Amós
1 Kay libruchömi qelqaraykan Amós wilakushqan. Payqa Tecoa markacho taq uysha mitsiq runami karqan. Amós wilakushqan witsanmi Judá nacioncho Uzías rey kaykarqan* y Israel nacionchönami Joáspa tsurin Jeroboam rey kaykarqan.* Amós wilakushqanpita ishkay wata pasarkuptinraqmi fiyupa temblor karqan. 2 Wilakurmi Amós kayno nirqan:
“TAYTA DIOSMI Sión jirkanpita patsa leonno qaparämun.
Jerusalénpita patsa qayakamushqanmi räyu bunruruqnöraq mayakämun.*
Parlamuptinmi jirkacho qewakunapis elaqpita qawqanqa.
Carmelo jirkachöpis qewakuna tsakinqami”.
Siria nación runakunata Tayta Dios juzgananpaq nishqan
3 TAYTA DIOSMI kayno nin:
“Damasco markacho* taq runakunapa jutsankunaqa aypämushqanami kaykan.*
Paykunaqa ëracho trïgupa gransanta ñutquqpaq wirushqannömi Galaad runakunata ushakätsishqa.*
Tsayno rurashqanpitami fiyupa castigashaq.
4 Tsaymi imaykatapis nina rupar ushashqanno rey Hazaelpa aylunkunata y rey Ben-adad sharkatsishqan palaciuta ushakätsishaq.
5 Damasco markaman yaykuna punkukunatapis lapantami pakir ushashaq.
Bicat-avéncho y Bet-edéncho mandaqkunatapis tsaynölami ushakätsishaq.
Nirkurmi contran runakuna shamur Siria runakunata prësu apakärinqa Kir partiman”.*TAYTA DIOSMI tsayno nin.
Filisteo runakunata Tayta Dios juzgananpaq nishqan
6 TAYTA DIOSMI kayno nin:
“Gaza markacho taq runakunapa jutsankunaqa aypämushqanami kaykan.
Paykunami juk marka intëru runakunata edomita runakunaman rantikärirqan.
Tsayno rurashqanpitami fiyupa castigashaq.
7 Tsaymi imaykatapis nina rupar ushashqanno Gaza markapa murällanta y palaciunkunata ushakätsishaq.
8 Asdod markacho y Ascalón markacho reykunatapis ushakätsishaqmi.
Mana kuyapaypami Ecrón markacho taq runakunatapis ushakätsishaq.
Tsaynöpami filisteo runakuna* lapanpis wanunqapaq”.*
TAYTA DIOSMI tsayno nin.
Tiro runakunata Tayta Dios juzgananpaq nishqan
9 TAYTA DIOSMI kaynömi nin:
“Tiro markacho taq runakunapa jutsankunaqa aypämushqanami kaykan.*
Paykunami aylunkunawan ali kawapäkunanpaq *pactuta rurashqa kaykarpis juk marka intëruta edomita runakunaman tsay aylun runakunata rantikärirqan.
Tsayno rurashqanpitami fiyupa castigashaq.
10 Tsaymi imaykatapis nina rupar ushashqanno Tiro markapa murällanta y palaciunkunata ushakätsishaq”.
Edomita runakunata Tayta Dios juzgananpaq nishqan
11 TAYTA DIOSMI kayno nin:
“Edom nacioncho taq runakunapa jutsankunaqa aypämushqanami kaykan.*
Paykunaqa pasaypa rabyarmi aylun kaykaptin Israel runakunata mana kuyapaypa espädanwan wanutsipäkurqan.
Tsayno rurapäkushqanpitami fiyupa castigashaq.
12 Tsaymi imaykatapis nina rupar ushashqanno Temán markata y Bosracho palaciukunata ushakätsishaq”.
Amón nación runakunata Tayta Dios juzgananpaq nishqan
13 TAYTA DIOSMI kayno nin:
“Amón nacioncho taq runakunapa jutsankunaqa aypämushqanami kaykan.*
Paykunaqa chakrankunata qechunan kashqami Galaadcho taq chichu warmikunata espädawan pachanta kutsuypa wanutsipäkurqan.
Tsayno rurashqanpitami fiyupa castigashaq.
14 Tsaymi imaykatapis nina rupar ushashqanno Rabá markapa murällanta y palaciunkunata ushakätsishaq.
Pasaypa qaparar löcu tamyanöraqmi tsay markata ushapäkunqa.
15 Mandaqnin reytapis y mandäshiqninkunatapis juk lädu nacionmanmi prësu apakärinqa”.
TAYTA DIOSMI tsayno nin.