Salmos

68 (2) Noqakunapa favornï sharkuykulay, Tayta Dios.

Contraykikuna matsipa matsir qeshpikäritsun.

Chikishuqnikikunapis nawpaykipita qeshpir aywakäritsun.*

 2 (3) Wayrawan qoshtay elqashqanno elqätsun.

Ninacho cëra tsulushqanno ushakätsun.

Jutsa ruraqkunapis nawpaykicho ushakätsun.

 3 (4) Alita ruraq runakuna itsanqa kushikäritsun.

Nawpaykicho kushishqa kawapäkutsun.

Kushikuypita saltaykachätsun.

 4 (5) Tayta Diosta alabapäkuy.

Himnukunata cantar jutinta joqaripäkuy.

Payqa pukutay muntashqami purin.

Paypa jutinqa *Yahwehmi.

¡Paypa nawpancho kushikäriy!

 5 (6) Tayta Diosqa *sagrädu templunchömi taykan.

Payqa waktsakunapa papäninmi kaykan.

Payqa viüdakunapa favorninmi sharkun.

 6 (7) Ayluynaqkunataqa Tayta Diosmi yanapan ayluyuqno kananpaq.

Prësukunata jorqurkurmi yanapan imaykayuqpis kananpaq.

Mana wiyakuq runakunataqa churan tsaki jirkacho taykaqno nakananpaq.

 7 (8) Tayta Dios, kuyashqayki runakunatami yanapashqanki Egiptupita yarqamunanpaq.

Nirkurmi chunyaq tsaki jirkapa pushamushqanki. Selah

 8 (9) Patsapis fiyupami siksikyarqan.

Tamyapis palchachaylami tamyamurqan.

Tayta Dios tsaycho kaptinmi Sinaí jirkapis kuyurqan.

Payqa Israel runakunata kuyaq Tayta Diosmi kaykan.*

 9 (10) Tayta Dios, tamyatapis alimi tamyatsimushqanki.

Qara chakratapis ali wayuq chakramanmi tikratsishqanki.

10 (11) Kuyashqayki runakuna kaptïmi tsaycho tänäpaq churapäkamashqanki.

Kuyamashpaykimi pishïpakuptïpis noqakunata yanapamashqanki.

11 (12) Tayta Dios kachaptinmi atska warmikuna wilakurqan kayno nir:

12 (13) “¡Contrantsi reykunapis soldädunkunawanmi qeshpir aywakärishqa!”

Contrankunapita apapäkushqantami wayinkunacho warmikuna rakipänakurqan.

13 (14) Uywankunata täpaqkunapis paluma niraq adornukunatami chaskipäkurqan.

Tsay adornukuna kaykan qellaypita rurashqa älayuq y qoripita rurashqa plümayuqmi.

14 (15) Lapanpaq munayniyuq Tayta Dios mantsakätsiptinmi tsay reykuna qeshpir aywakärirqan.

Tsayno qeshpishqanmi karqan Salmón puntacho rajuta wayra apashqanno.

15 (16) Basán jirkakunaqa pasaypami jiwjiwyaykan.

Puntankunapis pasaypa altumi kaykan.

16 (17) Altunnin jirkakuna, ¿imanirtaq chikir rikapanki Tayta Dios tashqan *Sión jirkanta?

¡Tsaychömi Tayta Dios imayyaqpis tanqa!

17 (18) Tayta Diospa guërra carrëtankunaqa yupaytapis mana atipaypaqmi kaykan.

Tsay carrëtankunawanmi Sinaí jirkapita templunman shamushqa.

18 (19) Prësukunata apamushpaykimi witsämushqanki, Tayta Dios.

Runakuna apamushqan regälukunatami chaskishqanki.*

Mana cäsukuq runakunapis munaynikichönami karkaykan.

Paykuna tashqanchönami taykanki.

19 (20) ¡Salvakuq Tayta Dios alabashqa kaykulätsun!

Paymi waran waran yanapamantsi. Selah

20 (21) Tayta Diosnintsiqa salvakuq Diosmi kaykan.

Wanuypitapis paymi salvamantsi.

21 (22) Tayta Diosqa contrankunapa umanta pakinqami.

Jutsa ruraylacho kawaqkunapa umantaqa shalunqami.

22 (23) Tayta Dios kaynömi nin:

“Basánpitapis contraykikunata kutitsimushaqmi.

Lamar rurinpitapis jorqamushaqmi.

23 (24) Tsayno rurashaq yawarninwan chakikita maylapäkunaykipaq

y alquykikunapis yawarninta laqwananpaqmi”.

24 (25) Mandamaqnï Tayta Dios, atska runakunami adoraykäshunki.

Qatinaylanpami templuykiman yaykurkaykan.

25 (26) Puntatami cantaqkuna aywarkaykan.

Qepantanami tukaqkuna aywarkaykan.

Chawpintanami jipashkuna panderëtata tukaraykar aywarkaykan.

26 (27) ¡Lapayki Tayta Diosta alabapäkuy!

¡Israel runakuna, lapayki juntakaykur alabapäkuy!

27 (28) Puntantami nunush kaq Benjamín trïbu runakuna aywarkaykan.

Paykunawanmi aywarkaykan Judá, Zabulón y Neftalí trïbukunapita atska mandaqkuna.

28 (29) Tayta Dios, munayniyuq kashqaykita noqakunata tantiyaykatsilämay.

Nawpata yanapamashqaykino yapay yanapaykalämay.

29 (30) Jerusalén templuykimanmi reykuna regälukunata apapäkamunqa.

30 (31) Guërralaman uman churakashqa runakunata castigaykulay.

Paykunaqa ututucho pakakuykur atacaq uywanömi karkaykan.

Tsaynöpis waqraq törukunanömi karkaykan.

Rïcu kayta munarmi nacionkunata atacar imaykantapis apakärin.

Tsayno kaqkunataqa lapanta ushakaykatsilay.

31 (32) Egiptupitami Faraónpa kachankuna shapäkamunqa.

Etiopía nación runakunami Tayta Diosta alabapäkunqa.

32 (33) Kay patsacho lapan nación runakuna, Tayta Diosta alabapäkuy.

Himnukunata cantar payta alabapäkuy. Selah

33 (34) Tayta Diosqa muntashqami jana patsapa purin.

Parlamushqanpis maytsaymanmi mayakan.

34 (35) Tayta Dios munayniyuq kashqanpita alabapäkuy.

Payqa munayninwanmi Israel runakunata yanapan.

Azulyaraykaq ciëluchöpis munayniyuqmi kaykan.

35 (36) Templuncho Tayta Dios kushikuypaqmi kaykan.

Kuyashqan Israel runakunataqa munayninwanmi yanapan.

¡Tayta Dios alabashqa kaykulätsun!