Isaías

15 Kaychömi qelqaraykan Moab nación imano kananpaq Tayta Dios revelashqan.*

Moab nacioncho kaykaq Ar markataqa juk tsakaylami elqäratsinqa.

Moab nacioncho kaykaq Kir markatapis juk tsakaylami ushakätsinqa.

 2 Tsayno kaptinmi Dibón markacho taq runakuna fiyupa lakikärinqa.

Templunman y *altarkunamanmi aywanqa lakikuypita waqananpaq.

Nebo y Medeba markakunatapis elqäratsinqami.

Chipyaq elqätsiptinmi moabita runakuna lakikur waqapäkunqa.

Tsayno lakikurmi aqtsantapis y shaprantapis rutukärinqa.

 3 Qachqa röpan jatishqami cällikunapapis puripäkunqa.

Wayin janankunachöpis* y pläzankunachöpis lapanmi lakikur waqapäkunqa.

4 Hesbóncho y Elealicho taqkuna ausiliuta manakurmi qaparpanqa.

Qaparashqan Jahaza markayaqmi mayakanqa.

Atacaptinmi moabita soldädukunapis mantsakärinqa.

Ali chölu soldädukunapis fiyupami siksikyanqa.

5 Moabita runakuna tsayno nakananpaq kaptinmi shonqü pasaypa lakinan.

Paykuna Zoaryaq y Eglat-selesiyáyaqmi qeshpir aywakärinqa.

Luhitman witsänan cuestapami waqaraykar aywapäkunqa.

Horonaimman aywaq nänipa aywashpanmi iktsuy iktsur waqapäkunqa.

6 Nimrimcho yaku pözukunapis y qewakunapis tsakinqami.

Lapan tseqlimuq jachakunapis wanutanqami.

Manami ima jachakunapis loqyuranqanatsu.

 7 Tsaymi lapan shuntashqankunatapis Sauci Raqraman apapäkunqa.

 8 Tsaycho waqashqanqa intëru Moab nacionyaqmi mayakanqa.

Eglaimyaq y Beer-elimyaqmi qaparashqan mayakanqa.

9 Atska runakuna wanuptinmi Dimóncho kaq yakumanpis yawar talukanqa.

Leonkunatapis Dimóncho taqkunamanmi Tayta Dios kachamunqa.

Tsay leonkunami Moabpita qeshpiq runakunata mikur ushanqa.