altarcho nina kawatsiq karqan. Tsay angilmi ösin aptashqa kaq angilta qayakur kayno nirqan: “¡Üva poquraykannami! ¡Ösikiwan lapanta shuntamuy!”
19 Tsayno niptinmi tsay ángel ösinwan kay patsacho üvata shuntarqan.* Shuntarkurnami üvata jarukunan jatunkaray pözuman winarqan. Tsay pözuqa Tayta Diospa rabyayninmi kaykan. 20 Markapita juk läduman jorquykurmi üvata jaruqno runakunata wanutsirqan.* Runakunapa yawarninmi cawallupa shiminman töpanan altu soqta chunka (60) lëwayaq aywarqan.