Isaías

18 ¡Wawalaw, imanöraq kanqa Etiopía nacioncho kaykaq mayukunapita mas washaqancho taq runakuna!*

Tsay nacionchöqa yupayta mana atipaypaqmi chukluskuna kaykan.*

 2 Etiopía runakunaqa ututupita rurashqa *büquikunawanmi Nilo mayupa kachata kacharkaykan.

¡Kacha aywaykaqkuna, nacionnikiman kutipäkuy!

¡Jatunkaray y shapraynaq runa mayikikuna tashqanman warakayla kutipäkuy!*

Nacionnikicho taq runakunataqa maytsay nacioncho taq runakunapis mantsakunmi.

Pasaypa kalpasapa y geniuyuq runakunami kapäkunki.

Nacionnikipapis atska mayukunami pasan.

3 Puntakunacho señalta churamuqno y *cornëtata tukamuqnömi Diospa wilakuyninta wilakuykä.

Intëru munducho taqkuna, tsay wilakushqäta mayapäkuy.

 4 TAYTA DIOSMI kayno nimarqan:

“Tashqäpita patsami Etiopía nacionta rikaykä.

Tamya pasaptin wapuy shanay shanashqannömi mana tantiyakayla rikaraykä.

Cosëcha witsan mana mayakayla shulyashqannömi mana mayakayla rikaraykä”.

5 Tsayno rikaraykashqanchömi elaqpita Etiopía runakunata Tayta Dios castiganqa.

Manaraqpis üva cosëcha kaptin,

üvapa waytan mayna shushuraykaptin

y wayuynin poquraykaptinmi

runakunata kachamunqa Etiopía runakunata ushakätsinanpaq.

Paykunaqa üva rämankunata lawmarkur jitariqnömi Etiopía runakunata wanutsipäkunqa.

 6 Nirkurmi wiskulkuna y jirka uywakuna mikunanpaq ayakunata kachaykunqa.

Usya witsanmi wiskulkuna mikunqa.

Tamya witsannami jirka uywakunana tulunkunatapis waqrunqa.

7 Kawaykar quëdaqkunanami lapanta mandaq TAYTA DIOSPAQ regälukunata apamunqa.

Tsay runakunaqa jatunkaray y shapraynaq runakunami karkaykan.

Paykunataqa maytsay nacioncho taq runakunapis mantsakunmi.

Fiyupa kalpasapa y geniuyuq runakunami kapäkun.

Nacionninpapis atska mayukunami pasan.

*Sión jirkanmanmi regäluta apapäkamunqa.

Tsaychömi lapanta mandaq TAYTA DIOS kaykan.