1 Corintios
Corinto markacho taq yärakuq mayinkunaman apóstol Pablo punta kaq cartata apatsishqan
Carta qalaykunan
1 Jesucristupa *apostolnin kanäpaq Tayta Dios qayamashqa kaptinmi noqa Pablo wawqintsi Sósteneswan kay cartata apaykätsimü.
2 Corinto markacho* Tayta Dios kuyashqan wawqi panikuna: Qamkunapaqmi Tayta Dios kayno nirqan: “Paykunaqa Jesucristucho *santumi karkaykan”. Tsayno kaptikimi qayashushqanki pay munashqanno santu kawapäkunaykipaq. Tsaynölami maycho taqkunatapis payman lapan yärakuqkunata qayashqa. Tsaymi Jesucristuqa paykunapapis y noqantsipapis Señornintsi kaykan. 3 Papänintsi Tayta Dios y Señor Jesucristo kuyapäshushpayki ali kawapäkunaykipaq yanapaykuläshunki.
Tayta Diosta Pablo agradëcikushqan
4 Tayta Diostami qamkunapita imaypis agradëcikü. Jesucristuwan juklaylano kaptikimi kuyapäshushpayki imaypis yanapaykäshunki. 5 Lapanchöpis yanapashuptikimi tantiyakurkaykanki y ali wilakurkaykanki. 6 Jesucristupa wilakuyninta chaskikunaykipaq yanapashushqaykinölami kananpis yanapaykäshunki. 7 Tsaymi Señor Jesucristo kutimunanyaq shuyarpaptiki ima yachaynikikunapis pishïshunkitsu. 8 Paymi yanapaykäshunki kutimur pay munashqanno kawaykaqta tarishunaykipaq. 9 Tayta Diosqa promitishqanta imaypis cumplinmi. Paymi Tsurin Señornintsi Jesucristuwan juklaylano kawapäkunaykipaq qayashushqanki.
Juk shonqula kawananpaq yachatsishqan
10 Wawqi panikuna, Señor Jesucristupa jutinchömi ruwakü mana apänakuypa juk shonqula y juk yarpayla kawapäkunaykipaq. 11 Panintsi Cloépa aylunkuna shamurmi wilamashqa kikikikunapura chikinakur y rimanakur kawarkaykashqaykita. 12 Wakinnikishi noqata qatirämashqaykita nirkaykanki, wakinnikishi Apolusta* qatirashqaykita nirkaykanki, wakinnikishi Cefasta* qatirashqaykita nirkaykanki y wakinnikinashi Jesucristuta qatirashqaykita nirkaykanki.
13 Tsayno nirqa manakaqkunatami nirkaykanki. ¿Jesucristuqa atskaman rakikashqatsuraq kaykan? ¿Noqatsuraq qamkuna rayku cruzcho wanushqä? ¿Noqapa jutïchötsuraq *bautizakärishqanki? 14 Tayta Diostami agradëcikü qamkuna kaqcho kar Crisputa* y Gayulata* bautizashqäpita. 15 Tsayno kaptin manami mayqanikipis nipäkunkimantsu noqapa jutïcho bautizakushqaykita. 16 Tsaynöpis Estéfanaspa* aylulantami bautizashqä. Tsaypita mastaqa manami pita bautizashqätapis yarpätsu. 17 Manami runakunata bautizar purinäpaqtsu Jesucristo kachamashqa, sinöqa ali wilakuyninta wilakur purinäpaqmi. Wilakuyninta wilakurqa manami yachaq kashqäta runakuna yarpänanpaqtsu wilakü. Yachaq tukur wilakurqa Jesucristo cruzcho wanushqantami manakaqman churäman.
Jesucristupa wilakuyninta chaskikuqkunata Tayta Dios salvashqan
18 Jesucristo cruzcho wanushqanta wilakuptïmi infiernuman qaykushqa kananpaq kaqkunaqa nipäkun manakaqkunata wilakushqäta. Tsayno niptinpis salvashqa kaqkunapaqqa tsay wilakuy Tayta Diospa poderninmi kaykan.* 19 Tayta Diospa palabranchöpis kaynömi qelqaraykan:
“Yachaq runakunapa yarpayninkunatami upatakätsishaq.
Tantiyakuqkunatapis manana tantiyakärinanpaqmi pantakätsishaq”.*
20 Tsayno kaptinqa yachaqkuna yachashqanpis ¿imapaqtaq välin? Ley yachatsiqkuna yachashqanpis ¿imapaqtaq välin? Kay patsacho yachaqkuna apänakushqanpis ¿imapaqtaq välin?* Jesucristuta mana chaskikuq runakuna yachashqanpis Tayta Diospaqqa manakaqlami kaykan.* 21 Paymi yachaq kar kamakätsirqan runakuna mayjina yachaq karpis payta mana *reqipäkunanpaq. Tsaymi wilakuynin manakaq kashqanta yarpapäkuptinpis wilakuyninta chaskikuqkunataraq salvan.
22 Israel runakunaqa Jesucristuta chaskikärinanpaq milagrukunataraqmi rikayta munapäkun. Griego runakunanami munapäkun yachaqkuna nishqanno Diospa wilakuynin kananta. 23 Tsayno munaptinpis noqakunaqa Jesucristo noqantsi rayku cruzcho wanushqantami wilakärï. Tsayno wilakäriptïmi Israel runakuna rabyakärin.* Mana Israel runakunanami manakaqkunata wilakushqäta yarpapäkun. 24 Tayta Dios qayashqan kaqkunami itsanqa Israel runa karpis y mana Israel runa karpis tantiyakärin Jesucristo Tayta Diospa podernin y yachaynin kashqanta.* 25 Tsaymi wilakushqä upa runakunalapaq kashqanta yarpapäkuptinpis mas ali kaykan yachaq runakunapa yarpayninpitapis. Tsaynömi Jesucristo cruzcho wanushqanta manakaqman churaptinpis payman yärakuqkunataqa Tayta Dios munayninwan salvaykan.
26 Wawqi panikuna, Tayta Dios qayashushqayki witsan imano kashqaykitapis yarpapäkuy. Qamkunaqa juk ishkaylami yachaq karqayki, juk ishkaylami munayniyuq karqayki y juk ishkaylami rïcu karqayki. 27 Mana yachaq kashqaykita runakuna yarpaptinpis qamkunatami Tayta Dios akrashushqanki yachaqkuna tantiyakur penqakärinanpaq. Tsaynölami munayniynaq kashqaykita yarpapäkuptinpis Tayta Dios akrashushqanki munayniyuq runakuna tantiyakur penqakärinanpaq.* 28 Manakaqman churashqan runakunata salvananpaq Tayta Dios tsayno akraptinmi musyantsi pipis yachaq kashqanpitaqa ni munayniyuq kashqanpitaqa mana salvakunanpaq kashqanta. 29 Tsayno kaptinqa Tayta Diospa nawpancho manami pipis alabakunqatsu.
30 Qamkunataqa Jesucristucho kanaykipaqmi Tayta Dios salvashushqanki. Noqantsi raykumi Jesucristuta Tayta Dios churarqan yachaynintsi kananpaq, salvamaqnintsi kananpaq, perdonamaqnintsi kananpaq y rantimaqnintsi kananpaq. 31 Tsayno kaykaptinqa ama alabakushuntsu. Tayta Diospa palabranchöpis kaynömi qelqaraykan: “Pipis alabakunanpa trukanqa Tayta Diosta alabatsun”.*