Mateo
Leprawan qeshyaykaqta Jesús aliyätsishqan
8 Jirkancho yacharkatsir urämuptinmi tsaytsika runakuna Jesústa qatirparqan. 2 Tsaychömi *leprawan qeshyaykaq runa Jesúspa nawpanman qonqurpakuykur kayno nirqan: “Tayta, voluntäniki kaptinqa aliyaykatsilämay”.
3 Tsayno ruwakuptinmi Jesús yataykur kayno nirqan: “Aliyashqa kanaykitami munä”.
Tsayno niptinmi jinan höra aliyarqan. 4 Tsaypitanami Jesús kayno nirqan: “Aliyätsishqäta pitapis ama wilapankitsu. Tsaypa trukanqa cüraman ayway aliyashqaykita rikashunaykipaq. Nirkur aliyashqaykita musyapäkunanpaq Moisés qelqashqancho nishqanno ofrendaykita templuman apay”.*
Capitanpa ashmayninta Jesús aliyätsishqan
5 Capernaúm markaman Jesús chayaykuptinmi Roma soldädukunapa capitannin ruwakurqan 6 kayno nir: “Ashmaynï mana kuyukuypami pasaypa antsa wayïcho jitaraykan, tayta”.
7 Tsayno niptinmi Jesús kayno nirqan: “Aliyätsinäpaq aywashun”.
8 Tsawraqa capitán kayno nirqan: “Tayta, mana Israel runa kaykaptïqa wayïmanpis manami yaykunkimantsu. Ashmaynï aliyänanpaq kaylapita niykulay. 9 Noqapis mandamaqnïpa munayninchömi kaykä. Tsaynölami soldädükunapis munaynïcho karkaykan. Mayqanpis ‘tsaypa ayway’ niptï aywanmi y ‘shamuy’ niptï shamunmi. Tsaynölami ashmaynïpis ‘kayta ruray’ niptï ruran”.
10 Tsayno niptinmi Jesús kushikur paywan aywaykaq runakunata kayno nirqan: “Rasunpami kayno nï: Payno yärakamaq runataqa manami Israel runakunachöpis tarishqätsu. 11 Tsaymi qamkunata kayno nï: Maytsay nacionkunapitapis juntakaykurmi Tayta Dios *mandaykashqancho Abrahamwan, Isaacwan y Jacobwan jamaykur mikupäkunqapaq.* 12 Wakin runakunami itsanqa Tayta Dios mandaykashqancho kawananpaq kashqanta yarparpis yanawyaykaq tsakayman qaykushqa kanqa. Tsaychömi fiyupa waqar kiruntapis uchupäkunqapaq”.*
13 Nirkurnami capitanta Jesús kayno nirqan: “Wayikipa kutikuy. Yärakamashqaykinömi ashmayniki aliyashqana kaykan”.
Tsay hörami capitanpa ashmaynin aliyarqan.
Pedrupa suedranta Jesús aliyätsishqan
14 Tsaypita Pedrupa wayinman aywarmi Jesús tarirqan Pedrupa suedran shanapäkuy qeshyawan antsa jitaraykaqta. 15 Tsawraqa makinta yataykuptin jinan höra aliyarkur mikuyta qararqan.
Atska qeshyaqkunata Jesús aliyätsishqan
16 Patsa tsakaykaptinnami Jesúsman apapäkamurqan *supaykuna nakatsishqan atska runakunata. Tsay runakunapitami supaykunata Jesús juk shimila qarqurqan. Tsaynölami tukuy qeshyawan qeshyaykaqkunatapis aliyätsirqan. 17 Tsayno aliyätsirmi profëta Isaías kayno qelqashqanta cumplirqan:
“Paymi qeshyantsikunata apakushqa.
Paymi nanaynintsikunatapis jorqushqa”.*
Qatirayta munaqkunata Jesús tantiyatsishqan
18 Atska runakuna juntapaykuptinmi discïpulunkunata Jesús kayno nirqan: “Wak tsimpaman pasashun”.
19 *Büquiman yaykunanpaqna kaykaptinmi ley yachatsiq runa Jesústa kayno nirqan: “*Rabí, maypa aywaptikipis qatiräshaykimi”.
20 Tsayno niptinmi Jesús kayno nirqan: “Atuqkunapaqa machayninkuna kanmi. Pishqukunapapis qeshwankuna kanmi. *Runapa Tsurinpami itsanqa maycho punuykunalanpaqpis mana kantsu”.
21 Tsaypitanami juk discïpulun kayno nirqan: “Qatiränäpaq papänïtaraq puntata pampaykamushaq, tayta”.
22 Tsawraqa Jesús kayno nirqan: “Wanushkunataqa wanushqa mayinkuna pampakäritsun. Qamwanqa jukla aywashun”.
Wayrapaq y yakupaq Jesús munayniyuq kashqan
23 Tsaypitanami *büquiman Jesús witsaptin discïpulunkunapis qepanta witsäpäkurqan. 24 Qochata tsimparkaykaptinmi Jesús punukäkurqan. Tsayyaqmi fiyupa wayrawan yaku pulchaqyar büquita talpukätsinanpaqna kaykarqan. 25 Tsaymi discïpulunkuna Jesústa rikchatsir kayno nirqan: “¡Tayta, talpukaykantsinami! ¡Salvaykalämay!”
26 Tsayno niptinmi Jesús kayno nirqan: “Janan shonqula yärakuq runakuna, ¿imanirtaq mantsakärinki?”
Tsayno nirmi sharkurkur wayrata y yakuta olqüparqan. Olqüpaptinmi wayrapis yakupis chawarqan. 27 Tsayta rikarmi discïpulunkuna mantsakashqa kayno nipäkurqan: “Yakupis wayrapis tsayno cäsunanpaqqa ¡pitaq kay runaqa!”
Supaykuna löcuyätsishqan runakunata aliyätsishqan
28 Qochata tsimparkurnami Gadara nishqan partiman chayapäkurqan. Tsaychömi *supaykuna löcuyätsishqan ishkay runakuna panteonpita yarqupäkamurqan. Paykuna pasaypa mantsakuypaq kaptinmi tsaypaqa pipis mana pasaqtsu. 29 Jesústa rikärishpanmi fuertipa qaparar nipäkurqan: “¡Diospa Tsurin Jesús! ¡Imatataq noqakunawan munanki! ¿Höräkuna manaraq chayamuptinku nakatsipäkamänaykipaq shamushqanki?”
30 Paykuna kaykashqanpita mas washa läduchömi tsaytsika kuchikunata mitsirkaykarqan. 31 Tsawraqa supaykuna Jesústa ruwakärirqan kayno nir: “Kay runakunapita qarqamarqa taqay kuchikunalaman yaykunäpaq kachapaykalämay”.
32 Ruwakushqanta Jesús awniptinmi supaykuna ishkan runakunapita yarqurir tsay kuchikunaman yaykukuykurqan. Tsawraqa kuchikuna löcutar tunapa cörrikachashpan qochaman jeqakurpurqan. Tsaychömi shenqaypa wanupäkurqan.
33 Tsayta rikaykurmi kuchi mitsiqkuna warakayla markaman wilakuq aywapäkurqan. Chayaykurmi wilakärirqan löcuyashqa runakunapita supaykunata Jesús qarqushqanta y kuchikuna qochaman jeqar shenqaypa wanushqanta. 34 Tsawraqa lapan runakuna markapita aywapäkurqan Jesús kaykashqan kaqman. Chayaykurmi ruwakärirqan tsaypita aywakunanpaq.