Gálatas
Pablo lakikushqan
3 ¡Mana tantiyakuq Galacia runakuna! Noqantsi rayku Jesucristo cruzcho wanushqanta shumaqmi tantiyapäkurqayki. Tsayno tantiyarkaykaptikiqa ¿pitaq kuchipa tulunta amupäshushqanki [lutan yachatsikuyta chaskikärinaykipaq]? 2 Kanan mä wilapäkamay. ¿Qamkunaqa *Moisés qelqashqan leykunata cumplirku o Jesucristupa wilakuyninta mayar payman yärakurku Espíritu Santuta chaskikärishqanki? 3 ¿Pasaypa mana tantiyakuqnaku karkaykanki? Espíritu Santu yanapashuptikimi Tayta Dios munashqanno kawayta qalaykärishqanki. Tsayno kaykaptinqa ¿imanirtaq Espíritu Santuta mana cäsur Moisés qelqashqan leykunata cumpliyta munarkaykanki? 4 Tsayno karqa ¿manakaqlapaqtsuraq Jesucristuta chaskikärishqaykipita nakapäkushqanki? Manachi manakaqlapaqqa nakankimantsu karqan.
5 ¿Tsay leykunata cumplishqaykipitatsuraq Tayta Dios Espíritu Santuta qoshushqanki? Tsaynöpis ¿leykunata cumplishqaykipitatsuraq qamkunacho milagrukunata ruran? Manami tsaypitatsu, sinöqa Jesucristupa ali wilakuyninta mayar payman yärakärishqaykipitami.
Abrahamno yärakur salvashqa kashqantsi
6 Yärakuptinmi Abrahamtapis jutsaynaqtana Tayta Dios chaskirqan.* 7 Shumaq tantiyakäriy. Tayta Diosman noqantsipis yärakurqa mayqan aylu karpis Abrahampa aylunmi kaykantsi.*
8 Tayta Diospa palabranmi niykan mana Israel runakunatapis payman yärakushqanpita Tayta Dios perdonananpaq kashqanta. Tsaymi ali wilakuyninta Abrahamta wilapar Tayta Dios kayno nirqan: “Qam yärakamashqaykipitami lapan casta runakunapis bendicionnïta chaskipäkunqa”.*
9 Tsaymi Tayta Diosman yärakur Abraham bendicionta chaskishqanno noqantsipis bendicionta chaskiykantsi.*
10 *Moisés qelqashqan leykunata cumplishqanpita salvashqa kashqanta yarpaqkunaqa lapanpis maldicionädumi kaykan. Tayta Diospa palabranchöpis kaynömi qelqaraykan: “Qelqaraykaq leykunata lapanta mana cumpliq kaqqa maldicionashqami kanqa”.*
11 Tsayno kaykaptinqa Moisés qelqashqan leykunawanqa manami mayqanpis salvakunqatsu. Tsaypa trukanqa Tayta Diospa palabrancho kaynömi niykan: “Munashqäno kawaq runaqa noqaman yärakamarmi kawanqa”.*
12 Moisés qelqashqan leykunaqa manami Diosman yärakur salvakunantsipaqtsu niykan, sinöqa kaynömi niykan: “Leynïkunata cumpliq kaq runaqa lapantami cumplinman”.*
13 Itsanqa tsay leykunata cumpliyta mana kamäpakurmi maldicionädu karqantsi. Tsaymi noqantsipa trukantsi maldicionädu runano wanur Jesucristo salvamashqantsi. Tayta Diospa palabranchöpis kaynömi qelqaraykan: “Pï runapa ayanpis qerucho warkaraptin maldicionashqami kanqa”.*
14 Jesucristupis tsayno wanurqan Abrahamta Tayta Dios promitishqan bendicionta mana Israel runakunapis chaskikärinanpaqmi. Tsaymi Jesucristuman yärakur Tayta Dios promitishqan Espíritu Santuta chaskikuntsi.
Abrahamta Tayta Dios promitishqan
15 Wawqi panikuna, kananqa runakuna rurashqan testamentuman tinkutsiypami tantiyatsishayki. Musyashqantsinöpis testamentuta rurar firmaptinqa manami pipis manakaqman churannatsu ni imatapis tsayman yapantsu. Tsaynölami Tayta Dios promitishqanpis kaykan.
16 Pay promitishqanqa Abrahampaq y paypita miraqpaqmi kaykan. Manami Abrahampita lapan miraqkunapaq kashqantatsu Tayta Dios nirqan, sinöqa paypita miraq juklaylapaq kashqantami.* Tsayno nir Jesucristupaqmi parlarqan.
17 Tsaymi kayno nï: Abrahamwan *pactuta [Cristucho] rurashqanpita chusku pachak kimsa chunka (430) watataraqmi Tayta Dios leyninkunata Moisésta entregarqan.* Qepataraq shamushqa karmi Abrahamta promitishqanta mana anulashqatsu. 18 Tsaymi *Moisés qelqashqan leykunata cumplishqantsipitatsu salvacionta chaskintsi, sinöqa Abrahamta promitishqanta Tayta Dios cumpliptinmi. Moisés qelqashqan leykunata cumplishqantsipita salvakunantsipaq kaptinqa Tayta Dios promitishqanpis manakaqlapaqmi kanman karqan.*
Moisés qelqashqan leykuna imapaq kashqanpis
19 Tsayno kaptinqa ¿imapaqtaq tsay leykuna kaykan? Tsay leykunata Moisésta entregarqan runakuna jutsayuq kashqanta tantiyakärinanpaqmi.* Tsaynöpis tsay leykuna karqan Jesucristo shamushqanyaqlami. Paymi kaykan Abrahamta Tayta Dios promitishqan runa.
Tsaynöpis Tayta Dios leyninkunata *angilkunawanmi Moisésta entregatsirqan.* Moisésnami tsay leykunata runakunata yachatsirqan. 20 Abrahamta promitirmi itsanqa jukwan wilakatsinanpa trukanqa kikin Tayta Dios nirqan.
21 Tsayno kaykaptinqa ¿Tayta Diospa leyninkuna salvamänantsipaqtsuraq kaykan? ¡Manami! Tsay leykuna salvamänantsipaq kaptinqa promitishqanta Tayta Dios manakaqmanmi churanman karqan. Tsaynöpis salvamänantsipaq kaptinqa leyninkunata cumplirmi salvakushwan karqan. 22 Itsanqa Tayta Diospa palabran niykan lapantsipis jutsayuq kashqantsitami. Jesucristuman yärakurraqmi Tayta Dios promitishqanta chaskikur salvakuntsi.
23 Jesucristuman manaraq yärakuptintsimi *Moisés qelqashqan leykunaqa munaynincho tsararämarqantsi. Tsayno tsararämarqantsi Jesucristo shamushqanyaqmi. 24 Tsurinta rïcu runa ashmayninpa makinman churashqannömi noqantsitapis tsay leykunapa munayninman Tayta Dios churamarqantsi. Tsayno churamarqantsi Jesucristo shamuptin payman yärakur salvakunantsipaqmi. 25 Wamra shaksharkur ashmaqninpa makincho manana kashqannömi Jesucristuman yärakur Moisés qelqashqan leykunapa munayninchönatsu kaykantsi.
Tayta Diospa wamranna kashqantsi
26 Wawqi panikuna, Jesucristuman yärakurmi kananqa Tayta Diospa wamrankunana kaykantsi. 27 Tsaynöpis *bautizakushpantsimi Jesucristuwan juklaylano kar paypa makinchöna kaykantsi. 28 Tsaymi Israel runa karpis mana Israel runa karpis, ashmay karpis mana ashmay karpis, olqu karpis warmi karpis Jesucristucho karqa Tayta Diospa wamranna karkaykantsi. 29 Tsaynöpis Jesucristuta chaskikur Abrahampita miraqnami kaykantsi. Tsaynöpami Abrahamta Tayta Dios promitishqanta noqantsipis chaskintsi.*