Isaías
53 Wilakärishqäta ¿piraq chaskikushqa?
TAYTA DIOS imano salvamashqantsita musyatsiptinpis ¿piraq tantiyakushqa?*
2 Tayta Diospa sirviqninqa nawpanchömi mözuyarqan.
Tsaki pampacho sapitsar tsintsimuq yöranömi winarqan.
Payqa manami kuyaylapaqtsu ni buen mözutsu karqan.
3 Runakuna payta manakaqman churarmi mana chaskikärirqantsu.*
Fiyupa nanaywanmi nakarqan.
Pipis manami rikaytapis munarqantsu.
Chikishpanmi pipis payta mana cäsurqantsu.
4 Paymi qeshyantsikunata apakushqa.
Paymi nanaynintsikunatapis jorqushqa.*
Jutsata rurashqanpita Tayta Dios castigaykashqantami yarparqantsi.
5 Tsayno yarpaptintsipis noqantsi mana cäsukuq kashqantsipitami tuksishqa karqan.
Jutsata rurashqantsipitami wanutsishqa karqan.
Tayta Dioswan ali kawayta tarinantsipaqmi castigashqa karqan.
Yawarlana ushashqa karmi aliyätsimashqantsi.* *
6 Lapantsimi oqrakashqa uyshano kaykantsi.*
Tayta Diospita witikushqa karmi munashqantsino kawaykantsi.
Tsayno kaykaptintsipis lapan jutsantsitami TAYTA DIOS payta jitapashqa.
7 Pasaypa maqapäkuptinpis manami imatapis rimakurqantsu.
Uyshata pishtananpaq apaqnömi payta apapäkurqan.*
Milwanta rutuptin uysha kashqannömi upälala karqan.
Tsayno upälakushpan manami imatapis rimakurqantsu.
8 Jutsayuqtanömi juzgananpaq prësu aparqan.
Payta wanutsiptin tsurinpis manami karqantsu.
Kuyashqä runakunapa jutsankunapitami fiyupa nakarqan.*
9 Payqa manami ima jutsatapis rurarqantsu ni pitapis lulaparqantsu.
Tsayno kaptinpis jutsasapakuna y rïcukuna pampakunanmanmi pampapäkurqan.*
10 Tsayno nakanantami TAYTA DIOS munarqan.
Consagratsina sacrificiuno wanuptinmi miraqninkuna tsaytsika kanqa.
Nirkurqa atska watami kawanqa.
Pay kayninpami TAYTA DIOS munashqanno lapanpis kamakanqa.
11 Nakashqan alipaq kashqanta rikarmi kushikunqa.
Tayta Dios kaynömi nin:
“Payqa jutsaynaq sirvimaqnïmi kaykan.
Wanurmi atskaqta perdonanqa.
Jutsa rurashqankunata paymi apakunqa.
12 Kikin salvakunanpa trukanqa jutsayuq runanömi wanurqan.*
Runakuna rayku wanurmi paykunata perdonanäpaq manakamarqan.
Tsaymi payta churashaq mas respitashqa kananpaq.
Guërracho vinciqkuna imaykatapis chaskishqannömi paypis premiuta chaskinqapaq”.