Lucas
Jesústa yanapaq warmikuna
8 Tsaypitanami chunka ishkay discïpulunkunawan markan markan Jesús purir Tayta Dios *mandaykashqanpa ali wilakuyninta wilakurqan. 2 Paykunawanmi aywapäkurqan *supaypa munayninpita jorqushqan warmikuna y qeshyashqanpita aliyätsishqan warmikunapis. Tsaynöpis aywarqan Magdalena nipäkushqan María. Paypitami qanchis supaykunata Jesús qarqurqan. 3 Tsaynöpis aywapäkurqan Herodespa yanapaqnin Chuzapa warmin Juana, Susana y wakin warmikunapis. Paykunami Jesústa y discïpulunkunata gastunkunapaq kamariparqan.
Diospa wilakuyninta muruman Jesús tinkutsishqan
4 Maytsay markakunapita atska runakuna juntakaptinmi Jesús wilaparqan kayno nir: 5 “Juk runashi trïgu muruq aywarqan. Muruta matsiptinshi näniman wakin chayarqan. Tsaytashi runakuna jarukurqan y pishqukunapis upshakurkurqan. 6 Wakin kaq murushi shalaman chayarqan. Tsaycho jeqamurpis alpa mana kaptinshi tsakikäkurqan. 7 Wakin kaq murushi kashakuna rurinman chayarqan. Jeqarkamurpis kashakuna nitiptinshi qarwashtaykälar wanurqan. 8 Wakin kaq murunashi itsanqa ali alpaman chayarqan. Tsaykunaqa ali winarkurshi cada espïgacho pachak (100) trïguta wayurqan”.
Tsayno yacharkatsirmi Jesús qayaraypa kayno nirqan: “¡Rinriyuq kaqkunaqa nishqäkunata wiyakäritsun!”
Tinkutsiypa imanir Jesús yachatsishqan
Mateo 13.10-15; Marcos 4.10-12
9 Tsaypitanami discïpulunkuna Jesústa tapurqan kayno nir: “Tayta, ¿ima ninantaq tsay tinkutsiypa yachatsishqayki?”
10 Tsawraqa Jesús kayno nirqan: “Qamkunataqa Tayta Dios *mandaykashqan imano kashqantapis shumaqmi tantiyatsishayki. Wakin runakunatami itsanqa imamanpis tinkutsiypa wilapaykä. Tsaymi rikaykarpis cuentata qokärintsu y wiyaykarpis tantiyapäkuntsu”.*
Muruman tinkutsishqanta Jesús tantiyatsishqan
Mateo 13.18-23; Marcos 4.13-20
11 “Tinkutsiypa wilapashqäta kanan tantiyatsishayki. Trïgu muruqa kaykan Tayta Diospa wilakuyninmi.
12 “Wakin runakunaqa chukru näninömi kaykan. Tayta Diospa wilakuyninta mayaptinpis diablu shamurmi wiyashqalantapis qonqaykatsin. Tsaymi mana criyishpan salvakärintsu.
13 “Wakin runakunaqa shalanömi kaykan. Tsaymi Tayta Diospa wilakuyninta mayar kushishqa chaskikurpis shumaq mana sapitsashqa yörano kar nakaykuna chayaptin qepaman kutikärin.
14 “Wakin runakunaqa kasha kasha chakranömi kaykan. Tsaymi Tayta Diospa wilakuyninta mayarpis yarpachakärin imanöpis kawanalanpaq, rïcu kanalanpaq y kikinkuna munashqanno kawanalanpaq. Tsayno karmi mana wayuq trïguno karkaykan.
15 “Wakin runakunami itsanqa ali alpano kaykan. Tsaymi Tayta Diospa wilakuyninta lapan shonqunwan kushishqa chaskikur Tayta Dios munashqanno kawapäkun. Ali alpacho muru winarkamur shumaq wayushqannömi imaypis kawapäkun”.
Wilakuyninta atskiman Jesús tinkutsishqan
16 “Manami pipis atskita ratarkatsir manka rurinman ni kawitu rurinman churantsu, sinöqa wayiman yaykuqkuna rikapäkunanpaq alayrinninmanmi churan.* 17 Tsaynömi yachatsishqäkuna kanan pakaraykaqno karpis musyakanqapaq. Kanan mana tantiyakarpis wara warantinkunaqa tantiyakanqami.* 18 Tsayno kaptinqa shumaq mayapäkamay. Yachatsishqäta cäsukuqkunaqa masmi tantiyakärinqa. Mana cäsukuqkunami itsanqa tantiyashqalantapis qonqaykärinqa”.*
Jesúspa maman y wawqinkuna pï kashqanpis
Mateo 12.46-50; Marcos 3.31-35
19 Tsaypitami Jesúspa maman y wawqinkuna chayarqan Jesús kaykashqan wayiman. Atska runakuna kaptinmi yaykuyta mana kamäpakurqantsu. 20 Tsaymi juk runa Jesústa wilarqan kayno nir: “Mamayki y wawqikikunami punkucho shuyarpaykäshunki”.
21 Tsayno niptinmi Jesús kayno nirqan: “Pipis Tayta Diospa wilakuyninta wiyar cäsukuq kaqmi mamäqa y wawqïkunaqa karkaykan”.
Wayrapaqpis yakupaqpis Jesús munayniyuq kashqan
22 Juk junaqmi discïpulunkunawan *büquiman witsarkur Jesús kayno nirqan: “Wak tsimpaman pasashun”.
Tsayno niptinmi büquiwan aywapäkurqan. 23 Qochata tsimparkaykaptinmi Jesús punukäkurqan. Tsayyaqmi fiyupa wayrawan yaku pulchaqyar büquita talpukätsinanpaqna kaykarqan. 24 Tsaymi Jesústa rikchatsir kayno nipäkurqan: “¡*Rabí, rabí! ¡Talpukaykantsinami!”
Tsawraqa Jesús sharkurkur wayrata y yakuta olqüparqan. Olqüpaptinmi wayrapis yakupis chawarqan. 25 Tsaypitanami discïpulunkunata kayno nirqan: “¿Imanirtaq yärakuynikikuna kantsu?”
Tsawraqa mantsakashqa kikinpura kayno nipäkurqan: “Yakupis wayrapis tsayno cäsunanpaqqa ¡pitaq kay runaqa!”
Supaykuna löcuyätsishqan runata Jesús aliyätsishqan
26 Tsaypita Gerasa* nishqan partiman chayapäkurqan. Tsayqa kaykan Galileapa tsimpanchömi. 27 *Büquipita Jesús urarpuptinmi *supaykuna löcuyätsishqan runa shamurqan. Tsay runaqa nawpapita patsami qarapächula purikurqan. Wayicho tänanpa trukanqa panteonlachömi tarqanpis. 28 Jesústa rikaykurmi fiyupa qaparashpan nawpanman lätakuykur fuertipa kayno nirqan: “¡Munayniyuq Diospa Tsurin Jesús! ¡Imatataq noqawan munanki! ¡Ama nakaykatsilämaytsu!”
29 (Tsayno supay nirqan runapita yarqunanpaq Jesús nishqa kaptinmi. Tsay runataqa atska kutimi munashqanta supay ruratsirqan. Tsaymi makipita y chakipita cadinawan watapäkuptinpis rachirir chunyaq jirkakunaman aywakuq.)
30 Tsaypitami Jesús kayno tapurqan: “¿Imataq jutiki?”
Tapuptinmi kayno nirqan: “Legión”.*
(Tsayno nirqan atska supaykuna payman yaykushqa kaptinmi.)
31 Tsay supaykunami Jesústa yaparir yaparir ruwakärirqan yanawyaykaq tsakayman mana qarpunanpaq. 32 Washa lädu jirkanchömi tsaytsika kuchikunata mitsirkaykarqan. Tsaymi supaykuna Jesústa ruwakärirqan kuchikunaman yaykapäkunanpaq. Ruwakushqanta Jesús awniptinmi 33 supaykuna runapita yarqurir tsay kuchikunaman yaykukuykurqan. Tsawraqa kuchikuna löcutar tunapa cörrikachashpan qochaman jeqakurpurqan. Tsaychömi shenqaypa wanupäkurqan.
34 Tsayta rikaykurmi kuchi mitsiqkuna warakayla aywapäkurqan markacho y cercancho taq runakunata wilapäkunanpaq. 35 Wilaptinmi runakuna shapäkamurqan ima pasashqantapis rikananpaq. Jesús kaykashqanman chayashpanmi tsay löcuyashqa runata taripäkurqan röpan jatishqana y yarpayninchöna Jesúspa nawpancho jamaraykaqta. Tsayta rikaykurmi mantsakashqa rikakärirqan.
36 Jesús aliyätsishqanta rikaqkunanami tsayman chayaqkunata wilarqan imanöpa aliyashqantapis. 37 Tsaymi tsay particho taq runakuna pasaypa mantsakashpan Jesústa ruwakärirqan tsaypita aywakunanpaq. Tsawraqa *büquiman witsarkur discïpulunkunawan Jesús aywakurqan.
38 Manaraq aywakuptinmi aliyaq runa Jesústa ruwakurqan paywan aywakunanpaq. Tsawraqa Jesús kayno nirqan: 39 “Wayikipa kutiykur Tayta Dios aliyätsishushqaykita wilakuy”.
Tsayno niptinmi aywar Jesús aliyätsishqanta pïmaytapis wilaparqan.
Jairupa tsurinta kawaritsimushqan y warmita aliyätsishqan
40 Qocha wak tsimpanman Jesús kutiptinmi shuyarpaykaq atska runakuna kushishqa chaskikärirqan. 41 Tsaymanmi chayarqan *sinagögacho mandaq Jairo jutiyuq runa. Paymi Jesúspa nawpanman qonqurpakuykur ruwakurqan wamranta aliyätsiq wayinman aywananpaq. 42 Tsay tsurinqa chunka ishkay watayuqno juklayla warmi tsurinmi karqan. Paymi pasaypa antsa qeshyaykarqan.
Jairupa wayinman Jesús aywaptinmi tsaytsika runakuna kichkiyparaq qatirparqan. 43 Tsay runakunawanmi chunka ishkay watana yawar apaywan qeshyaykaq warmipis aywaykarqan. [Jampikunanpaqmi imaykantapis rantikur usharqan.] Manami ni pï jampiptinpis aliyarqantsu. 44 Tsay warmi Jesúspa qepalanpa yaykuykur röpanpa kuchunta yataykuptinmi jinan höra yawar apaynin chawarqan. 45 Tsawraqa Jesús kayno nirqan: “¿Pitaq yataykamashqa?”
Niptinmi lapanpis kayno nirqan: “Manami noqa yatashqätsu”.
Tsawraqa Pedro kayno nirqan: “Kichkimi aywaykantsi, tayta. [¿Imanöparaq musyapäküman mayqan yataykushushqaykitapis?]”
46 Tsayno niptinpis Jesús yapay nirqan: “Pï karpis yatamashqami. Munaynï yarqushqantami mayashqä”.
47 Yatashqanta tantiyaptinmi tsay warmi mantsakashqa siksikyaykar Jesúspa nawpanman qonqurpakuykurqan. Nirkurmi lapan runakunapa nawpancho wilarqan imanir yataykushqanta y jinan höra aliyashqanta. 48 Tsawraqa Jesús kayno nirqan: “Yärakamashqaykipitami aliyashqanki, hïja. Kananqa kushishqana aywakuy”.
49 Jesús tsayno parlaykaptinraqmi Jairupa wayinpita wilakuq taripaykur kayno nirqan: “Tayta, tsuriki wanushqanami. Jesústa amana pushaynatsu”.
50 Tsayno niqta mayaykurmi Jesús kayno nirqan: “Ama lakikuytsu. Tayta Diosman yärakuy. Tsurikiqa kawarimunqami”.
51 Wayiman chayaykurnami Jesús yaykatsirqan Pedruta, Juanta, Santiaguta y Jairutapis warmintinta. Wakin kaq runakuna yaykunantaqa manami munarqantsu. 52 Wamra wanushqa kaptinmi waqtacho runakuna fiyupa waqarkaykarqan. Tsawraqa Jesús kayno nirqan: “Ama waqapäkuytsu. Manami wanushqatsu, sinöqa punuykanlami”.
53 Tsayno niptinmi wanushqa kaykashqanta musyar runakuna Jesústa asiparqan. 54 Tsaypitanami wanushqa kaykaqpa makinpita tsarirkur Jesús kayno nirqan: “¡Wamra, sharkuy!”
55 Tsayno niptin jinan höra kawarirkamur sharkurqan. Tsawraqa Jesús kayno nirqan: “Kay wamrata mikuyta qaray”.
56 Wamra kawarimushqanta rikaykur maman y taytan pasaypa kushikärirqan. Itsanqa kawaritsimushqanta pitapis wilapänanta Jesús manami munarqantsu.