Salmos
Chikiqninkunata juzgananpaq Tayta Diosta manakushqan
(1) Cantaqkunapa mandaqninpaqmi. David qelqashqan salmu.
109 (1b) Tayta Dios, qamtami alabaykä.
Manakamushqäta mayaykalämay.
2 Lula runakunami y fiyu runakunami wasäta rimarkaykan.
Manakaqkunatami jitapaykäman.
3 Toscu shimipami imatapis nipäkaman.
Achäquita mana ashipaykaptïpis conträmi sharkapäkun.
4 Kuyaykaptïpis chikipäkaman.
Tsaymi qamta imaypis manakamü.
5 Yanapaykaptïpis conträmi sharkushqa.
Kuyaykaptïpis chikirkaykäman.
6 Chikimaqnïta juzgananpaq mana ali runata churaykulay.
Kikinpa abogädulan tikrapätsun.
7 Demandakuptinpis kikin jutsayuq kashqanta nitsun.
Shimilan kikinta condenatsun.
8 Manaraqpis aykäta wanutsun.
Pay rurananpaq kaqta jukna ruratsun.*
9 Tsurinkunapis waktsa quëdatsun.
Warminpis viüda quëdatsun.
10 Tsurinkuna caridäta manakur puritsun.
Juchutsishqa wayinkunapita mikuyta ashinanpaq karupa aywapäkutsun.
11 Prestaqkuna imaykantapis prenda apakäritsun.
Nakar arushqantapis jäpa runakuna qechurir apakäritsun.
12 Paytapis y waktsa quëdaq tsurinkunatapis pipis ama kuyapätsuntsu.
13 Paypita miraqkunapis lapan ushakätsun.
Tsay apellïduqa elqätsunna.
14 Taytan mana alita rurashqanta TAYTA DIOS ama perdonatsuntsu.
Maman jutsata rurashqantapis ama perdonatsuntsu.
15 Jutsa rurapäkushqanta TAYTA DIOS imaypis ama qonqatsuntsu.
Kay patsachöqa jutintapis runakuna amana yarpätsuntsu.
16 Tsay runaqa manami kuyapäkuytapis yachashqatsu.
Pobrikunata, humildikunata y lakikuycho kawaqkunatapis wanutsinanyaqmi qatikachashqa.
17 Maldicionakuq kashqanpita kikinman maldición chayatsun.
Runa mayinpaq bendición kananta mana munashqanpita kikinpaqpis bendición ama katsuntsu.
18 Lapan rurashqanpis maldicionashqa katsun.
Maldicionqa pachanmanpis yakuno yaykutsun.
Tulunmanpis aceitino chayatsun.
19 Maldicionashqa imaypis kawatsun.
Aläpa chanaq watashqa wachkuno imaypis nakatsitsun.
20 Chikimaqnïkunata y wasä rimaqkunata TAYTA DIOS tsayno castigatsun.
21 TAYTA DIOS, kuyakuq kashqaykita pïmaypis tantiyananpaq yanapaykalämay.
Kuyapäkuq kashpayki salvaykalämay.
22 Noqaqa lakishqa karmi ima ruraytapis mana kamäpakütsu.
Shonqüpis lakikuypitami fiyupa nanaykan.
23 Lantuy elqakaqnömi fuerzäpis ushakaykan.
Chuklusta wayra apashqannömi kaykä.*
24 Mana mikuptïmi qonqurnïpis siksikyaykan.
Custilläkunapis yupariylapaqmi kaykan.
25 Pïmaypis asipämanmi.
Rikäramar kushipämashpanmi umantapis awikärin.*
26 TAYTA DIOSNILÄ, yanapaykalämay.
Kuyapäkuq kashpayki salvaykalämay.
27 Pïmaypis tantiyakutsun kikiki salvamashqaykita.
28 Runakuna maldicionamaptinpis bendicionnikita noqaman churaykalämuy.
Chikimaqnï runakuna pasaypa penqakäritsun.
Noqaqa sirvishuqniki karmi pasaypa kushikushaqpaq.
29 Chikimaqnïkunataqa pïmaypis penqapätsun.
Pasaypa penqakuptin cäranpis yanayätsunraq y pukayätsunraq.
30 TAYTA DIOS, qamtami imaypis agradëcikushayki.
Atska runakunawan juntakaykurmi alabashayki.
31 Qammi waktsakunapa favornin kaykanki.
Contrankunapitapis qammi salvanki.