Marcos
Pilatuman Jesústa apatsishqan
Mateo 27.1-2, 11-14; Lucas 23.1-5; Juan 18.28-38
15 Tsaypita patsa waraykaptinnami mandaq cürakuna, Israel mayor runakuna, ley yachatsiqkuna y lapan *Sanedrín juezkunapis juntakaykur wilanakurqan Jesústa wanutsipäkunanpaq. Wilanakurkurnami Jesústa liyarkur Pilatuman apatsirqan. 2 Chayaykatsiptinnami *Pilato tapurqan kayno nir: “¿Rasunpaku Israel runakunapa mandaqnin rey kaykanki?”
Tsawraqa Jesús kayno nirqan: “Rasun kaqtami niykanki”.
3 Tsaychömi mandaq cürakuna Jesúspa contran imaykatapis nipäkurqan. 4 Tsawraqa Jesústa Pilato yapay tapurqan kayno nir: “¿Manaku imatapis ninki contrayki rimapäkuptin?”
5 Tsayno niptinpis Jesús manami imatapis rimakurqantsu. Tsawraqa Pilato aläpa yarpachakurqan.
Jesústa crucificananpaq Pilato ordinta qoshqan
Mateo 27.15-26; Lucas 23.13-25; Juan 18.39—19.16
6 Cada watami *Pascua fiestacho runakuna manakushqan prësuta *Pilato kachariq. 7 Tsay watami Barrabás jutiyuq runa prësu wichqaraykarqan. Paymi autoridäkunapa contran sharkushqanpita y runata wanutsishqanpita wanutsikuq mayinkunawan carcilcho wataraykarqan. 8 Tsawraqa runakuna Pilatuman aywaykur manakurqan juk prësuta tsay watapis kacharinanpaq. 9 Tsawraqa Pilato tapurqan kayno nir: “¿Qamkuna munankimanku Israel runakunapa mandaqnin reyta kacharinäta?”
10 Pilato musyarqanmi mandaq cürakuna Jesústa chikir prësu apapäkushqanta.
11 Tsayno niptinmi mandaq cürakuna tsaycho kaykaq runakunata shimita jatiparqan kayno nipäkunanpaq: “Barrabásta kachariyqa”. 12 Barrabásta kacharinanpaq niptinmi Pilato kayno nirqan: “Israel runakunapa mandaqnin reyta ¿imatataq rurashaq?”
13 Tsayno niptinmi qayaraypa kayno nipäkurqan: “¡Crucificay!”
14 Tsawraqa Pilato tapurqan: “¿Ima jutsatataq rurashqa?”
Tsayno niptinpis masraqmi kayno nipäkurqan: “¡Crucificay!”
15 Tsawraqa runakunapita ali rikashqa kayta munashpan Barrabásta Pilato kacharirqan. Jesústanami fiyupa astarkatsir crucificananpaq soldädukunapa makinman kachaykurqan.
Jesústa soldädukuna asipashqan
16 Tsaypitanami soldädukuna Jesústa apapäkurqan Pilatupa despächunpa patiunman. Lapan tröpa* soldädukuna tsayman juntakaykurmi 17 granäti cäpata ayluparkur kashapita awashqa corönata umanman jatiparqan. 18 Tsayno jatiparkurmi asipar nipäkurqan: “¡Alabashqa katsun Israel runakunapa mandaqnin rey!”
19 Tsaypitanami shoqushwan Jesústa umacho wirupäkurqan. Toqaparkurmi adoraq tukushpan nawpanman qonqurpakärirqan. 20 Tsayno asiparkurmi granäti cäpata loqtiparir kikinpa röpantana jatiparqan. Nirkurmi crucificaq apapäkurqan.
Jesústa crucificashqan
Mateo 27.32-44; Lucas 23.26-43; Juan 19.17-27
21 Jesústa crucificananpaq aparkaykaptinmi chakrapita kutiykämurqan Simón jutiyuq runa. Payqa Cirene nacionpitami y Alejandrupa y Rufupa taytanmi karqan.* Paytami Jesús apaykashqan cruzta umrutsipäkurqan. 22 Tsaypitanami Jesústa chayatsirqan Gólgota nishqanman. Gólgota ninanqa Calavëra Sitiu ninanmi. 23 Tsaycho mïrrawan talushqa vïnuta uputsiyta munapäkuptinpis manami upuyta munarqantsu.*
24 Jesústa crucificaykurnami suertita jitapäkurqan röpanta mayqanpis apakunanpaq.* 25 Crucificashqan höra karqan tuta las nuëvinömi. 26 Imapita wanutsishqantapis runakuna musyananpaqmi letrërucho kayno nirqan: “Kay runaqa Israel runakunapa mandaqnin reymi”.
27 Jesús crucificaraykashqan nawpanmanmi ishkay suwa runakunatapis crucificapäkurqan, juknin kaqta alawqa kaq nawpanman y jukaqtana itsuq kaq nawpanman. 28 [Tsay suwa runakunatawan crucificarmi Tayta Diospa palabrancho kayno nishqanta cumplipäkurqan: “Jutsayuq runatanömi rikapäkurqan”.]*
29 Jesús crucificaraykaqta rikarmi tsaypa pasaq runakuna asiparqan. Umanta awishpanmi* kayno nipäkurqan: “¡Katay! Templutapis juchurkatsir kimsa junaqlata sharkatsinaykipaq kashqanta niykarqa* 30 mä salvakur cruzpita urämuy ari”.
31 Tsaynölami mandaq cürakuna y ley yachatsiqkunapis Jesústa asipashpan kikinpura kayno nipäkurqan: “Wakinta salvarpis kikinqa manami salvakuyta kamäpakuntsu. 32 Israel runakunapa mandaqnin rey Cristo karqa mä cruzpita urämutsun. Urämuptinqa criyipäkushunmi”.
Tsaynölami Jesúspa nawpancho crucificaraykaq runakunapis ashlipäkurqan.
Jesús wanushqan
Mateo 27.45-56; Lucas 23.44-49; Juan 19.28-30
33 Pulan junaqpita malway intiyaqmi patsa tsakakurkurqan. 34 Tsay hörami Jesús qayaraypa kayno nirqan: “Eloi, Eloi, ¿lama sabactani?”
Tsay ninanqa kaykan “Tayta Dios, Tayta Dios, ¿imanirtaq kachariykamashqanki?” ninanmi.*
35 Tsayno nishqanta mayarmi tsaycho kaykaq wakin runakuna kayno nipäkurqan: “Profëta Elíastami qayakuykan”.
36 Tsayno niptinmi juk runa jukla aywaykur pochquq vïnuman esponjata ushmarkatsir shoqushpa puntanman watarqan. Tsayta Jesúspa shiminman shoqunanpaq churaparmi* kayno nirqan: “Mä rikashun cruzpita jorqunanpaq Elías shamunqakush”.
37 Tsaypitanami fuertipa qaparar Jesús wanurqan. 38 Tsay hörami templu rurincho tsaparaq cortïna* janapita urayaq rachikäkurqan. 39 Jesúspa nawpancho kaykaq capitanpis Jesús [qaparashqanta mayar y] wanushqanta rikarmi kayno nirqan: “¡Rasunpami kay runaqa Diospa Tsurin kashqa!”
40 Tsaychömi warmikunapis karulapita rikarpaykarqan. Paykunawanmi kaykarqan María Magdalena, Santiagupa y Josépa maman María y Salomépis. 41 Tsay warmikunami Galileacho Jesús puriptin yanapar qatirparqan.* Tsaynölami tsaycho karkaykarqan Jesúswan Jerusalénman aywaq atska warmikunapis.
Jesústa pampashqan
Mateo 27.57-61; Lucas 23.50-56; Juan 19.38-42
42 Jamay junaqpaq kamarikunan junaq tardina kaptinmi* 43 Arimateapita kaq José *Pilato kaqman aywaykur mana mantsakuypa kayno nirqan: “Jesúspa ayanta kachapaykalämay pampanäpaq”.
Joséqa Israel runakunapa autoridäninmi karqan. Paypis Tayta Dios *mandaykashqantami shuyaraykarqan.
44 Tsayno manakuptinmi Pilato mantsakar kayno nirqan: “¿Wanushqanatsuraq?” Tsaymi wanushqanta musyananpaq capitanta qayatsirqan. 45 Mayna wanushqanta wilaptinmi Joséta awnirqan Jesúspa ayanta pampananpaq.
46 Tsaymi lïnupita rurashqa säbanasta rantiykur Jesúspa ayanta cruzpita jorqurir piturqan. Nirkurmi qaqacho uchkushqa sepultüraman tsutaykur jatunkaray rumiwan punkuta tsaparqan. 47 María Magdalena y Josépa maman María mayman tsutaykushqantapis rikarqanmi.