Levítico
Tsaki mikuy ofrendapita tantiyatsishqan
2 “ ‘Pipis TAYTA DIOSPAQ tsaki mikuy ofrendata apamurqa alinnin kaq harinata apamunqa. Tsay harinaman winapänanpaq aceitita y inciensutapis apamunqa. 2 Tsay apamushqantami Aarónpita miraq cürakunata entreganqa. TAYTA DIOS imaypis yarparänanpaqmi aceitiwan ushmashqa kaykaq juk aptay harinata inciensuntawan takurkatsir *altarcho cüra rupatsinqa. Rupatsishqanpa ali asyayninta* mayarmi TAYTA DIOS kushikunqa. 3 Rupatsishqanpita putsuq kaqmi *sagrädu kar Aarónpaq y paypita miraq cürakunapaq kanqa.
4 “ ‘Hornucho kuwarkur tsaki mikuy ofrendata apamurqa alinnin kaq harinapita aceitiwan masararkur levadüraynaqta apamunki. Tsayta mana apamurqa levadüraynaq lapsha tantata rurarkur aceitiwan lushiparkur apamunki.
5 “ ‘Sartincho ankarkur tsaki mikuy ofrendata apamurqa alinnin kaq harinapita rurashqa tantata apamunki. Itsanqa levadüraynaqta aceitiwan tsapunki. 6 Tsay ofrendata atskaman pakirir aceitita jananman winapanki. Tsayqa tsaki mikuy ofrendami kaykan.
7 “ ‘Caserölacho ankarkur tsaki mikuy ofrendata apamurqa alinnin kaq harinapita aceitiwan rurashqa tantata apamunki.
8 “ ‘Tsay ofrendakunata kamarirkur TAYTA DIOSPAQ apamurmi cürata entreganki. Paynami altarman apanqa. 9 TAYTA DIOS imaypis yarparänanpaqmi walkalata altar janancho rupatsinqa. Rupatsishqanpa ali asyayninta mayarmi TAYTA DIOS kushikunqa. 10 Rupatsishqanpita putsuq kaqmi lapan apamushqan ofrendapitapis mas sagrädu kanqa. Tsay putsuqkuna kanqa Aarónpaq y paypita miraq cürakunapaqmi.
11 “ ‘Tsaki mikuy ofrendata altarcho TAYTA DIOSPAQ rupatsishpayki ama takutsinkitsu levadürawan. Imaypis TAYTA DIOSPAQ ama rupatsinkitsu levadürata ni abëjapa mishkintapis. 12 *Primicia kaptinmi itsanqa levadürawan y abëjapa mishkinwan takushqatapis TAYTA DIOSPAQ apamunki. Apamuptikipis altarcho ama rupatsinqatsu.
13 “ ‘Tsaki mikuypita ofrendata rurarqa kachiyuqta ruranki*. Kachiynaqtaqa ama imatapis rurankitsu. Kachiqa qamkunawan TAYTA DIOS *pactu rurashqantami yarpätsishunki. Tsayno kaptinmi ima ofrendamanpis kachita winanki.
14 “ ‘Tsaki mikuykunapita primiciata TAYTA DIOSPAQ apamurqa aqarkur ankashqata apamunki. 15 Tsayman aceitita y inciensuta winapanki. Tsayqa tsaki mikuy ofrendami kaykan. 16 TAYTA DIOS imaypis yarparänanpaqmi tsay apamushqan tsaki mikuyta y aceitita walkalata cüra rupatsinqa. Tsaynölami apamushqan inciensutapis rupatsinqa.