Oseas
Ïdulukunata adorashqanpita castigananpaq nishqan
8 “¡Marka täpaq runakuna, *cornëtata tukapäkuy!
¡Kuyashqä runakunata atacananpaq contran runakuna ankanömi aywarkaykämun!
*Pactu rurashqäta y leynïkunata mana cumplishqanpitami Israel runakunataqa castigashaq.
2 Israel runakunaqa kayno nirmi manakarkaykäman:
‘¡Yanapaykalämay, Tayta!
¡Qammi kanki Tayta Diosnï!
¡Noqakunaqa kuyashqayki Israel runakunami karkaykä!’
3 Tsayno manakamarpis ali kawapäkunanpaq nishqäta manami chaskikärishqatsu.
Tsaymi castigaptï chikiqninkuna atacar qatikachanqapaq.
4 Paykunaqa mana tapukamaylapami mandaqnin reykunata churapäkushqa.
Mana manakamaylapami autoridäninkunatapis churapäkushqa.
Qellaypita y qoripitami ïdulukunatapis rurapäkushqa.
Tsayno rurashqanpitami ushakanqapaq.
5 “Samaria runakuna, qoripita rurashqayki turituta adorapäkuptiki pasaypami melanä.*
Tsayno rurapäkushqaykipita fiyupa rabyashqami kaykä.
¡Imayyaqraq penqakuypaq jutsasapa kapäkunkipaq!
6 ¡Israel runakuna, wiyakäriy!
Tsay adorashqayki turituqa manami Diostsu, sinöqa runa rurashqalami kaykan.
Tsaymi pasaypa talamar ushakätsishaqpaq.
7 “Israel runakunaqa wayrata muruqno karmi shukukuy wayralatami cosechanqapaq.* *
Murushqankunapis mana wayuptinmi aqatsikunanpaqpis mana kanqatsu.
Ichiklata cosechashqantapis jäpa runakunami mikupäkunqapaq.
8 ¡Israel nación ushakanqapaqmi!
Juk lädu nación runakunaqa mana sirviq puyñutanömi rikapäkunqa.
9 Israel runakunaqa chucaru bürruno karmi Asiria nación runakunaman aywarkaykan.
Paykunaqa waynäkuq warminömi karkaykan.
10 Asiria nacionta y wakin nacionkunata tsayno pägaptinpis tsay nacionkunatami shuntashaq atacananpaq.
Munayniyuq reypa munaynincho karmi juk tiempuyaq nakapäkunqa.
11 “Efraín runakunaqa atska *altarkunatami rurapäkushqa tsaycho perdonta manakamänanpaq.
Manakamänanpaq ruraykarpis tsay altarkuna kaqcho ïdulukunata adorarmi jutsata mas rurarkaykan.
12 Paykunapaq atska leykunata qelqatsishqa kaptïpis manami cäsukärintsu.
13 Sacrificiukunata altarcho rupatsirmi aytsata kushishqa mikurkaykan.
Tsayno ruraptinpis tsay sacrificiukunaqa manami shonqü munashqannötsu kaykan.
Jutsa rurashqankunataqa manami imaypis qonqashaqtsu.
Perdonanäpa trukan castigaptïmi Egiptuman kutipäkunqapaq.*
14 Kamaqnin Tayta Dios kaykaptïpis Israel runakunaqa manami yärakamantsu.
Yärakamänanpa trukanqa amparakunanpaq palaciukunatami sharkaykätsin.
Judá runakunapis ali murallashqa markankunamanmi yärakurkaykan.
Nina rupar ushashqannömi murallashqa markankunata y ali sharkatsishqan palaciunkunatapis ushakätsishaq”.*