Bibliapita INTERNETCHO PUBLICACIUNNINCHICUNA

INTERNETCHO PUBLICACIUNNINCHICUNA

Quechua de Huánuco (Huallaga)

Apocalipsis 15
Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Apocalipsis 15:1

*
ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).

Angilkunaqa (1) Tayta Dios nishqankunata wilakärin (Gén. 18.16–19.29; Dan. 8.15-17; 9.21-23; Mat. 1.20-24; Luc. 1.11-20, 26-38), (2) Tayta Diospa favornin pelyapäkun (2Rey. 6.15-17; Dan. 10.13-14; Apoc. 12.7-9) y (3) Diosman yärakuqkunata tsapan y yanapan (Sal. 91.11-12; Heb. 1.14).

Satanáspa angilninkunaqa supaykunami karkaykan (Mat. 25.41; Apoc. 9.11).

Apocalipsis 15:2

*
anticristo Anticristuqa Jesucristupa contran runami kaykan. Tsay runami Señor Jesucristo kutimunanpaqna kaptin yurimunqa. Nirkurmi runakunata lulapar kayno ninqa: “Noqami Cristo kaykä”. Milagrukunatapis rurarmi Jesucristuman yärakuqkunata engañanqa. Jesucristo kutimurnami azufriwan talushqa nina rupaykaq qochaman anticristuta qaykunqa (Mat. 24.4-5; Mar. 13.5-6; Luc. 21.8; 2Tes. 2.8-10; Apoc. 13.2; 13.13-14; 16.13; 19.20).

Shamunanpaq kaq anticristunömi Jesucristupa contran kaqkunapis anticristukuna karkaykan (1Juan 2.18; 4.3; 2Juan 7).
*
nümeru, runapa jutinpa nümerun Bibliata qelqashqan witsanqa nümerukunata qelqananpa trukanqa letrakunalatami qelqapäkuq. Tsaymi 1-ta qelqananpa trukanqa “a” letrata qelqapäkuq. 2-ta qelqananpaqqa “b” letratana qelqapäkuq. Tsaynölami wakin nümerukunatapis qelqapäkuq. Tsaymi cada letrapa nümerun karqan. Tsayta tantiyanaykipaqmi cuadrucho qelqaraykan. Manami castellänu letrankunawantsu Mushuq Testamentuta qelqapäkurqan, sinöqa griego letrakunawanmi. Tsaymi cuadrucho griego letrakunawan qelqaränanpa trukanqa castellänu letrakunawan qelqaraykan. 90-paq y 900-paq griëgucho letra kaptinpis tsay letrakunapa trukan castellänu letracho manami kantsu. Tsaymi 90-pa y 900-pa cuadrunkunacho imapis mana qelqarantsu.

1 A 60 X

2 B 70 O

3 G 80 P

4 D 90

5 E 100 R

6 F 200 S

7 Z 300 T

8 H 400 Y

9 TH 500 PH

10 I 600 X

20 K 700 PS

30 L 800 Ō

40 M 900

50 N 1000 /A

Tsaynöpis runapa jutinpa nümerunpis karqanmi. Jutinpa nümerunta musyananpaqqa cada letrapa nümerunta apuntarkurmi sumapäkuq. Tsay sumashqanmi karqan jutinpa nümerun. Jesucristupa jutinpa nümerunqa 888-mi kaykan. Paypa jutinqa griëgucho qelqaraykan IHSOYS-mi. Tsaymi jutinpa nümerunta jorquntsi kayno: I10. H8. S200. O70. Y400. S200. Tsaymi 10820070400200888. Apocalipsis 13.17-18-chömi parlaykan anticristupa jutinpa nümerunpaq. Tsay nümerunqa kaykan soqta pachak soqta chunka soqtami (666).

Apocalipsis 15:3

*
15.3 Éxo. 15.1-18.
*
15.3 Wakin griego copiakunachöqa lapan nacionkunapa mandaqnin rey ninanpa trukan imayyaqpis mandaq rey ninmi. Wakin latín traduccionchönami yärakuqkunapa mandaqnin rey nin.

Apocalipsis 15:4

*
mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).

Tayta Diosta mantsakunantsipaq yachakuntsi (Deut. 4.10; 14.23; 17.19; Sal. 34.11). Tayta Diosta mantsakuq runaqa yachaq y tantiyakuqmi kaykan (Job 28.28; Sal. 111.10; Prov. 1.7).

Mushuq Testamentuchöpis Tayta Diosta mantsakunantsipaq kashqanpitami parlan. Tsaychömi niykan payta mantsakuqkunata Tayta Dios kuyapashqanta (Luc. 1.50; Hech. 10.35) y Tayta Diosta mantsakur pay munashqanno kawashqantsita (2Cor. 7.1; 1Ped. 1.17; 2.17). Tsaynöpis niykan Tayta Diosta mantsakuqkuna premiuta chaskinanpaq kashqanta (Apoc. 11.18).

Itsanqa Jesucristuta chaskikur jutsata rurashqantsipita perdonashqana kaykantsi (Rom. 3.23-25; 1Juan 1.9). Tsaymi musyantsi Tayta Dios manana castigamänantsipaq kashqanta (1Juan 4.18) y payta mana mantsakuypa manakunantsipaq kashqanta (Rom. 8.15; Efe. 3.12).
*
15.4a Jer. 10.7.
*
santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).

Runakuna santu kashqanta nirqa Tayta Dios akrashqan runakuna kashqanta (Deut. 7.6) y pay munashqanno jutsaynaq kawashqantami niykan (Lev. 20.7-8).

Sitiukuna y manëjukuna Tayta Diospaq kaptinqa sagrädu kashqantami niykan. Tsaymi Israel nacionpis (Zac. 2.12), Jerusalén markapis (Isa. 48.2) y templupis (Sal. 68.5) sagrädu kaykan. Tsaynölami jamay junaqpis (Éxo. 31.14) y fiestakunapis (Lev. 23.2) sagrädu kaykan.
*
15.4b Sal. 86.9.

Apocalipsis 15:5

*
Pactu Toldu Pactu Tolduqa Tayta Dioswan Tinkuna Toldumi karqan. Tsayno jutin karqan Israel runakunawan pactuta rurar paykunawan imaypis kananpaq Tayta Dios promitishqa kaptinmi. Tsay tolducho Tayta Dios kaptinmi Pactu Toldu kashqanta y Tayta Dioswan Tinkuna Toldu kashqanta nipäkurqan (Éxo. 38.21; Núm. 1.50; 2Crón. 24.6; Hech. 7.44; Apoc. 15.5). Tsaynöla Tinkuna Toldupita tantiyatsikuyta liyinki.

Apocalipsis 15:8

*
15.8 Éxo. 40.34; 1Rey. 8.10-11; 2Crón. 5.13-14; Isa. 6.4.

Tayta Diospa wilakuynin (Las sagradas escrituras en el quechua de Margos-Yarowilca-Lauricocha Huánuco)

Apocalipsis 15:1-8

Apocalipsis

Qanchis angilkuna runakunata nakatsinanpaq nishqan

15 Tsaypitanami jana patsacho rikarqä juk mantsakuypa señalta. Tsay señal karqan castïgukunata apamuq qanchis *angilkunami. Tsay angilkunawan castigatsiptinmi Tayta Diospa rabyakuynin pasanqapaq.

2 Tsaynöpis rikarqä ninawan talushqa vidriuno lamarta. Tsay lamar jananchömi Tayta Diosman yärakuqkuna arpankuna aptashqa ichirpaykarqan. Tsay arpakunataqa Tayta Diospitami chaskipäkurqan. Paykunaqa manami *anticristuta chaskikärirqantsu, ni ïdulunta adorapäkurqantsu ni jutinpa *nümeruntapis churakärirqantsu. 3 Tayta Diospa sirviqnin Moisés cantashqanta* y Carnish cantashqanta cantarmi kayno nipäkurqan:

“Lapanpaq munayniyuq Tayta Dios,

qam rurashqaykikuna pasaypa alimi.

Lapan nacionkunapa mandaqnin rey,*

ali kaqlatami imaypis ruranki.

Nishqaykitaqa imaypis cumplinkimi.

4 ¿Piraq mana *mantsakushunkimantsu?*

¿Piraq mana alabashunkimantsu?

Qam japalaykimi *santu kaykanki.

Runakunata rurashqanman tupu juzgashqaykitaqa pïmaypis musyanmi.

Tsaymi lapan nación runakunapis nawpaykiman shamur adorapäkushunki”.*

5 Tsaypitanami rikarqä jana patsacho kaq *Pactu Tolducho Lugar Santïsimu kicharaykämuqta. 6 Tsaypitami yarqupäkamurqan castïgukunata apamuq qanchis angilkuna. Paykunaqa lïnupita rurashqa chipchipyaykaq limpiu röpan jatishqami karqan. Pëchunkunachömi qoripita rurashqa wachkuwan wachkararqan.

7 Tsaymi Tayta Diospa trönuncho kaykaq chusku kawaykaqkunapita juk yarqamurqan. Paymi qanchis angilkunata aypurqan qoripita rurashqa cöpata. Tsay cöpakunachömi imayyaqpis kawaq Tayta Diospa rabyaynin junta winaraykarqan. 8 Tsawraqa jana patsacho kaq templuman Tayta Diospa chipchipyaynin juntaptinmi qoshtaypis juntarqan.* Qanchis castïgukunata angilkuna jichamuyta ushananyaq tsay templuman manami pipis yaykuyta kamäpakurqantsu.