Isaías

55 Tayta Dios kaynömi nin:

“Yakunaqkuna, yakuta upunaykipaq lapayki shapäkamuy.*

Mikuyta rantinaykipaq qellayniki mana kaptinpis mikuq shapäkamuy.

Vïnuta y lëchita mana pägaypa apanaykipaq shapäkamuy.

 2 Mikuyta rantinaykipa trukan ¿imanirtaq qellaynikita manakaqkunacho usharkaykanki?

¿Imanirtaq arupakur gänashqaykita lutankunacho usharkaykanki?

Shumaq mayapäkamay.

Cäsukamarqa ali mikuytami taripäkunkipaq.

Ali alilata mikur kushishqami kawapäkunkipaq.

3 “Wiyamashpayki noqaman shapäkamuy.

Nishqäta cäsukamarqa alimi kawapäkunkipaq.

Rey Davidta kuyar promitishqäta cumplirmi* qamkunata yanapanäpaq *pactuta rurashun.

Tsay pactuta imayyaqpis cumplishaqmi.

4 “Munayniyuq kashqäta maytsay nación runakunapis musyananpaqmi rey Davidta churashqä.

Nacionkunapa mandaqnin y yachatsiqnin kananpaqmi churashqä.

 5 Tsaynölami qamkunapis mana reqishqayki nación runakunata qayatsinkipaq.

Mana reqishuqniki runakunami warakayla qamkunaman shapäkamunqa.

Tsayno kanqa TAYTA DIOSNIKI kar qamkunata yanapaptïmi.

Noqaqa Israel runakunapa *santu Diosninmi kä”.

6 Kawashqaykiyaq TAYTA DIOSTA *ashipäkuy.

Kuyapaykäshushqaykiyaq ruwakäriy.

 7 Jutsa rurashqaykita kachapäkuy.

Manakaqkunata yarpachakunaykipa trukanqa TAYTA DIOSMAN kutikäriy.

Diosnintsi karmi kuyapäshunki.

Payqa imaypis perdonashunkimi.*

8 TAYTA DIOSMI kayno nin:

“Noqapa yarpaynïqa manami qamkunapa yarpaynikinötsu.

Noqa rurashqäkunapis manami qamkuna rurashqaykinötsu.

 9 Kay patsapita mas altucho jana patsa kashqannömi

rurashqäkunapis qamkuna rurapäkushqaykipita mas ali kaykan.

Yarpashqäkunapis qamkuna yarpashqaykipita mas alimi kaykan.

10 “Ciëlupita tamyapis ni rajupis manami kashqanman kutintsu.

Tsaypa trukanqa alpata ushmarmi ali wayunanpaq murushqankunata winatsimun.

Tsaynöpami murupis yapay murunanpaq kaykan.

Runa mikunanpaqpis mikuy kanqa.*

11 Palabräpis tamyanömi kaykan.

Kachamuptïmi imaypis munashqäta ruran.

Manami manakaqlapaqtsu maymanpis chayatsï.

12 “Qamkunaqa maypa aywarpis kushishqami kawapäkunkipaq.

Jirkakunapis jirkankunapis rikashushpayki kushishqami cantanqa.

Lapan yörakunapis kushikushpanmi rämankunata kuyutsinqa.

13 Kashakunapa trukanmi ciprés yörakuna winamunqa.

Ishankakunapa trukanmi arrayán yörakuna winamunqa.

Tsayno kaptinmi maytsaychöpis adorapäkamanqa.

Tsaytaqa manami pipis qonqanqatsu”.