Jueces
Tayta Diospa angilnin Boquim particho Israel runakunata yuripashqan
2 TAYTA DIOSPA *angilninmi Gilgalpita Boquimman aywaykur Israel runakunata kayno nirqan: “Noqami qamkunata jorqamurqä Egiptupita. Nirkurnami Abrahamta, Isaacta y Jacobta promitishqä nacionman pushamushqä. Chaykatsimurmi kayno nirqä: ‘*Pactu rurashqantsitaqa manami imaypis qonqashaqtsu. 2 Itsanqa kay nacioncho taq runakunawan ama ima pactutapis rurapäkunkitsu. Tsaypa trukanqa *altarninkunatapis chipyaq juchutsipäkunki’. Tsayno niykaptïpis qamkunaqa manami cäsukamashqankitsu. ¿Imanirtaq puyñu rinri kapäkunki? 3 Tsaypitami kayno nï: Tarkaykashqayki markakunacho taykaq runakunata manami qarqushaqtsu. Paykunami chakikicho kasha jatiraykaqno kanqa. Adorapäkushqan diosninkunalapaqmi shonquykipis yarparanqa”.
4 TAYTA DIOSPA angilnin tsayno parlayta usharkuptin lapan Israel runakuna iktsuypa iktsur waqapäkurqan. 5 Tsaymi tsay partipa jutinta churaparqan Boquim* jutin kananpaq. Tsaychömi TAYTA DIOSPAQ sacrificiukunata rupatsipäkurqan.
Josué wanushqan
6 Aywakärinanpaq Josué niptinmi Israel runakuna posisionta chaskishqan chakrankunaman kutikärirqan. 7 Israel runakunata yanapar milagrukunata TAYTA DIOS rurashqantami Josuépis y Egiptupita wakin yarqamuqkunapis rikapäkurqan. Tsaymi paykuna kawashqanyaq Israel runakuna TAYTA DIOS munashqanno kawapäkurqan. 8 Tsaypitanami TAYTA DIOSPA sirviqnin Josué pachak chunka (110) watayuq kaykashpan wanurqan. 9 Wanuykuptinmi Timnat-seracho kikinpa chakranman pampapäkurqan. Tsayqa karqan Gaas jirka norti kaq lädupa y Efraín jalqakunachömi. 10 Tsaypitami Josuépa winay mayinkunapis wanurqanna. Qepa yuriq runakunaqa manami musyarqantsu TAYTA DIOS nishqankunata ni Israel runakunata imano yanapashqantapis.
Israel runakuna juk dioskunatana adorashqan
11 Tsaypitanami TAYTA DIOSTA mana cäsukur Israel runakunaqa *Baal dioskunata adorarqan. 12 Egiptupita jorqamushqa kaykaptinpis unay aylunkuna yärakushqan TAYTA DIOSTA mananami adorapäkurqannatsu, sinöqa lädun nacionkunacho taq runakuna adorashqan dioskunatanami adorapäkurqan. Tsaymi TAYTA DIOS pasaypa rabyakurqan. 13 Tsayno rabyakurqan payta adorananpa trukan Baal diosta y *Astarot diösata adorapäkuptinmi. 14 Tsayno kashqanpita TAYTA DIOS fiyupa rabyakushpan Israel runakunata mana yanaparqannatsu. Tsaymi lädun nacionkunacho taq contran runakuna yaykuykur imaykantapis apakuptin defiendikuyta mana kamäpakurqantsu. 15 Contran runakunawan pelyaq aywaptinpis Tayta Dios nishqannölami Israel runakunapa contran rikakurqan. Tsaymi ima ruraytapis mana kamäpakushpan pasaypa lakikärirqan.
16 Tsaypitanami juezkunata TAYTA DIOS churarqan contran runakunata vincipäkunanpaq. 17 Tsayno kaptinpis tsay juezkunata Israel runakuna mana cäsupaypami juk dioskunata adorapäkurqan. Unay aylunkuna TAYTA DIOSPA mandamientunkunata cäsukärishqa kaptinpis paykunaqa manami cäsukärirqantsu.
18 Tsayno kaptinpis contrankuna pasaypa nakatsishqanta rikarmi TAYTA DIOS kuyapar juk juezta churaparqan. Tsay juez kawashqanyaqmi Israel runakunata TAYTA DIOS yanaparqan contrankunapa munayninpita yarqunanpaq. 19 Juez wanuykuptinna awkilunkunapitapis mas peorna jutsa rurayman churakarqan. Tsaymi juk dioskunata adorar mana ali costumbrikunata kachayta mana munapäkurqantsu.
20 Israel runakuna tsayno kaptinmi TAYTA DIOS pasaypa rabyakur kayno nirqan: “Unay aylunkunawan *pactu rurashqäta manakaqman churarmi kay runakunaqa ima nishqätapis mana wiyakärintsu. 21 Tsaymi paykunata mana yanapashaqnatsu Josué mana ushakätsishqan contran runakunata ushakätsinanpaq. 22 Tsay contran runakunami jutsata rurananpaq Israel runakunata inkitanqa. Tsaynöpami musyashaq Israel runakuna unay aylunkunano cäsukamashqanta o mana cäsukamashqantapis”.
23 Tsayno nirmi Josué mana ushakätsishqan markakunacho taq runakunata ushakätsinanpaq Israel runakunata TAYTA DIOS mana yanaparqannatsu.