Hechos
Éfesucho Pablo wilakushqan
19 Corintucho Apolos kaykaptinmi Pabluqa markan markan aywar Éfesuman chayarqan. Tsaycho discïpulukunata tariykurmi 2 kayno nir tapurqan: “¿Qamkunaqa Jesucristuta chaskikur Espíritu Santuta chaskikärishqankiku?”
Tsaymi kayno nipäkurqan: “Espíritu Santu kashqanta manami imaypis mayapäkushqätsu”.
3 Tsawraqa Pablo yapay tapurqan: “Tsayno kaptinqa ¿pipa yachatsikuyninta chaskikurtaq *bautizakärishqanki?”
Niptinmi kayno nipäkurqan: “Juanpa* yachatsikuyninta chaskikurmi bautizakärishqä”.
4 Tsawraqa Pablo kayno nirqan: “Juanqa runakunata bautizarqan jutsankunata kacharir Tayta Dios munashqanno kawananpaqmi. Tsaynöpis yachatsirqan Jesucristo shamuptin payman yärakärinanpaqmi”.*
5 Tsayno niptinmi Señor Jesucristupa jutincho bautizakärirqan. 6 Paykunapa umanta yataykur Tayta Diosta Pablo manakuptinmi Espíritu Santu paykunaman chayarqan. Tsawraqa juk idiömakunapa parlashpanmi Tayta Dios tantiyatsishqankunata parlapäkurqan. 7 Tsay runakuna chunka ishkaynömi karqan.
8 Éfesucho tarmi *sinagögaman aywar Tayta Dios *mandaykashqanpita Pablo kimsa killa mana mantsakuypa yachatsirqan. 9 Tsayno yachatsiptinpis wakin runakuna Jesúsman yärakuyta mana munarmi lapanpa nawpancho Diospa Näninta* manakaqman churarqan. Tsawraqa Jesúsman yärakuqkunawan sinagögapita yarqukur Tiranno jutiyuq runapa yachatsikuna wayinchöna Pablo waran waran yachatsirqan. 10 Ishkay watana tsayno yachatsiptinmi intëru Asia provinciacho Israel runakunapis y mana Israel runakunapis Señor Jesucristupa wilakuyninta mayapäkurqan.
11 Tsaychömi Tayta Diospa munayninwan milagrukunata Pablo rurarqan. 12 Tsawraqa Pablo töpashqan pañuëlukunata y mandilkunatapis qeshyaqkunaman apapäkurqan. Tsaykunata töpatsiptinmi qeshyaqkuna aliyaq y *supaykunapis runakunapita yarqupäkuq.
13 Tsay witsanmi wakin Israel runakunapis purirkaykarqan runakunapita supaykunata qarqur. Paykunapis Jesúspa jutincho supaykunata qarquyta munarmi kayno nipäkurqan: “Pablo wilakushqan Jesúspa jutinchömi qamta qarqü”.
14 Tsayno rurarqan mandaq cüra Escevapa qanchis tsurinkunami. 15 Qarquyta kamaptinmi supay kayno nirqan: “Noqa reqïmi Jesústa. Pablo pï kashqantapis musyämi. Qamkunaqa ¡pitaq kanki noqata qarqamänaykipaq!”
16 Tsayno nirmi supay nakatsishqan runa löcutashpan paykunata maqar usharqan. Tsawraqa pasaypa yawarlana tsay wayipita qeshpir qarapächu aywakärirqan. 17 Tsayno pasashqanta mayaykurmi Éfesucho taq Israel runakuna y mana Israel runakunapis fiyupa mantsakärirqan. Tsawraqa maytsaychöpis runakuna musyapäkurqan Señor Jesucristo munayniyuq kashqanta.
18 Jutsa rurashqanta tantiyakurmi Jesucristuman wakin yärakuqkunapis jutsa rurashqanta mana pakarqannatsu. 19 Tsaynölami brüju runakuna mágica librunkunatapis shuntaykur lapanpa nawpancho rupatsipäkurqan. Tsay librukunapa preciunta jorquptin karqan pitsqa chunka waranqa (50,000) jornalpa chaninmi. 20 Tsaynöpami Tayta Diospa wilakuynin munayniyuq kashqanta tantiyakur atska runakuna chaskikärirqan.
21 Tsaypitanami Pablo yarparqan Jerusalénpa aywananpaqqa Macedonia provinciacho y Acaya provinciacho kaq wawqi panikunataraq watukuyta. Tsaynöpis yarparqan Jerusalénpitaqa Romapana aywaytami. 22 Tsayno yarparmi Macedonia provinciaman nawpananpaq Timoteuta y Erastuta kacharqan. Nirkurmi Asia provinciacho quëdakurqan.
Éfesucho Pablupa contran sharkapäkushqan
23 Tsay witsanmi Diospa Näninpita* wilakäriptin Éfesucho runakuna fiyupa rabyakärirqan. 24 Tsayno rabyakärirqan Demetrio jutiyuq runa shimita qoptinmi. Paymi *Artemisa* nishqan diösapa akapala templunkunata qellaypita ruraq. Tsaykunata rantikurmi Demetriuqa aruq mayinkunawan atska qellayta gänapäkuq. 25 Aruq mayinkunata y paykunano ima aruylacho aruqkunatapis qayaykatsirmi kayno nirqan: “Qamkuna musyankimi kay aruynintsiwan ali gänashqantsita. 26 Rikapäkushqaykinöpis y mayapäkushqaykinöpis Pabluqa kayno nirmi yachaykätsin: ‘Runa rurashqan ïdulukunaqa manami rasunpa Diostsu kaykan’. Tsayno yachatsir atska runakunatami kay Éfesucho y intëru Asia provinciachöpis criyiykätsin. 27 Tsayno criyitsiptinmi arushqantsikunata y diosnintsi Artemisapa templuntapis manakaqman churapäkunqa. Artemisata intëru Asiacho taqkuna y intëru munduchöpis manami respitapäkunqanatsu”.
28 Demetrio tsayno niptinmi aruq mayinkuna fiyupa rabyakur yaparir yaparir kayno nipäkurqan: “¡Diosnintsi Artemisa alabashqa katsun!”
29 Tsayno nipäkushqanta mayarmi tsay markacho taq wakin runakunapis pasaypa qayarparqan. Fiyupa rabyashpanmi Gayuta y Aristarcuta coliseuman prësu apapäkurqan. Gayo y Aristarcuqa Macedoniapitami Pabluta yanapananpaq shamushqa karqan. 30 Runakunata tantiyatsinanpaq Pablupis coliseuman aywayta munaptinmi wawqi panikuna micharqan. 31 Tsay provinciapa wakin autoridäninkunapis Pabluwan reqinakurmi wilakatsirqan coliseuman mana aywananpaq.
32 Coliseucho runakuna pichuypa pichur parlapäkuptinmi wakin kaq runakuna mana musyapäkurqantsu imapaq juntakashqantapis. 33 Tsaycho kaykaq Israel runakunanami Alejandro jutiyuq runata parlamunanpaq yaykatsirqan. Tsawraqa runakunapa nawpanman Alejandro yaykuykur makinwan sëñarqan upälakärinanpaq. 34 Alejandruqa Israel runa kashqanta musyashpanmi tsay runakuna ishkay hörano qaparparqan kayno nir: “¡Diosnintsi Artemisa alabashqa katsun!”
35 Tsawraqa markapa mas mandaqnin autoridä runakuna upälakärinanpaq sëñata rurar kayno nirqan: “¡Éfeso runakuna! Maytsaychöpis runakuna musyanmi Artemisapa templun kay markacho kashqanta. Tsaynöpis musyanmi ciëlupita unyamuq Artemisa niraq rumitapis tsararashqantsita. 36 Tsaytaqa pïmaypis musyanmi. Lutala qayararqa paqta lutanta rurapäkunkiman. 37 Prësu apamushqayki runakuna manami templuntsipita imatapis apakushqatsu ni diosnintsi Artemisatapis manakaqman churashqatsu. 38 Tsayno kaykaptinqa Demetrio y aruq mayinkuna kay runakunata quejayta munarqa autoridäkunaman quejakäritsun. 39 Imalapis wilanakunantsipaq kaptinqa lapan autoridäkunata shuntaykur sesionta rurashun. 40 Mana tantiyakuypa qayarpaptikiqa Roma autoridäkuna contran sharkushqantsitami yarpapäkunqa. Tsaypita juzgamaptintsiqa manami ima niytapis kamäpakushunpaqtsu”.
41 Tsayno nirkurmi lapan runakunata nirqan aywakärinanpaq.