Nahúm
1 Kay libruchömi qelqaraykan profëta Nahúmta Tayta Dios revelashqan. Nahúmqa karqan Elcos markapitami. Paytami Tayta Dios revelacioncho rikatsirqan Nínive markata ushakätsinanpaq kashqanta.*
Nínivita Tayta Dios castigananpaq nishqan
2 TAYTA DIOSQA munan pay japalanta sirvipäkunantami.
Contran kaqkunataqa mana kuyapaypami pitapis castigan.*
Pipis mana cäsukuptinqa pasaypami rabyakun.
3 TAYTA DIOSQA pacienciakuq y munayniyuqmi kaykan.
Pacienciakuq karpis jutsa ruraqkunataqa castiganmi.
TAYTA DIOSQA huracán y löcu tamya jananpami aywan.
Pukutaypis chakincho polvu sharkuqnölami kaykan.
4 Olqüpaptinqa lamarpis y mayukunapis tsakikäkunmi.
Basán particho y Carmelo jirkacho kaqkunapis tsakikäkunmi.
Líbanucho kaykaq waytakunapis wanukäkunmi.
5 Pay shamuptinqa jirkankunapis mantsarishpan siksikyanmi.
Jirkakunapis tsulur ushakanmi.*
Kay patsapis y kay patsacho kaqkunapis lapanmi mantsarishpan siksikyan.
6 Pay rabyanaptin ¿piraq mana mantsarinmantsu?
Pay piñakuptin ¿piraq ichipanman?
Pay rabyakurqa ninanöraqmi imaykatapis ushan.
Pay puriptinqa qaqakunapis partikäkunmi.
7 TAYTA DIOSQA alilata ruraqmi kaykan.
Payqa lakikuqkunatapis yanapanmi.
Payman yärakuqkunatapis alimi rikan.
8 Paypa contran kaqkunatami itsanqa juchu apaqnöraq ushakätsin.
Maypa aywaptinpis wanuylami qatiraykan.
9 ¿Imanirtaq TAYTA DIOSPA contran sharkunaykipaq wilanakurkaykanki?
Payqa lapaykitami ushakätsishunkipaq.
Contran kaqkunataqa chipyaqmi ushakätsinqa.
10 Jirakashqa shirakata y tsaki oqshata nina rupar ushaqnömi ushakätsinqa.
11 Nínive runakuna*, qamkunapa mandaqniki reyqa TAYTA DIOSPA contranmi sharkushqa.
Tsaymi mana alita yätsishunki.
12 Kuyashqan runakunatami TAYTA DIOS kayno nin:
“Qamkunata castigashqa karpis kananpitaqa mananami castigashaykinatsu.
Asiria nación runakunatami itsanqa munayniyuq kaptinpis y tsaytsika kaptinpis lapanta ushakätsishaq.
13 Tsay runakunapa munaynincho kashqaykipitami jorqamushayki.
Mananami yapayqa paykunapa munaynincho kankipaqnatsu”.
14 Nínive markapa mandaqnin reyta TAYTA DIOS kaynömi nin:
“Jutikita aparänanpaqpis qampita miraqkuna manami kanqanatsu.
Tsaynöpis diosnikipa templuncho kaykaq ïdulukunata qerupita rurashqa kaqta y qoripita y qellaypita fundishqa kaqtapis lapantami ushakätsishaq.
Manakaqman qamta churashpämi tsay templuman pampashayki”.
15 (2.1) Judá runakuna, ali wilakuyta apamuq runa jirkakunapa aywaykämuqta rikapäkuy.
Paymi apaykämun ali kawapäkunaykipaq kaq wilakuyta.*
Kananpitaqa contrayki runakuna ushakätsishunaykipaq manami shamunqanatsu.
Paykunaqa lapannami wanur ushakashqa.
Tsayno kaykaptinqa Tayta Diospa fiestankunata* rurar kushikäriy.
Tsay fiestakunacho payta promitishqaykita cumplipäkuy.