Ezequiel
Templupa punkun wichqarashqan
44 Tsaypitanami pushamaq runa yapay pushamarqan templupa jatun patiunman yaykuna juk punkuman. Tsay punkuqa karqan inti jeqamunan kaq lädupami. Tsay punkuqa wichqashqami kaykarqan.
2 Tsaychömi TAYTA DIOS kayno nimarqan: “Kay punkuqa imaypis wichqaraykanqami. Israel runakunata kuyaq TAYTA DIOS kar kay punkupa yaykushqa kaptïmi pipis mana yaykunanpaq kichanqatsu. Tsaymi imaypis wichqaräkunqa. 3 Mandaq autoridämi itsanqa kay punkucho kaykaq ruri cuartulaman yaykunqa nawpächo mikunanpaq. Tsay cuartuman yaykunanpaq y tsaypita yarqunanpaq patiuparaqmi tumanqa”.
Templuman pï yaykunanpaq nishqan
4 Tsaypitami norti kaq lädu yaykuna punkupa pasatsimarqan. Nirkurmi templu ruri kaq patiuman pushamashpan templu frentinyaq chayatsimarqan. Tsaypita rikärinäpaqmi TAYTA DIOSPA chipchipyaynin templucho juntaraykarqan. Tsaymi pampaman jukla lätakuykurqä. 5 Tsaychömi TAYTA DIOS kayno nimarqan: “Runapa tsurin, shumaq mayamay. Templücho imano kananpaq kaqtapis nishqäkunata shumaq tantiyakuy. Tsaynöpis templuman pï yaykunanpaq y pï mana yaykunanpaq kaqtapis tantiyakuy.
6 “Mana cäsukuq Israel runakunata kayno ninki: ‘TAYTA DIOSMI kayno nin: Israel runakuna, melanashqäkunata ama rurapäkuynatsu. 7 *Señaläni* mana cäsukamaq jäpa runakunata templüman ama yaykatsipäkuynatsu. Paykunata yaykatsirqa tsaki mikuy ofrendakunata, uywakunapa wiranta y yawarninta *altarnïman churarpis templütami *impüruyaykätsinki. Tsayno rurarqa *pactu rurashqantsita manakaqmanmi churarkaykanki.
8 “ ‘Nishqäno rurapäkunaykipa trukanqa jäpa runakunata templücho sirvimänanpaq churapäkushqanki. 9 Israel markakunacho taykarpis señaläni mana cäsukamaq jäpa runakuna manami templüman yaykunqatsu’. TAYTA DIOSMI tsayno nin.
Levitakuna templucho imata rurananpaqpis nishqan
10 “ ‘Israel runakuna mana cäsukamaypa ïdulukunata adorapäkushqannölami *levitakunapis ïdulukunata adorapäkushqa. Tsaymi levitakunaqa 11 templu punku täpaqlana kanqa y runakuna apamushqan uywakunata rupatsina sacrificiupaq y wakin sacrificiukunapaq pishtaqlana kanqa. Tsaynöpis runakunata templucho yanapananpaqmi listu kaykanqa. 12 Tsayno kanqa ïdulukunata adorar Israel runakunata jutsata ruratsishqanpitami’. TAYTA DIOSMI tsayno nin.
13 “ ‘Levitakunaqa manami cüra kanqanatsu ni nawpäman witimunqanatsu.* *Sagrädu ofrendakunata ni templucho wakin sagrädu kaqkunatapis manami yataylapis yatapäkunqanatsu. Lutanta rurashqanpitami pasaypa penqakärinqa. 14 Paykunataqa churashaq templu täpaqlana y tsaycho ruraypaq kaqkunata ruranalanpaqnami.
Cürakuna imano kananpaq y imata rurananpaqpis nishqan
15 “ ‘Israel runakuna mana cäsumar ïdulukunata adorapäkuptinpis Sadocpita* miraq cürakunami itsanqa nishqäkunata cäsukur templucho sirvipäkamashqa. Tsaymi paykunaqa nawpächo sirvimar wiratapis yawartapis *altarnïman churapäkunqa’. TAYTA DIOSMI tsayno nin. 16 ‘Paykunalami templüman yaykapäkunqa y altarnïcho sirvipäkamanqa. Paykunaqa lapan nishqätami cäsukamanqa.
17 “ ‘Ruri kaq patiupa yaykurmi lïnupita rurashqa sotänata cürakuna jatikärinqa.* Manami milwapita rurashqa röpan jatishqaqa patiuchöpis ni templu rurinchöpis sirvipäkamanqatsu. 18 Umantapis watakärinqa lïnupita rurashqa pañuëluwanmi. Lïnupita rurashqa calzoncïllutami jatikärinqa. Südatsikuq röpataqa manami jatikärinqatsu. 19 Jatun patiuman manaraq yarqur y runakunawan manaraq tinkurmi jatirashqan lïnu röpankunata trukakärinqa. Trukakushqan röpankunata templupa nawpancho kaykaq cuartukunamanmi churapäkunqa.* Tsaynöpami jatun patiucho kaykaq runakunata ima desgraciapis mana pasanqatsu.
20 “ ‘Cürakunaqa aqtsantapis manami qara putuypaqa rututsikärinqatsu* ni aläpa winatsipäkunqatsu. Tsaypa trukanqa kamaraqla kananpaqmi rututsikärinqa. 21 Altar kashqan patiuman yaykunanpaq kaptinqa vïnuta manami upupäkunqatsu.* 22 Viüda warmiwan ni runan kacharishqa warmiwanpis manami casaranqatsu. Tsaypa trukanqa Israel aylu virginlaraq jipashlawan o cürapa viüdalanwanmi casaranqa.*
23 “ ‘Cürakunami qamkunata tantiyatsipäkushunki imapis *sagrädu kashqanta y imapis mana sagrädu kashqanta, imapis püru kashqanta y imapis *impüru kashqanta.* 24 Quejakuptinpis leynïkuna nishqannömi juzgapäkushunkipaq. Fiestakunachöpis imano ruranaykipaq nishqänömi cumplitsipäkushunkipaq. Jamay junaqkunatapis paykunami respitatsipäkunqa.
25 “ ‘Impüru mana rikakunanpaq ayatapis manami yatapäkunqatsu.* Maman, taytan, olqu tsurin, warmi tsurin, wawqin o virginlaraq panin wanuptinmi itsanqa yatapäkunqa. 26 Ayata yatashqanpita armakurirmi qanchis junaqyaq shuyarpanqa purificakunanpaq. 27 Tsaypitaraqmi altar kashqan kaq patiuman kutiykur yapay sirvimänanpaq purificatsina sacrificiuta apapäkamunqa’. TAYTA DIOSMI tsayno nin.
28 “ ‘Cürakunapaqa manami chakranpis kanqatsu. Chakran kananpa trukanqa noqami herencian kashaq. Israelcho particionnin ni chakran mana kaptinpis noqami paykunata ashmashaq.* 29 Apapäkamushqayki tsaki mikuy ofrendakunata, purificatsina sacrificiukunata y consagratsina sacrificiukunatami paykuna mikupäkunqa. Noqapaq apapäkamushqayki lapanpis paykunapaqmi kanqa. 30 Punta wayuqkunapita *primiciata apapäkamushqaykita y lapan ofrendaykikunatapis cürakunami chaskipäkunqa. Tsaynölami tantata masarar puntata hornupita jorqupäkushqaykipis paykunapaq kanqa. Tsayno ruraptikiqa bendicionnïtami qamkunaman churamushaq.*
31 “ ‘Kikilan wanushqata o jirka uywa wanutsishqan aytsata cürakuna manami mikupäkunqatsu. Uywapa kaptinpis pishqupa kaptinpis tsay aytsata manami mikupäkunqatsu.*