Marcos

Wanushqanpita Jesús kawarimushqan

Mateo 28.1-8; Lucas 24.1-12; Juan 20.1-10

16 Jamay junaq pasarkuptinnami María Magdalena, Santiagupa maman María y Salomépis ali asyaq* jachakunata rantipäkurqan Jesúspa ayanman winapänanpaq. 2 Tsawraqa domingu tuta inti jeqaykämuptin Jesús pamparashqanman aywapäkurqan. 3 Nänita aywarmi kayno nipäkurqan: “¿Piraq sepultüra tsaparaq rumita kichapämäshun?”

4 Chayaykurmi taripäkurqan sepultüra tsaparaq jatunkaray rumi wititsishqana kaykaqta. 5 Tsawraqa aya tsutarashqanman yaykuykurmi rikapäkurqan juk mözu yoraq röpan jatishqa alawqa kaq nawpancho jamaraykaqta. Payta rikaykurmi pasaypa mantsakashqa rikakärirqan. 6 Tsawraqa tsay mözu kayno nirqan: “Ama mantsakäriytsu. Musyämi crucificaypa wanutsishqan Jesústa rikaq shapäkamushqaykita. Payqa manami kaychönatsu. ¡Kawarimushqanami! Maski rikapäkuy mayman tsutashqantapis.

7 “Kananqa aywar Pedruta y wakin discïpulukunata wilapäkuy Galileaman nawpaykashqanta. Nawpata nishqannölami tsaycho paykunawan tinkunqa”.*

8 Tsayno niptinmi warmikuna mantsakashqa siksikyaykar jukla aywakärirqan. Mantsakashpanmi rikashqankunata pitapis mana wilaparqantsu.

María Magdalenata Jesús yuripashqan

Mateo 28.9-10; Juan 20.11-18

9 [Domingu tuta Jesús kawarirkamurmi puntata yuriparqan María Magdalenata. Paypitami nawpata qanchis *supaykunata qarqushqa karqan. 10 Yuriparkuptinmi María Magdalena aywarqan Jesúswan puriqkunata wilananpaq. Chayaykurmi tarirqan lakikur waqarkaykaqta. 11 “Jesústa kawaykaqtami rikashqä” nir wilaptinpis manami criyipäkurqantsu.

Ishkay discïpulunkunata Jesús yuripashqan

Lucas 24.13-35

12 Tsaypitanami markapita aywarkaykaptin ishkay discïpulunkunata Jesús yuriparqan. Itsanqa manami nawpata kashqannönatsu karqan. 13 Tsaypita kutiykurmi discïpulu mayinkunata wilapäkurqan Jesús yuripashqanta. Wilaptin paykunatapis manami criyipäkurqantsu.

Wilakunanpaq discïpulunkunata Jesús kachashqan

Mateo 28.16-20; Lucas 24.36-49; Juan 20.19-23; Hechos 1.6-8

14 Tsaypitanami chunka juk discïpulunkuna mikurkaykaptin Jesús yuriparkur kayno nirqan: “Yärakuyniynaq chukru shonqu runakuna, kawarimushqäta wilashuptiki ¿imanirtaq mana criyipäkushqankitsu?”

15 Tsaynöpis kayno nirqan: “Maytsaypapis aywar lapan runakunata ali wilakuynïta wilapäkunki.* 16 Mayqanpis criyir *bautizakuq kaqqa salvashqami kanqa. Mana criyiqkunami itsanqa infiernuman qaykushqa kanqa. 17 Criyiqkunaqa milagrukunatapis rurapäkunqami. Jutïchömi *supaykunatapis qarqapäkunqa y juk idiömakunatapis parlapäkunqa. 18 Culebra picaptinpis, venënuta qaraptinpis manami wanupäkunqatsu. Tsaynölami qeshyaykaqkunata yataykur Tayta Diosta manakuptinpis aliyanqa”.

Jana patsaman Jesús kutishqan

Lucas 24.50-53; Hechos 1.9-11

19 Discïpulunkunata parlapayta usharkuptinmi Señor Jesústa gloriamanna Tayta Dios shuntakurqan.* Tsaychömi Tayta Diospa alawqa kaq lädunman jamaykurqan. 20 Tsaypitanami discïpulunkuna maytsaychöpis wilakärirqan. Kikin Señornintsimi yanaparqan milagrukunata rurapäkunanpaq. Tsayta rikarmi runakuna tantiyakärirqan tsay wilakärishqan rasunpa kashqanta. Amén.]*