Mateo
Jesucristupita qelqashqan
Jesúspa unay aylunkuna pï kashqanpis
1 Abrahampita y rey Davidpita miraq Jesucristupa unay aylunkuna kaynömi karqan:
2 Abrahampa tsurinmi karqan Isaac.
Isaacpa tsurinmi karqan Jacob.
Jacobpa tsurinmi karqan Judá y wawqinkunapis.
3 Judápa tsurinkunami karqan Fares y Zara.
Paykunapa mamanmi karqan Tamar.
Farespa tsurinmi karqan Esrom.
Esrompa tsurinmi karqan Aram.
4 Arampa tsurinmi karqan Aminadab.
Aminadabpa tsurinmi karqan Naasón.
Naasónpa tsurinmi karqan Salmón.
5 Salmónpa tsurinmi karqan Booz.
Boozpa mamanmi karqan Rahab.
Boozpa tsurinmi karqan Obed.
Obedpa mamanmi karqan Rut.
Obedpa tsurinmi karqan Isaí*.
6 Isaípa tsurinmi karqan rey David.*
Rey Davidpa tsurinmi karqan Salomón.
Salomónpa mamanmi karqan Uríaspa viüdan.
7 Salomónpa tsurinmi karqan Roboam.
Roboampa tsurinmi karqan Abías.
Abíaspa tsurinmi karqan Asa.
8 Asapa tsurinmi karqan Josafat.
Josafatpa tsurinmi karqan Joram.
Jorampa tsurinmi karqan Uzías.
9 Uzíaspa tsurinmi karqan Jotam.
Jotampa tsurinmi karqan Acaz.
Acazpa tsurinmi karqan Ezequías.
10 Ezequíaspa tsurinmi karqan Manasés.
Manaséspa tsurinmi karqan Amón.
Amónpa tsurinmi karqan Josías.
11 Josíaspa tsurinmi karqan Jeconías y wawqinkunapis.
Jeconías kawashqan witsanmi Israel runakunata Babilonia soldädukuna nacionninman prësu apakärirqan.*
12 Tsaychönami Jeconíaspa tsurin Salatiel yurirqan.
Salatielpa tsurinmi karqan Zorobabel.
13 Zorobabelpa tsurinmi karqan Abiud.
Abiudpa tsurinmi karqan Eliaquim.
Eliaquimpa tsurinmi karqan Azor.
14 Azorpa tsurinmi karqan Sadoc.
Sadocpa tsurinmi karqan Aquim.
Aquimpa tsurinmi karqan Eliud.
15 Eliudpa tsurinmi karqan Eleazar.
Eleazarpa tsurinmi karqan Matán.
Matánpa tsurinmi karqan Jacob.
16 Jacobpa tsurinmi karqan Maríapa runan José.
Maríapa wawanmi karqan Jesús. Paymi karqan Tayta Dios kachamushqan Cristo.
17 Abraham kawashqan witsanpita David yurishqanyaq chunka chusku *generacionmi karqan. Tsaynölami David kawashqan witsanpita Israel runakunata Babiloniaman apakärishqan witsanyaq chunka chusku generación karqan. Tsaynölami Babiloniaman apakärishqan witsanpita Jesucristo yurishqanyaqpis chunka chusku generación karqan.
Jesús yurishqan
18 Kaychömi qelqaraykan Jesucristo manaraq yuriptin imano kashqanpis. Joséwan tänanpaqmi María parlakushqana karqan.* Joséwan manaraq tarmi Espíritu Santupa munayninwan qeshyaq rikakurqan. 19 Joséqa ali runa karmi Maríata penqayman churayta mana munar pakaylapa kachariyta yarparqan.
20 Tsayno yarpachakuykaptinmi Tayta Diospa *angilnin Joséta sueñuynincho kayno nirqan: “Rey Davidpa aylun José, Maríawan casarayta ama penqakuytsu. Payqa Espíritu Santupa munayninwanmi qeshyaq rikakushqa. 21 Olqu wamratami wachanqa. Payman yärakuqkunata jutsankunapita salvananpaq kaptinmi tsay wamrapa jutinta churapanki Jesús* kananpaq”.*
22 Lapanpis tsayno pasarqan profëtanwan Tayta Dios kayno nishqan cumplikänanpaqmi:
23 “Juk virgen jipashmi qeshyaq rikakur olqu wamrata wachakunqa.
Tsay wamrapa jutintami churapanqa Emanuel jutin kananpaq”.*
(Emanuel ninanqa Tayta Dios noqantsiwanmi kaykan ninanmi.)
24 Tsayno niptinmi José punuykashqanpita rikcharkamur Tayta Diospa angilnin nishqannöla Maríawan tarqan. 25 Itsanqa tarpis wawan yurishqanyaq manami Maríawan punurqanraqtsu. Wamra yuriykuptinnami jutinta churaparqan Jesús kananpaq.*