Levítico
Mana cäsukuqkunata castigananpaq nishqan
20 Mastapis Moisésta TAYTA DIOS kayno nirqan: 2 “Israel runakunata kayno niy: ‘Pipis Moloc diospaq tsurinta *altarcho rupatsiq kaqtaqa wanutsishqami kanqa. Tsayno runataqa saqmaypa wanutsipäkunki Israel runa kaptinpis o qamkunacho taq jäpa runa kaptinpis. 3 Tsurinta Molocpaq rupatsirqa *Sagrädu Tolduta *impüruyätsin y kikïtapis manakaqmanmi churaykäman. Tsaymi tsay runapa contran rikakur ushakätsishaqpaq. 4 Mana cäsukamashpayki tsay runata mana wanutsiptikiqa 5 kikïmi tsay runapa y aylunkunapapis contran rikakushaq. Paykunata ushakätsishqänölami Molocta adoraq wakin runakunatapis ushakätsishaqpaq.
6 “ ‘Pipis brüjukunaman y rikakuqkunaman aywaptinqa contran rikakur ushakätsishaqmi.
7 “ ‘Noqaqa TAYTA DIOSNIKIMI kaykä. Tsayno kaykaptinqa nishqäkunata cäsukur *santu kapäkuy. 8 Leynïkunata lapanta cumplipäkuy. Noqa TAYTA DIOSMI qamkunata akrashqä santu kapäkunaykipaq.
9 “ ‘Pitapis mamanta o taytanta mana respitaq kaqtaqa wanutsipäkunki.* Tsayno wanunanpaqqa kikinmi jutsayuq kaykan.
10 “ ‘Pipis runa mayinpa warminwan kakuptinqa tsay olquta y warmitapis wanutsipäkunki.*
11 “ ‘Pipis mädistanwan kakurqa papäninta manami respitantsu. Tsay niraq runataqa mädistantinta wanutsipäkunki. Tsayno wanunanpaqqa kikinkunami jutsayuq kanqa.*
12 “ ‘Pipis lumtsuyninwan kakuptinqa lumtsuynintinta wanutsipäkunki. Tsayno rurashqanqa pasaypa jutsami kaykan. Wanunanpaqqa kikinkunami jutsayuq kanqa.*
13 “ ‘Pipis olqupura warmiwanno kakuptinqa ishkanta wanutsipäkunki. Tsayno rurashqanqa pasaypa jutsami kanqa. Wanunanpaqqa kikinkunami jutsayuq kanqa.*
14 “ ‘Pipis mamay wawata warminpaq tsarararqa pasaypa jutsatami ruraykan. Tsayno jutsata rurashqanpita kimsanta kawaykaqta rupatsipäkunki. Tsayno rupatsiptikiqa mantsakur mamay wawawan manami pipis tanqatsu.*
15 “ ‘Pï runapis uywawan kakuptinqa uywatapis y runatapis wanutsipäkunki.
16 “ ‘Pï warmipis uywawan kakuptinqa uywatapis y warmitapis wanutsipäkunki. Tsayno wanutsishqa kananpaqqa kikinmi jutsayuq kanqa.*
17 “ ‘Pipis mamalapita o taytalapita paninwan kakurqa mana respitar pasaypa penqakuypaq jutsatami ruraykan. Tsay runata panintinta runakunapa nawpancho wanutsipäkunki. Tsayno wanunanpaqqa kikinmi jutsayuq kanqa.*
18 “ ‘Pipis killa qeshyanwan kaykaq warmiwan kakuptinqa warmitapis olqutapis Israel runakunapita qarqapäkunki. Tsayno qarqapäkunki yawarnin aywaykaq warmiwan kakushqanpita y warmipis yawarnin aywaykaptin chaskipashqanpita.*
19 “ ‘Manami pipis mamanpa nananwan o papäninpa paninwan kakunmantsu. Legïtimu aylunwan kakurqa ishkanmi jutsayuq kaykan.
20 “ ‘Pipis tiyunpa warminwan kakurqa tiyunta manami respitaykantsu. Tsayno rurarqa olqupis warmipis jutsayuq kar wamraynaqlami wanunqa.*
21 “ ‘Pipis wawqinpa warminta suwaq kaqqa wawqinta manami respitaykantsu. Tsayno rurashqanpitami pasaypa jutsayuq kar wamraynaqla kanqa.*
22 “ ‘Leynïkunata y mandamientükunata lapanta cumplipäkunki. Cumpliptikiqa entreganäpaq kaq nacionpita manami pipis qarqushunkipaqtsu. 23 Tsay nacioncho taq runakuna jutsata ruraptinpis qamkunaqa jutsata ama rurapäkunkitsu. Rabyanätsimar jutsata rurashqanpitami paykunata ushakätsishaq. 24 Qamkunata promitiykä tsay runakuna tashqan markakuna herenciaykikuna kananpaq. Tsay markakunachöqa lëchipis abëjapa mishkinpis yakunöraqmi atska kaykan.
“ ‘Noqa TAYTA DIOSNIKI karmi atska nación kaykaptinpis qamkunalata akrashqä munashqäno kawapäkunaykipaq. 25 Tsayno akraykaptïqa impüru kaq uywakunata, impüru kaq pishqukunata, pachalanpa y lätaypa puriqkunatapis ama mikupäkunkitsu. Tantiyapäkuy mayqan uywakuna y mayqan pishqukuna püru kashqanta y impüru kashqantapis.* Impüru kaqkunata mikurqa impürumi rikakunkipaq. 26 Noqa TAYTA DIOSNIKI santumi kaykä. Santu kaykaptïqa qamkunapis santu kapäkuy. Atska nación kaptinpis qamkunatami akrashqä makïcho kawapäkunaykipaq.
27 “ ‘Almawan parlaptin o brüju kaptin olqu kaptinpis warmi kaptinpis saqmaypa wanutsipäkunki. Tsayno wanunanpaqqa kikinmi jutsayuq kaykan’ ”.