Marcos
Jesucristupita qelqashqan
Bautizaq Juan wilakushqan
Mateo 3.1-12; Lucas 3.1-9, 15-17; Juan 1.19-28
1 Tayta Diospa Tsurin Jesucristupa ali wilakuyninta wilakuyta qalaykunanpaqmi 2 profëta Isaías kayno qelqarqan:
“Nänita pitsaqno runakunata kamarikatsinanpaqmi wilakuqnïta puntaykita kachashaq*.
3 Paymi chunyaq jirkacho qayaraypa wilakur kayno ninqa:
‘Tayta Dios shamunanpaq nänita altsapäkuy.
Wenqu nänikunata derechapäkuy’ ”*
4 Isaías qelqashqannölami chunyaq jirkacho Juan *bautizar runakunata kayno nirqan: “Tayta Dios perdonashunaykipaq jutsa ruraykunata kacharir bautizakäriy”.
5 Juan wilakushqanta mayananpaqmi Judea provinciapita y Jerusalénpita lapan runakuna aywapäkurqan. Tayta Diosta perdonta manakäriptinmi Jordán mayucho tsay runakunata Juan bautizarqan.
6 Juanpa röpan karqan *camëllupa aqtsanpita awashqami. Wachkunpis karqan camëllu qarapita rurashqami.* Chukluskunata y abëjapa mishkintami mikurqan.
7 Wilakurmi kayno nirqan: “Qepäta shamuq kaqqa noqapita mas munayniyuqmi kaykan. Paypa lanqi watunta paskapänaläpaqpis manami merecïtsu. 8 Noqaqa yakulawanmi bautizä. Paymi itsanqa Espíritu Santuwan bautizapäkushunkipaq”.
Jesústa Juan bautizashqan
9 Tsay witsanmi Galileacho kaykaq Nazaretpita Jesús aywarqan Juan *bautizaykashqan kaqman. Chayaykuptinmi paytapis Jordán mayucho Juan bautizarqan. 10 Yakupita sharkurkurmi Jesús rikarqan jana patsa kichakämuptin Espíritu Santu palumano payman uraykämuqta. 11 Tsay hörami jana patsapita Tayta Dios kayno nimurqan: “Qamqa kuyay tsurïmi kaykanki. Qampitami kushishqa kaykä”.*
Jesústa Satanás tentayta munashqan
12 Tsaypitanami Jesústa Espíritu Santu chunyaq jirkaman pusharqan. 13 Chusku chunka (40) junaq munti uywakuna kaykashqancho kaykaptinmi *Satanás tentarqan. *Angilkunami Jesústa yanaparqan.
Galileacho ali wilakuyta Jesús qalaykushqan
14 Juan carcilcho wichqaraykaptinnami Galileaman Jesús kutirqan. Tsaychömi Tayta Dios *mandaykashqanpa ali wilakuyninta wilakur 15 kayno nirqan: “¡Promitishqankunata Tayta Dios cumplishqanami! ¡Tayta Dios mandaykashqan chayamushqanami! ¡Jutsa ruraykunata kacharir Tayta Diospa ali wilakuyninta chaskikäriy!”
Discïpulun kananpaq pescädu tsariqkunata Jesús qayashqan
16 Galilea qocha kuchunpa aywaykashqanchömi Jesús rikarqan Simónta y wawqin Andrésta. Paykuna pescädu tsariq karmi redninta yakuman mashtarkaykarqan. 17 Paykunatami Jesús kayno nirqan: “Qatirämay. Noqami yachatsishayki runakunata pescanaykipaq”.
18 Tsayno niptinmi redninkunata kachariykushpan Jesúswan aywakärirqan.
19 Tsaypita mas washa läduta aywarkaykashqanchönami rikarqan Zebedeupa tsurin Santiaguta y wawqin Juanta. Paykunami *büquincho redninkunata shilparkaykarqan. 20 Paykunatapis qayaptinmi jukla aywapäkurqan taytan Zebedeuta y minkayninkunata büquicho kachariykur.
Supay löcuyätsishqan runata Jesús aliyätsishqan
21 Tsaypitanami Capernaúm markaman discïpulunkunawan Jesús aywapäkurqan. Jamay junaqnami *sinagögaman yaykur yachatsiyta qalaykurqan. 22 Yachatsiptinmi runakuna fiyupa espantashqa rikakurqan. Manami leyta yachatsiq runakunanötsu yachatsirqan, sinöqa munayniyuq karmi shumaq yachatsirqan.
23 Tsay sinagögachömi kaykarqan *supay löcuyätsishqan runa. Paymi qaparar 24 kayno nirqan: “[¡Waauuu!] ¡Nazaretpita kaq Jesús! ¿Imatataq noqakunawan munanki? ¿Ushakätsimänaykipaqku shamushqanki? ¡Noqa musyämi Tayta Dios kachamushqan *santu runa kashqaykita!”
25 Tsawraqa supayta olqüpar Jesús kayno nirqan: “¡Upälala kay runapita yarquy!”
26 Tsayno niptinmi tsay runata saqtariykur supay qaparar aywakurqan. 27 Tsayta rikaykurmi kushikärishpan juknin jukninpis kayno nipäkurqan: “¡Imatanataq rikantsi! ¡Munayninwan niptin supaykunapis cäsukurmi aywakärin! ¡Pay yachatsishqannöqa manami pipis yachatsintsu!”
28 Supayta qarqushqanta mayaykurmi intëru Galileacho Jesús munayniyuq kashqanta parlapäkuq.
Pedrupa suedranta Jesús aliyätsishqan
29 *Sinagögapita Jesús yarqurnami Santiaguta y Juanta pushakurkur Simónpa y Andréspa wayinman aywapäkurqan. 30 Chayaykuptinmi Simónpa suedran shanapäkuy qeshyawan antsa jitaraykashqanta wilapäkurqan. 31 Tsawraqa qeshyaykashqan kaqman Jesús yaykurir makipita sharkatsiptin jinan höra aliyarqan. Aliyarkurnami mikuyta paykunata qararqan.
Atska qeshyaqkunata Jesús aliyätsishqan
32 Patsa tsakaykaptinnami lapan qeshyaykaqkunata y *supaykuna nakatsishqan runakunatapis Jesúsman apapäkamurqan. 33 Tsay markacho lapan runakunami Jesús kaykashqan wayi punkuman juntakarqan. 34 Tsaychömi tukuy qeshyawan qeshyaykaqkunata Jesús aliyätsirqan. Tsaynölami atska runakunapita supaykunatapis qarqurqan. Pï kashqantapis supaykuna musyaptinmi Jesús olqüparqan mana rimakunanpaq.
Galileacho wilakur Jesús purishqan
35 Tsaypitanami tsaka tsakala chunyaqninman Jesús aywakurqan Tayta Diosta manakunanpaq. 36 Tsaymi Jesústa watukushpan Simón y paywan kaykaqkuna ashiq aywapäkurqan. 37 Tarirkurnami kayno nirqan: “Lapanmi ashirkaykäshunki, tayta”.
38 Tsawraqa Jesús kayno nirqan: “Tayta Diospa wilakuyninta wilakunäpaq wakin markakunapapis aywashun. Tsaypaqmi shamushqä”.
39 Tsaymi intëru Galileapa Jesús purirqan *sinagögakunacho wilakushpan y *supaykunata runakunapita qarqushpan.*
Leprawan qeshyaykaqta Jesús aliyätsishqan
40 Juk kutichömi *leprawan qeshyaykaq runa Jesúspa nawpanman qonqurpakuykur kayno nirqan: “Tayta, voluntäniki kaptinqa aliyaykatsilämay”.
41 Tsayno ruwakuptinmi Jesús kuyapashpan yataykur kayno nirqan: “Aliyashqa kanaykitami munä”.
42 Tsayno niptinmi jinan höra leprawan qeshyaykashqanpita aliyarqan. 43 Aywakunanpaq despacharmi Jesús kayno nirqan: 44 “Aliyätsishqäta pitapis ama wilapankitsu. Tsaypa trukanqa cüraman ayway aliyashqaykita rikashunaykipaq. Nirkur Moisés qelqashqancho nishqanno purificakunaykipaq ofrendaykita templuman apay. Tsaynöpami aliyashqaykita musyapäkunqa”.*
45 Tsayno niykaptinpis tsay runaqa Jesús aliyätsishqanta pïmaytami wilaparqan. Tsaymi Jesúsqa markamanpis mana yaykurqannatsu, sinöqa chunyaq jirkalachöna quëdakurqan. Tsaymanpis maytsaypitami runakuna aywapäkuq.