Lucas
Jesústa Zaqueo chaskikushqan
19 Tsaypitanami Jericó markapa Jesús pasaykarqan. 2 Tsay markachömi Zaqueo jutiyuq rïcu runa tarqan. Paymi impuestu cobraqkunapa mandaqnin karqan. 3 Tsay runami imanöpapis Jesústa reqiyta munarqan. Itsanqa takshala karmi atska runakunapa chawpincho aywaptin rikayta kamäpakurqantsu. 4 Tsaymi warakayla nawparkur sicómoro yöraman witsarqan Jesús pasaqta rikananpaq. 5 Tsaypa pasaykashqanchömi Zaqueuta rikärir Jesús kayno nirqan: “Zaqueo, jukla urämuy. Wayikimanmi aywaykä patsatsimänaykipaq”.
6 Tsawraqa Zaqueo jukla urarpamur wayinman Jesústa kushishqa pusharqan. 7 Tsayta rikaykurmi runakuna Jesústa jamurparqan kayno nir: “¡Imanirtaq jutsasapa runapa wayincho patsakun!”
8 Wayinchöna kaykarmi Zaqueo ichirkur Jesústa kayno nirqan: “Lapan imaykäkunapitapis pulantami waktsakunata qoykushaq, tayta. Pipa imantapis qechushqa karqa chusku kuti mastami kutitsishaq”.
9 Tsawraqa Jesús kayno nirqan: “Kananmi kay wayiman salvación chayamushqa. Kay runapis rasunpami Abrahampa aylun kaykan. 10 Oqrakashqakunata ashir salvananpaqmi *Runapa Tsurin shamushqa”.
Ashmayninkunata patronnin qellayta kachapashqan
11 Jesús tsayno parlashqanta mayar y Jerusalénman chayananpaqna kaptinmi runakuna yarpapäkurqan Tayta Dios *mandaykashqan qalaykunanpaqna kashqanta. Tsayno yarpaptinmi Jesús tinkutsiypa yachatsirqan 12 kayno nir: “Juk rïcu runashi juk lädu nacionman aywarqan rey kayta chaskikunanpaq. 13 Manaraq aywarshi chunka ashmayninkunata qayaykatsir jukninta juknintapis atska qellayta* aypurqan kayno nir: ‘Kutimunäyaq kay qellaywan arurkaykanki’. 14 Tsayno nir aywakuptinshi marka mayinkuna payta chikishpan qepanta runakunata kacharqan kayno nipäkunanpaq: ‘Manami tsay runa mandamaqnï rey kananta munapäkütsu’.
15 “Tsayno niptinpis rey kayman yaykurqanshi. Tsaypita markanman kutiykurnashi qellayninta tsararaq ashmayninkunata qayatsirqan aykata gänashqantapis musyananpaq. 16 Tsayshi punta chaskiq kaq chayaykur kayno nirqan: ‘Tayta, qellayniki chunka kuti masmi mirashqa’.
17 “Tsawraqa patronnin kayno nirqan: ‘Ali ashmaymi qam kanki. Walkalapitapis qellaynïta miratsishqaykipitami chunka markapa mandaqnin kanaykipaq churashayki’.
18 “Jukaqpis chayaykur kaynöshi nirqan: ‘Tayta, qellayniki pitsqa kuti masmi mirashqa’.
19 “Tsayshi paytapis kayno nirqan: ‘Pitsqa markapa mandaqnin kanaykipaqmi qamtapis churashayki’.
20 “Jukaq ashmayninnashi chayaykur kayno nirqan: ‘Kaychömi kaykan qellayniki, tayta. Ratashwan qepirkurmi churaykurqä. 21 Qamqa mana churashqaykipitami shuntanki y mana murushqaykipitami cosechanki. Pasaypa fiyu kashqaykita musyarmi mantsakushpä churaykurqä’.
22 “Tsayshi patronnin kayno nirqan: ‘¡Qamqa mana yärakuypaq ashmaymi kanki! Kikikipa shimilaykimi condenaykäshunki. Fiyu kashqäta musyaykar, mana churashqäpita shuntashqäta musyaykar y mana murushqäpita cosechashqätapis musyaykarqa 23 ¿imanirtaq qellaynïta banculamanpis mana churarqaykitsu kutimur wawantinta shuntanäpaq?’ 24 Nirkurnashi tsaycho kaykaq runakunata kayno nirqan: ‘¡Tsararashqan qellaynïta qechurir chunka kuti mas miratsiq kaqta qoykuy!’ 25 Tsayno niptinshi kayno nipäkurqan: ‘Payqa maynami tsararaykan chunka kuti masta, tayta’.
26 “Nipäkuptinshi patronnin kayno nirqan: ‘Yärakuypaq kaqtaqa mastami kamaripanqa. Mana yärakuypaq kaqtami itsanqa tsararashqalantapis qechunqa. 27 Rey kanäta mana munar chikimaqkunataqa ¡kayman apaykamur nawpächo supayninta apatsipäkuy!’ ”
Jerusalénman Jesús yaykushqan
Mateo 21.1-11; Marcos 11.1-11; Juan 12.12-19
28 Tsayno wilaparkurmi Jerusalénman Jesús aywayta sïguirqan. 29 Olivos jirkancho Betfagé y Betania markakunaman chayaykarnami ishkay discïpulunkunata kacharqan 30 kayno nir: “Taqay markaman aywapäkuy. Chayashpaykimi pipis manaraq muntakushqan bürru wataraykaqta taripäkunkipaq. Tsay bürruta paskarir apapäkamuy. 31 Tsaycho pipis ‘¿imanirtaq bürruta paskarkaykanki?’ nishuptikiqa ‘Señor Jesúsmi munaykan’ nipäkunki”.
32 Tsaymi discïpulunkuna aywar Jesús nishqannöla taripäkurqan. 33 Bürruta paskarkaykaptinmi ämunkuna tapurqan kayno nir: “¿Imapaqtaq bürrüta paskarkaykanki?”
34 Tsayno niptinmi kayno nipäkurqan: “Señor Jesúsmi munaykan”.
35 Bürruta chayaykatsir punchunkunata karunaparkuptinmi Jesús muntakurqan. 36 Muntashqa aywaptinnami runakuna kushikuypita punchunkunata näniman mashtapäkurqan.* 37 Olivos jirkanpa urämunanpaqna kaykaptinmi milagrukunata rikashqanpita kushikur tsaytsika discïpulunkuna Tayta Diosta lapan shonqunwan alabapäkurqan 38 kayno nir:
“¡Tayta Diospa jutincho shamuq rey alabashqa kaykulätsun!*
¡Tayta Dioswan alina kawashun!
¡Jana patsachöpis alabashqa kaykulätsun!”
39 Tsawraqa runakunapa chawpincho aywaq wakin *fariseukuna kayno nipäkurqan: “*Rabí, qatiräshuqnikikuna upälakärinanpaq olqüpay”.
40 Tsayno nipäkuptinmi Jesús kayno nirqan: “Noqa kaynömi nï: Paykuna upälakäriptinqa rumikunapis alabanqami”.
41 Jerusalénman chayananpaqna kaykarmi markata rikärishpan Jesús waqar 42 kayno nirqan: “¡Alimi kanman Tayta Dioswan ali kawanaykipaq kaqta kanan junaqlapis tantiyakäriptiki! ¡Tsayno kaykaptinpis manami tantiyapäkunkitsu! 43 Tsaymi nakanaykipaq kaq junaqkuna chayamunqa. Tsay junaqkunami marka murällaykikuna waqtanman alpata qotuykur chikishuqnikikuna jiruruypa atacapäkushunki. 44 Wayikunatapis juchutsirmi wamraykikunatawan wanutsishunkipaq. Manami ni juk rumilapis perqaranqanatsu. Tsayno kanqa Tayta Dios watukuykäshuptikipis mana chaskikushqaykipitami”.
Templucho rantikuqkunata Jesús qarqushqan
Mateo 21.12-17; Marcos 11.15-19; Juan 2.13-22
45 Tsaypita templu patiuman Jesús yaykuykur tsaycho rantikuykaqkunata [y rantiykaqkunata] qarqur 46 kayno nirqan: “Tayta Diospa palabrancho kaynömi qelqaraykan: ‘Wayïqa kanqa runakuna manakamänanpaqmi’.* Tsayno niykaptinpis qamkunaqa suwakunapa machayninmanmi tikratsipäkushqanki”.*
47 Nirkurnami templu patiucho waran waran Jesús yachatsirqan. Mandaq cürakuna, ley yachatsiqkuna y autoridäkunami imanöpapis Jesústa wanutsiyta munapäkurqan. 48 Itsanqa Jesús yachatsishqanta lapan runakuna kushishqa chaskikuptinmi ima ruraytapis mana kamäpakurqantsu.