2 Crónicas
Judá nacioncho Josías rey kashqan
34 Josías* pusaq watayuq kaykarmi rey kayta qalaykurqan. Payqa kimsa chunka juk (31) watami Jerusalénpita mandarqan. 2 Josíasqa unay aylun Davidnömi TAYTA DIOS munashqanno imaypis kawarqan.
3 Yaykushqanpita pusaq watana rey kaykarmi mözularaq karpis Josíasqa unay aylun David yärakushqan Tayta Diosta *ashiyta qalaykurqan. Chunka ishkay watana rey kaykarmi Jerusalénta y Judá nacioncho kaykaq wakin markakunatapis purificayta qalaykurqan. Purificarmi markakunacho kaykaq *altarkunata, *Asera diösapaq jawishqan raku qerukunata, laqlaypa y fundiypa rurashqa ïdulukunatapis ushakätsirqan. 4 Ichiparaykaptilanmi *Baalpaq* ruratsishqan altarninkunatapis chipyaq juchutsipäkurqan. Tsaynöpis mandarqan inciensu qoshtatsikunan altarkunata juchutsipäkunanpaq, *Asera diösapaq jawishqan raku qerukunata pedäzu pedäzu pakipäkunanpaq y laqlaypa y fundiypa rurashqa ïdulukunata ushakätsinanpaq. Pakishqankunata aqulurkurmi tsay ïdulukunata adoraqkuna pamparaykashqan jananman shikapäkurqan. 5 Altarkunata manaraq ushakätsirmi ïdulukunata adoraq cürakunapa tulunkunatapis pamparaykaqta jorqarkamur tsay altarkuna janancho rupatsirqan.* Tsaynöpami Judá nacionta y Jerusalénta purificarqan.
6 Tsaynölami Josías purificarqan Manasés particho kaykaq markakunata, Efraín particho kaykaq markakunata, Simeón particho kaykaq markakunata y Neftalí particho kaykaq markakunatapis. Tsay markakunata purificarmi nawpankunacho kaykaq markakunatapis purificarqan. 7 Tsaynöpami Israel nacioncho kaykaq lapan altarkunata, Asera diösapaq jawishqan raku qerukunata y wakin ïdulukunatapis aqulur usharqan. Inciensuwan qoshtatsinanpaq kaykaq altarkunatapis lapantami juchutsir usharqan. Lapanta purificarkurnami Jerusalénman kutikurqan.
Leykuna qelqarashqan libruta tarishqan
8 Judá nacionta y templuta purificayta usharkurmi rey Josías runakunata kacharqan TAYTA DIOSPA templunta altsatsinanpaq. Tsayno kacharqan chunka pusaq watana rey kaykarmi. Kachashqan runakunami karqan Azalíapa tsurin Safán, markapa gobernadornin Maasías y Joacazpa tsurin Joa. 9 Paykuna aywarmi mandaq cüra Hilcíasta entregarqan TAYTA DIOSPA templunpita apashqan qellayta. Tsay qellaytaqa templuman shamuq runakunapitami punku täpaq *levitakuna shuntarqan. Tsay runakuna tarqan Manasés particho, Efraín particho, Judá particho, Benjamín particho y Jerusaléncho.
10 Tsay qellaytami entregarqan TAYTA DIOSPA templunta altsatsinanpaq encargädu runakunata. Paykunanami templu altsaqkunata pägapäkurqan. 11 Tsaynöpis qellayta kamariparqan carpintërukunata y albañilkunata. Tsay qellaywanmi carpintërukuna qeruta rantirqan vïgakunapaq y tijiralkunapaq. Albañilkunanami laqlashqa rumikunata rantirqan. Tsaykunata rantipäkurqan Judá nacionpa mandaqnin reykuna mana cäsuptin templu malograkashqanta altsatsinanpaqmi. 12 Tsay encargädu runakunaqa chaskishqan qellayta mana yatapakuypami aruqkunata pägarqan.
Encargädu runakunapa mandaqninkunami karqan Jahat, Abdías, Zacarías y Mesulam. Tsay mandaqkuna lapanpis karqan levitakunami. Jahat y Abdías karqan Merari aylumi. Zacarías y Mesulamnami karqan Coat aylu. Lapan tsay levitakunaqa müsicumi karqan. 13 Wakinmi encargädu karqan ashtaqkunata y tsaycho aruq runakunata rikananpaq. Wakinnami karqan secretariu, wakinmi karqan capataz y wakinnami karqan templu punku täpaq.
14 Shuntashqan qellayta TAYTA DIOSPA templunpita jorquykashqanchömi cüra Hilcías tarirqan Moisés chaskishqan mandamientukuna qelqaraykashqan libruta. 15 Tariykurmi secretariu Safánta kayno nirqan: “TAYTA DIOSPA templunchömi leyninkuna qelqaraykashqan libruta tarishqä”.
Tsayno wilarkurmi aptaparqan. 16 Libruta apakurkurmi Safánqa rey kaqman aywarqan. Chayaykurmi imano aruykashqantapis wilapar kayno nirqan: “Tayta rey, arunanpaq mandashqaykinölami lapan arurkaykan. 17 TAYTA DIOSPA templunman apapäkushqan qellaytami encargädu runakunata qoykushqa templuta altsatsinanpaq”.
18 Nirkurmi kayno nirqan: “Templucho tarishqan librutami cüra Hilcías entregamashqa”.
Wilarkurmi Safánqa reyta liyiparqan. 19 Tsay librucho qelqaraykaq leykunata liyipaptinmi reyqa fiyupa lakikushpan röpanta rachirqan. 20 Tsaymi Hilcíasta, Safánpa tsurin Ahicamta, Micaíapa tsurin Abdónta, secretariu Safánta y yätsiqnin Asaíasta qayaykur kayno nirqan: 21 “Kay librucho TAYTA DIOS nishqanta manami noqantsipis ni unay ayluntsikunapis cäsukushqantsitsu. Tsayno mana cumplishqantsipita TAYTA DIOSQA pasaypa rabyashqachari kaykan. TAYTA DIOSTA tapuykalämuy noqapaq, Israel nacioncho quëdaq runakunapaq y kay nacionnintsicho kaq runakunapaqpis”.
22 Tsawraqa rey kachashqan runakunawan Hilcías aywarqan Salumpa warmin profetïsa Huldaman tapukuq. Huldapa runan Salum karqan Ticvapa tsurin y Harhaspa wilkanmi. Tsaynöpis Salum karqan templucho röpakunata täpaqmi. Huldaqa runanwan tarqan Jerusalén kuchun mushuq barriuchömi.
23 Tapukuptinmi Hulda kayno nirqan: “Israel runakunata kuyaq TAYTA DIOS kaynömi nin: ‘Kachamushuqniki runaman kutiykur kay nishqäkunata wilanki: 24 Liyipäshushqayki librucho nishqänölami kay markacho taqkunata y kay markatapis ushakätsishaq. 25 Paykunaqa mana cäsukamarmi juk dioskunapaq sacrificiukunata ruparkaykätsin. Tsaymi pasaypa rabyar mana kuyapaypa castigashaq’ ”.
26 Tsaypita mastami Hulda kayno nirqan: “TAYTA DIOSTA tapunäpaq kachamushuqniki reyman kutiykur kayno nir wilanki: ‘Tsay librucho qelqaraykaqta cäsukushqaykipitami Israel runakunata kuyaq TAYTA DIOS kayno nin: 27 “Kay marka y kay markacho taqkuna asulashqa kananpaq kashqanta mayar lakikushqaykita y mantsakashqaykita rikashqämi. Tsaynöpis rikashqämi röpaykita rachir waqashqaykita. 28 Tsaymi kawashqaykiyaqqa kaycho taq runakunata mana castigashaqtsu. Wanuptiki unay ayluykikuna pamparashqanmanmi pampashunkipaq” ’ ”.
Profetïsa Hulda tsayno nishqantami kachashqan runakuna kutiykur reyta wilapäkurqan. 29 Tsayno wilaptinmi rey Josíasqa Jerusaléncho y Judácho taq mayor runakunata qayatsirqan. 30 Tsaymi Jerusaléncho y Judá nación wakin markakunacho taq runakuna, cürakuna, levitakuna y wakin runakunapis wamrapita qalaykur hasta awkinyaq TAYTA DIOSPA templunman juntakarqan. Reypis chayaykurmi templucho tarishqan *Pactu Libruta lapan runakuna mayapäkunanpaq liyiparqan.
31 Liyiparkurnami rey ichiräkunan columna kaqman ichiykur TAYTA DIOSPA nawpancho rey Josías *pactuta rurar promitirqan librucho qelqaraykaq pactuta cumplir mandamientunkunata, yätsishqankunata y leyninkunata lapan shonqunwan imaypis cumplinanpaq. 32 Tsaynölami Jerusaléncho taq runakunata y tsaycho kaykaq Benjamín trïbu runakunata nirqan unay aylunkuna yärakushqan Tayta Dioswan pactu rurashqanta cumplipäkunanpaq. Tsayno niptinmi lapanpis awnipäkurqan cumplipäkunanpaq.
33 Tsawraqa Israel runakuna tashqan lapan partikunacho ïdulukunata Josías ushakätsirqan. Nirkurmi Israel nacioncho taq runakunata mandarqan TAYTA DIOSTA cäsukur kawapäkunanpaq. Josías kawashqanyaqqa unay aylunkuna yärakushqan TAYTA DIOSLATAMI sirvipäkurqan.