Jeremías
Filisteo runakunata ushakätsinanpaq nishqan
47 Kaychömi qelqaraykan filisteo runakunapaq profëta Jeremíaswan TAYTA DIOS wilakatsishqan. Tsay witsan Gaza markata* manaraqmi Faraón atacarqanraqtsu.*
2 “Noqa TAYTA DIOSMI kayno nï:
Mayu cargashqa aywar intëru pampapa mashtakaqnömi norti kaq lädupita soldädukuna shapäkamunqa.
Shamurmi intëru Filistea nacioncho kaq markakunaman juntakanqa.
Tsayta rikarmi tsaycho taq runakuna pasaypa mantsakashpan maytsaychöpis waqapäkunqa.
3 Cawallukuna patatayla aywashqan, carrëtakuna taqrarashqan y ruëdankuna aywashqanpis mantsakuypaqmi mayakanqa.
Tsayta mayarmi runakuna ichipayta mana kamäpakur tsurinkunatapis kachariykur qeshpir aywakärinqa.
4 “Tsayno kanqa filisteo runakunata ushakätsinäpaq kaq junaq chayamuptinmi.
Tiro runakunata y Sidón runakunata yanapaq nacionkunata* lapantami ushakätsishaq.
Paykunata ushakätsishaq wakin yanapaqnin nacionkunata ushakätsishqänömi.
Caftor islapita shamuq filisteo runakunata* NOQAMI ushakätsishaq.
5 Gaza markacho taq runakuna fiyupa lakikushpanmi aqtsankunatapis rutukärinqa.
Ascalón markacho taq runakunapis upatakashqami rikakärinqa.
Tsaycho taqkunami wanushkunapaq lakikur qarankunata pishtaypa pishtakunqa.
6 “Filisteo runakuna lakikurmi kayno nipäkunqa:
‘¡TAYTA DIOSPA espädan!
¡Imayyaqraq wanutsipäkamanki!
¡Imayraq jamanki!
¡Churaräkunaykiman kutikuyna!’
7 “Tsayno nipäkuptinpis ¿imanöparaq espädä jamanman?
Noqa TAYTA DIOSMI espädäta kachamushqä Ascalón markata y lamar kuchuncho kaykaq markakunatapis ushakätsinanpaq.
Tsaycho runakunata ushakätsinanpaqmi destinashqä”.