Malaquías
3 Lapanta mandaq TAYTA DIOS kaynömi nin: “Nänita pitsaqno runakunata kamarikatsinanpaqmi wilakuqnïta puntäta kachashaq.* Tsaypitanami shuyaykashqayki mandaq chayamur elaqpita templuman yaykunqa. Paymi qamkunawan *pactu rurashqäta wilakunqa. Rikayta munashqayki wilakuqqa chayamunqanami.
2 “Payqa jutsa rurashqaykipita purificashunaykipaq imaykatapis ushaq ninano y taqshakuna jabonnömi kanqa.* Tsayno kaykaptinqa chayamuptin ¿piraq awantanman? Tsaynöpis paypa nawpancho ¿piraq ichiranman?* 3 Payqa qorita y qellayta ninawan tsulutsir qanrata jorquqnömi *levitakunata purificanqa. NOQA munashqänöna sacrificiukunata *altarcho rupatsipäkuptinqa 4 Judá y Jerusalén runakuna sacrificiuta apamushqankunata kushishqami chaskishaq. Unay aylunkuna sacrificiukunata apamuptin chaskishqänömi paykuna apamuptinpis kushishqa chaskishaq”.
5 Lapanta mandaq TAYTA DIOS kaynömi nin: “Kikïmi qamkunata juzgashayki brüjuta ruraptiki, majayuq kaykar jukwan kakuptiki, jutïcho promitirkur mana cumpliptiki, arutsishqayki runata mana pägaptiki, viüdata y waktsata nakatsiptiki, jäpa runata mana ali rikaptiki y mana *mantsakamaptiki”.
Diezmuta y ofrendata apananpaq nishqan
6 “Noqa TAYTA DIOS imaypis promitishqätaqa cumplïmi.* Tsaymi unay ayluyki Jacobta promitishqäta* cumplir qamkunata mana ushakätsishqätsu. 7 Tsayno kaptinpis qamkunaqa unay ayluykikuna kawashqanpita patsami leynïkunata mana cumplipäkunkitsu. Tsaymi lapanta mandaq TAYTA DIOS kar kayno nï: ¡Noqaman kutipäkamuy! Noqaman kutimuptikiqa yapaymi yanapashayki.*
“Tsayno niykaptïpis qamkunaqa kaynömi nirkaykanki: ‘¿Imatataq mana cäsukärishqätsu?’
8 “Qamkunaqa suwapaykämanki”.
“Tsayno niptïmi qamkunaqa kayno nirkaykämanki: ‘¿Imatataq qamta suwapashqä?’
“Qamkunaqa suwapämashqanki *diezmuta y ofrendata mana apamurmi. 9 Qamkunaqa lapan nacionnikiwan suwapämashqaykipitami maldicionädu karkaykanki.
10 “Diezmukunata lapanta wayïcho kaykaq almacenman apapäkamuy. Tsaymi wayïcho tsaytsika mikuy kanqapaq. Tsaynömi ciëlu punkuta kichar qamkunaman bendicionnïta putsuy putsuy churamushaq. Rasunpa churamunäpaq kashqanta musyanaykipaq mä diezmuta apapäkamuy.* Noqa lapanta mandaq TAYTA DIOSMI tsayno nï. 11 Mikuy ushaq kurukunata ushakätsiptïmi chakraykikunacho mikuynikikunapis ali wayunqa y üvaykikunapis tampiyparaqmi wayunqa. Noqa lapanta mandaq TAYTA DIOSMI tsayno nï. 12 Markayki maypis täkuypaq kaptinmi lapan nación runakunapis munapanqapaq. Noqa lapanta mandaq TAYTA DIOSMI tsayno nï”.
Cäsukuq kaqkunata kuyapänanpaq nishqan
13 Mastapis TAYTA DIOS kaynömi nin: “Qamkunaqa noqapa conträmi rimapäkushqanki.
“Tsayno niykaptïpis kaynömi nipäkamanki: ‘¿Imatataq contrayki rimapäkushqä?’
14 “Qamkunaqa conträ rimar kaynömi nipäkushqanki: ‘Manakaqlapaqmi Diosta sirvintsi. ¿Imalapaqtaq leyninkunatapis cäsukuntsi? Jutsata rurashqantsipita lakikuptintsipis lapanta mandaq TAYTA DIOSQA manami cäsumantsitsu. 15 Orgullösu runakunaqa kushishqami kawapäkun. Jutsa ruraqkunapis rïcumi karkaykan. Tayta Diosta mana cäsukuptinpis paykunataqa manami castigantsu’ ”.*
16 Tsaymi TAYTA DIOSTA *mantsakuq runakunaqa wilanakur shakyätsinakurqan payta imaypis cäsukärinanpaq. Tsayno wilanakushqanta mayarmi TAYTA DIOSQA rölluman jutinkunata nawpancho qelqatsirqan imaypis yarparänanpaq.
17 Lapanta mandaq TAYTA DIOS kaynömi nin: “Juzganä junaqmi tsay runakunata kuyapäshaq. Cäsukuq tsurinta papänin kuyapashqannömi noqapis paykunata kuyapäshaq.* 18 Tsaymi runakuna yapay tantiyapäkunqa cäsukamaqkunata kuyapashqäta y mana cäsukamaqkunata castigashqäta, sirvimaqkunata ali rikashqäta y mana sirvimaqkunata mana ali rikashqäta”.