Números
Baal-peor diosta Israel runakuna adorashqan
25 Sitimcho taykarmi Israel runakuna moabita warmikunawan kakurqan. 2 Tsaynöpis tsay warmikunaqa Israel runakunata pusharqan sacrificiukunata rurar diosninkunata adorapäkunanpaq. Tsayno pushaptinmi Israel runakunapis moabita runakunapa diosninkunata adorapäkurqan. Nirkurmi diosninkunapaq churashqan mikuytapis mikupäkurqan. 3 *Baal-peor diosta* tsayno adorapäkuptinmi TAYTA DIOS pasaypa rabyakurqan. 4 Tsaymi Moisésta kayno nirqan: “Israel runakunapa mandaqninkunata prësu tsarirkur lapan runakuna rikaykaptin nawpächo wanutsiy. Tsaynöparaqmi rabyaynï pasanqa”.
5 Tsaymi Israel runakunapa juezninkunata Moisés kayno nirqan: “Trïbuykikunapita mayqan runatapis Baal-peor diosta adoraq aywaqtaqa wanutsipäkuy”.
6 Tsayno niptinmi lapan Israel runakuna Tinkuna Toldu patiucho waqarkaykarqan. Tsay hörami Moisés y wakin runakunapis rikaykaptin juk Israel runa mana penqakuypa madianita warmita toldunman yaykatsirqan. 7 Tsayta rikarmi cüra Aarónpa wilkan y Eleazarpa tsurin Finees pasaypa rabyakurqan. Tsaymi juntaraykashqanpita lanzanta aptakurkur 8 aywarqan madianita warmita pushaykashqanpa qepanta toldun ruriyaq. Yaykurirmi jananakushqa kaykaqta pachanpa tuksiriykurqan. Tsayraqmi fiyu qeshyawan Israel runakuna wanuykashqanpita chawarqan. 9 Tsay fiyu qeshyawanmi ishkay chunka chusku waranqa (24,000) runakuna wanurqan.
10 Tsawraqa Moisésta TAYTA DIOS kayno nirqan: 11 “Cüra Aarónpa wilkan y Eleazarpa tsurin Fineesmi pasaypa rabyashqa kaykaqta qasätsimashqa. Paypis noqanömi pipis jutsata ruraptinqa pasaypa rabyan. Jutsayuqta wanutsishqanpitami Israel runakunata ushaqpaq mana wanutsishqätsu. 12 Kanan Fineesta wilay paywan *pactu rurashqäta. 13 Pactuta rurarmi kikinta y paypita miraqkunata imayyaqpis cüra kananpaq churä. Noqata respitamar tsay jutsayuq runata wanutsishqanpitami Israel runakunapa jutsankunata perdonashqä”.*
14 Wanutsishqan Israel runapa jutinmi karqan Zimri. Payqa karqan Salupa tsurin y Simeón trïbupa mandaqninmi. 15 Wanutsishqan madianita warmipa jutinnami karqan Cozbi. Paymi karqan Zurpa tsurin. Zurnami karqan madianita runakunapa juk mandaqnin.
16 Tsaypitami Moisésta TAYTA DIOS kayno nirqan: 17 “Yaykuykur lapan madianita runakunata wanutsipäkuy. 18 Paykunami Israel runakunata yachaylapa shakyätsishqa Baal-peor diosninta adorapäkunanpaq. Tsaynöpis madianita runakunapa mandaqninpa tsurin Cozbi mana penqakuypami lapanpa nawpancho Zimripa toldunman yaykushqa paywan kakunanpaq. Tsay warmitami wanutsishqa Israel runakunata fiyu qeshyawan wanuykätsishqä höra”.