Amós
Revelacioncho chukluskunata Amós rikashqan
7 Reypa cosëchanta shuntayta usharkur kikinkunapa cosëchanta runakuna manaraq shuntayta qalaykuptinmi TAYTA DIOS revelamar rikatsimarqan tsaytsika chukluskunata kay patsaman juntaqpaq kachamunanpaq kashqanta.* 2 Tsay chukluskuna lapan qewakunata mikur ushaykaqta rikatsimaptinmi kayno ruwakurqä: “TAYTA DIOS, noqakunata perdonaykalämay. Mana perdonamaptikiqa Jacobpita miraqkuna walka kaqlanpis lapanïchari ushakäshaq”.
3 Tsawraqa TAYTA DIOS kuyapämashpan kayno nimarqan: “Ruwakamaptikiqa chukluskunata manami kachamushaqtsu”.
Revelacioncho ninata Amós rikashqan
4 Tsaypitanami TAYTA DIOS revelacioncho rikatsimarqan Israel nacionta ninawan castigashqanta. Tsay ninaqa patsa rurinpita pashtamuq yakuta tsakitsirmi intëru Israel nacionta usharqan.*
5 Tsawraqa kayno ruwakurqä: “TAYTA DIOS, ama tsayno ushakaykatsilämaytsu. Noqakunata mana perdonamaptikiqa Jacobpita miraqkuna walka kaqlanpis lapanïchari ushakäshaq”.
6 Tsawraqa TAYTA DIOS kuyapämashpan kayno nimarqan: “Ruwakamashqaykipita manami tsaytapis rurashaqtsu”.
Revelacioncho plomädata Amós rikashqan
7 Tsaypitanami revelacioncho Tayta Diosta rikarqä perqa murälla nawpancho plomädan aptashqa ichiraykaqta. 8 Tsaymi tapumarqan kayno nir: “Amós, ¿imatataq rikaykanki?”
Niptinmi kayno nirqä: “Albañilpa plomädan aptashqa runa ichiraykaqtami rikaykä, Tayta”.
Tsawraqa kayno nimarqan: “Plomädawan murälla derëchu kashqanta o wiksu kashqanta musyashqannömi Israel runakuna imano kawashqantapis musyashaq. Jutsata rurar kawashqanpita manami perdonashaqnatsu.
9 “Isaacpita miraqkuna* ruratsishqan *altarkunatami ushakätsishaq.
Israel nacioncho lapan capillakunatapis juchutsishaqmi.
Espädäta aptakurkurmi aywashaq rey Jeroboampita miraqkunata ushakätsinäpaq”.
Cüra Amasías profëta Amóspa contran sharkushqan
10 Amós tsayno wilakuptinmi Bet-elcho kaq cüra Amasías Israel runakunapa mandaqnin rey Jeroboamta wilakatsirqan kayno nir: “Qampa contrayki rimarmi Amós puriykan. Israel runakuna pay nishqanta cäsupaptinqa nacionnintsi ushakanqapaqmi. 11 Payqa puriykan kayno nirmi: ‘Jeroboamqa espädawan wanutsishqami kanqa. Tsaynöpis Israel runakunataqa juk nacionmanmi prësu apakärinqa’ ”.
12 Tsaypitanami Amósta cüra Amasías kayno nirqan: “¡Profëta, kaypita jukla aywakuy! Wilakushqaykipita gänapakuyta munarqa Judá nacionman kutiykur tsaycho wilakuy. 13 Kay Bet-elcho Israel nacionpa templun kaptinmi Diosta adorananpaq reypis shamun. Tsayno kaykaptinqa kaycho ama wilakuytsu”.
14 Tsayno niptin Amós kayno nirqan: “Noqa manami profëtatsu ni profëtapa tsurintsu kä, sinöqa uyshakunata mitsikur y munti hïguskunata shuntalarmi kawä. 15 Uyshakunata mitsikur puriykaptïmi TAYTA DIOS kayno nimarqan: ‘Israel runakunaman ayway wilakuynïta wilapänaykipaq’. 16 Kanan shumaq mayamay TAYTA DIOS qampaq nishqanta.
“Qamqa kaynömi niykanki: ‘Ama wilakuytsu Israel runakunapa contran.
Isaacpita miraqkunapaq imatapis ama rimakuytsu’.
17 “Tsaymi TAYTA DIOS kayno nin:
‘Qampa warmikimi kay markacho *wayrapakuq warmi rikakunqa.
Warmi tsurikikunata y olqu tsurikikunatami espädawan wanutsipäkunqa.
Chakraykikunatapis suertita jitaypami rakipänakunqa.
Kikikinami wanunkipaq Diosta mana cäsukuqkuna tashqan nacioncho.
Israel mayikikunatami karu nacionman prësu apakärinqapaq’ ”.