Marcos
Chusku waranqa runakuna mikunanpaq milagruta Jesús rurashqan
8 Tsay junaqkunami atska runakuna Jesús kaqman yapay juntakarqan. Imapis mikunanpaq mana kaptinmi discïpulunkunata qayaykur Jesús kayno nirqan: 2 “Kay runakunata pasaypami kuyapä. Kimsa junaqnami mikuytapis mana yawaypa noqantsiwan karkaykan. 3 Wakinqa karu markapitami shamushqa. Mikünilata aywakärinanpaq niptïqa wayinkunamanpis manaraq chayaptinchari nänikunacho bëta tsarinqa”.
4 Tsayno niptinmi discïpulunkuna kayno nipäkurqan: “Kay chunyaq jirkachöqa ¿maychöraq mikuyta tariykushun kaytsika runakunapaq?”
5 Niptinmi Jesús kayno tapurqan: “¿Aykalataq tantayki kaykan?”
“Qanchislami, tayta” nipäkurqan.
6 Tsawraqa runakuna jamakärinanpaq Jesús nirqan. Jamakäriptinnami qanchis tantata aptarkur Tayta Diosta manakur yusulpalä nirqan. Nirkurnami pakirir discïpulunkunata makyarqan aypukärinanpaq. 7 Tsaynölami juk ishkay akapala pescädutapis Jesúsman apaparqan. Tsaykunatapis aptarkurmi Tayta Diosta agradëcikur discïpulunkunata makyarqan runakunata aypupäkunanpaq. 8 Tsaymi lapan mikupäkurqan saksashqanyaq. Putsushqankunatanami discïpulunkuna shuntapäkurqan qanchis canasta juntata. 9 Tsaycho mikuqkuna karqan chusku waranqanömi (4,000).
Mikuyta usharkuptinnami runakunata Jesús despacharqan. 10 Tsaypitanami *büquiman witsarkur discïpulunkunawan aywakurqan Dalmanuta nishqanman.
Milagrutaraq rikayta munashqan
11 Chayaykuptinmi *fariseukuna manakaqman churayta munar Jesústa kayno nipäkurqan: “Tayta Dios rasunpa kachamushushqaykita musyapäkunäpaq ima milagrutapis ruray, tayta”.*
12 Tsayno niptinmi Jesús lakikushpan kayno nirqan: “¿Imanirtaq kanan witsan runakuna munarkaykan milagrutaraq ruranäta?* Rasunpami kayno nï: Qamkuna munashqaykinöqa manami ima milagrutapis rurashaqtsu”.
13 Tsayno nirkurmi runakunata tsaycho kachariykur *büquiman witsarkushpan discïpulunkunawan wak tsimpaman aywakurqan.
Fariseukuna mana criyishqanta levadüraman Jesús tinkutsishqan
14 Jesúspa discïpulunkuna mirkapankunata apayta qonqashqa karmi *büquicho juk tantalata tsararpaykarqan. 15 Tsimparkaykaptinmi Jesús kayno nirqan: “*Fariseukunapa y Herodespa levadüranta cuidädu chaskipäkunkiman”.*
16 Tsayno niptinmi discïpulunkuna kikinpura kayno ninakurqan: “Tantata mana mirkapakamushqantsipitami tsayno niykämantsi”.
17 Tsayno parlaykashqanta tantiyarmi Jesús kayno nirqan: “¿Imanirtaq parlarkaykanki tantata mana apamushqaykipita? ¿Manaku tantiyapäkunki imapita parlaykashqätapis? ¿Juiciuykikuna oqrashqaku karkaykanki? 18 Nawiyuq kaykarpis ¿manaku rikapäkunki?* Rinriyuq kaykarpis ¿manaku mayapäkunki? ¿Manaku yarpapäkunki? 19 Pitsqa tantalapita pitsqa waranqa (5,000) runakuna mikunanpaq milagruta rurashqäpita putsuqta ¿ayka canastatataq shuntapäkurqayki?”
“Chunka ishkaytami, tayta” nipäkurqan.
20 “Tsaynöpis qanchis tantalapita chusku waranqa (4,000) runakuna mikunanpaq milagruta ruraptï putsuqta ¿ayka canastatataq shuntapäkurqayki?”
“Qanchistami, tayta” nipäkurqan.
21 Tsaymi Jesús nirqan: “Tsayta rikaykarpis ¿manaku tantiyapäkunki?”
Betsaidacho qapra runata Jesús aliyätsishqan
22 Tsaypitanami chayarqan Betsaida markaman. Tsaycho kaykaptinmi qapra runata pushaykur Jesústa ruwakärirqan aliyätsinanpaq. 23 Tsaymi makipita janchakurkur markapita juk läduman Jesús jorqurqan. Tsaychömi qaprapa nawinman toqapaykur yataykushpan tapurqan kayno nir: “¿Rikankinaku?”
24 Tsaymi rikachakurir kayno nirqan: “Yörakunatanömi runakunata rikaykä. Itsanqa purirkaykanmi”.
25 Tsaymi nawinta yapay yataykuptin lapanta shumaq rikarqan. 26 Tsayno aliyarkatsirmi Jesús kayno nirqan: “Markaman mana chayaylapa [ni pitapis mana wilapaylapa] wayikiman kutikuy”.
Jesúsqa Cristo kashqanta Pedro nishqan
27 Tsaypitanami discïpulunkunawan Jesús aywarqan Cesarea de Filipupa caseriunkunaman. Aywarkaykashqanchömi discïpulunkunata tapurqan kayno nir: “¿Pï kashqätataq runakuna nirkaykan?”
28 Tsawraqa discïpulunkuna nipäkurqan: “Wakin nipäkun Bautizaq Juan kashqaykita. Wakinnami nipäkun profëta Elías kashqaykita. Y wakinnami nipäkun mayqan profëtapis kashqaykita”.*
29 Nipäkuptinmi yapay tapurqan: “Qamkunaqa ¿pï kashqätataq yarpapäkunki?”
Tsawraqa Pedro kayno nirqan: “Qamqa Tayta Dios kachamushqan Cristumi kaykanki”.*
30 Tsayno niptinmi discïpulunkunata Jesús nirqan pitapis mana wilapänanpaq.*
Wanunanpaq kashqanta Jesús wilakushqan
31 Tsaypitanami discïpulunkunata Jesús wilaparqan kayno nir: “*Runapa Tsurintami pasaypa nakatsipäkunqa. Mayor runakuna, mandaq cürakuna y ley yachatsiqkunami contran sharkur wanutsipäkunqa. Tsaypita kimsa junaqtaqa kawarimunqami”.
32 Tsaytaqa Jesús mana tumatsipaylapami nirqan. Tsayno niptinmi juk läduman qayaykur Pedro olqüparqan. 33 Tsaymi discïpulunkunaman Jesús tikraykur Pedruta kayno nirqan: “¡Nawpäpita witikuy, *Satanás! Qam manami munankitsu Tayta Dios munashqanta ruranäta, sinöqa runa munashqanta ruranätami munaykanki”.
34 Nirkurmi discïpulunkunata y runakunata qayaykur Jesús kayno nirqan: “Pipis discïpulü kayta munarqa kikin munashqanno ama kawatsuntsu, sinöqa cruzninta apaqno noqata qatirämätsun.* * 35 Kawayninta salvayta munaqkunaqa kawayninta oqranqami. Kawayninta noqa rayku y ali wilakuynï rayku oqraqkunami itsanqa kawayninta salvanqa.* *
36 “Infiernuman qaykushqa kananpaq kaptinqa ¿imapaqtaq välin intëru munduta munaynincho tsararashqanpis? 37 Mayjina rïcu karpis manami rïcu kashqanwanqa salvacionta rantinqatsu. 38 Jutsasapa runakunapa nawpancho pipis noqapita y wilakuynïpita penqakuptinqa Runapa Tsurinpis Tayta Diospa munayninwan y *santu *angilninkunawan shamurmi paypita penqakunqa”.