Salmos

33 Ali shonquyuqkuna, TAYTA DIOSTA alabapäkuy.

Payta alabashqaykiqa kushikuypaqmi kaykan.

 2 Chunka cuerdayuq arpata tukapaylapa TAYTA DIOSTA alabapäkuy.

*Salteriuta tukapaylapa alabapäkuy.

 3 Mushuq alabanzawan alabapäkuy.

Arpata shumaq tukar kushishqa cantapäkuy.

 4 TAYTA DIOSQA rasun kaqlatami lapanta parlan.

Rurashqankunata rikarmi tantiyakuntsi promitishqanta cumpliq kashqanta.

 5 Pay munashqanno kawaqkunataqa TAYTA DIOS kuyanmi.

Kuyapäkuq karmi maytsaychöpis runakunata yanapaykan.

 6 TAYTA DIOS niptilanmi jana patsapis rurakarqan.

Mandaptilanmi intipis, killapis y qoylarkunapis yurirqan.

 7 Lamartapis juk patsalamanmi shuntarqan.

Wanwanyaykaq uchkukunamanmi winarqan.*

 8 Maytsaychöpis taqkuna, TAYTA DIOSTA *mantsakäriy.

Intëru munducho taq runakuna, payta adorapäkuy.

 9 Pay niptilanmi kay patsapis y jana patsapis rurakarqan.

Mandaptilanmi lapanpis rikakarqan.

10 Mana alita rurananpaq wilanakuptinpis TAYTA DIOSMI tsapata churapan.

11 Kikin yarpashqantaqa imaypis kamakätsinmi.

12 Israel runakunatami TAYTA DIOS akrarqan herencian kananpaq.

Payman yärakurmi kushishqa kawapäkun.*

13 Jana patsapitami TAYTA DIOS pïmaytapis rikaykämun.

14 Tashqanpita patsami kay patsacho kaqkunata rikaykämun.

15 Paymi lapan runapa shonquntapis kamashqa.

Paymi runa imata rurashqantapis rikaykämun.

16 Reyqa manami atska soldäduyuq kashqanpitatsu guërracho vincin.

Manami ali chölu soldäduyuq kashqanpitatsu contrankunapita salvakun.

17 Manami ali cawalluyuq kashqanpitatsu pelyacho vincin.

Mayjina ali cawalluyuq karpis manami contrankunapita salvakuntsu.*

18 TAYTA DIOSMI payta mantsakuqkunata imaykapitapis tsapan.

Kuyakuq kashpanmi payman yärakuqkunata yanapan.

19 Paykunatami wanuypita salvan.

Muchuy kaptinpis mikuyta kamaripanmi.

20 Noqantsiqa TAYTA DIOSMANMI yärakuntsi.

Paymi yanapamantsi y escüduno tsapämantsi.

21 Payman yärakuptintsiqa shonquntsipis kushikunmi.

22 Noqakunata imaypis kuyapaykalämay, TAYTA DIOS.

Qamlamanmi yärakärimü.