Mateo
Jesús chipchipyaykaq rikakushqan
17 Tsaypita soqta junaqtami Pedruta, Santiaguta y Santiagupa wawqin Juanta pushakurkur Jesús witsarqan altunnin jirkaman. 2 Tsaychömi paykuna rikaykaptin Jesús jukniraqman tikrarqan. Tsaymi qaqlan intinöraq chipchipyarqan y röpanpis pasaypa yoraq rikakur chipchipyarqan. 3 Tsaychömi rikapäkurqan Moisés y Elías yuriparkur Jesúswan parlarkaykaqta.
4 Tsawraqa Jesústa Pedro kayno nirqan: “Alipaqmi kaycho karkaykä, tayta. Munaptikiqa kimsa tsuklata rurapäkushaq: jukta qampaq, jukta Moiséspaq y jukta Elíaspaq”.
5 Pedro tsayno niykashqan hörami chipchipyaykaq pukutay paykunata tsapakurkurqan. Pukutay rurinpitami Tayta Dios kayno nimurqan: “Paymi kuyay Tsurï. Paypitami kushishqa kaykä.* Pay nishushqaykita wiyakäriy”.*
6 Tsayno nimuqta mayaykurmi discïpulunkuna pasaypa mantsakashpan pampaman lätakaykärirqan. 7 Tsayno lätaraykaptinmi paykunata yataykur Jesús kayno nirqan: “Ama mantsakäriytsu. Sharkapäkuy”.
8 Tsayno niptin nukirkushpanmi Jesúslatana rikapäkurqan.
9 Jirkapita uraykämushqanchömi Jesús kayno nirqan: “Puntacho rikapäkushqaykita pitapis ama wilapankiraqtsu. *Runapa Tsurin wanushqanpita kawarimuptinraq wilakärinki”.
10 Tsawraqa discïpulunkuna Jesústa kayno tapupäkurqan: “Runapa Tsurin wanunanpaq kaykaptinqa ¿imanirtaq ley yachatsiqkuna nipäkun puntata Elíasraq shamunanpaq kashqanta?”*
11 Niptinmi Jesús kayno nirqan: “Elías rasunpami puntata shamunqa lapanta kamakätsinanpaq. 12 Itsanqa Elías maynami shamushqa.* Paytaqa pï kashqantapis mana reqirmi wanutsipäkurqan. Tsaynölami Runapa Tsurintapis wanutsipäkunqa”.
13 Jesús tsayno niptinmi discïpulunkuna tantiyarqan Elíaspaq parlar Bautizaq Juanpaq parlaykashqanta.
Juk mözuta Jesús aliyätsishqan
Marcos 9.14-29; Lucas 9.37-43a
14 Runakuna juntaraykashqanman Jesús chayaykuptinmi nawpanman qonqurpakuykur juk runa ruwakurqan kayno nir: 15 “Tsurïta kuyapaykulay, tayta. Wanuy qeshya tsariptinmi pasaypa nakan. Atska kutimi ninamanpis tunishqa y yakumanpis jeqashqa. 16 Discïpuluykikunaman apamuptïpis manami aliyätsiyta kamäpakushqatsu”.
17 Tsayno niptinmi Jesús kayno nirqan: “¡Yärakuyniynaq jutsasapa runakuna! ¡Imayyaqraq qamkunawan kaykäshaq! ¡Imayyaqraq qamkunata awantashayki! Mä tsay mözuta apapäkamuy”.
18 Nawpanman chayaykatsiptinmi mözuta nakaykätsiq *supayta Jesús olqüparqan. Tsaymi supayqa jinan höra mözupita yarqurir aywakurqan. Tsay hörapitami mözu sänuna rikakurqan.
19 Tsaypita kikilankuna kaykarmi discïpulunkuna Jesústa tapurqan kayno nir: “Noqakunaqa ¿imanirtaq tsay supayta qarquyta mana kamäpakärishqätsu?”
20 Tsawraqa Jesús kayno nirqan: “Janan shonqula yärakurmi qarquyta kamäpakärishqankitsu. Rasunpami kayno nï: Ñäpushpa murunno takshalapis yärakuyniki kaptinqa taqay jirkata witikunanpaq niptikipis witikunmanmi.* Manami imapis aläpa sasatsu qamkunapaq kanman. 21 [Tsayno kaptinpis kay niraq supaykunataqa qarqapäkunki ayunar Tayta Diosta manakurraqmi]”.
Wanunanpaq kashqanta Jesús yapay wilakushqan
Marcos 9.30-32; Lucas 9.43b-45
22 Galileacho puriykarmi discïpulunkunata Jesús kayno nirqan: “*Runapa Tsurinta chikiqninkunapa makinmanmi entreganqa. 23 Wanutsiptinpis kimsa junaqtami kawarimunqa”.
Tsayno niptinmi discïpulunkuna fiyupa lakikärirqan.
Templupaq impuestuta Pedro pägashqan
24 Tsaypitanami Capernaúmman discïpulunkunawan Jesús chayarqan. Tsaychömi templupaq impuestu cobraqkuna* Pedruta tapurqan kayno nir: “Señornikiqa ¿manaku templupaq impuestuta pägan?”
25 Tsayno tapuptinmi Pedro kayno nirqan: “Aw, päganmi”.
Tsaypita wayiman Pedro yaykurir imatapis manaraq niptinmi Jesús kayno nirqan: “¿Ima ninkitaq, Simón? Mandaq reykuna ¿pitataq impuestuta cobrapäkun? ¿Marka mayinkunataku o jäpa runakunataku?”
26 Tsayno tapuptinmi Pedro kayno nirqan: “Jäpa runakunatami, tayta”.
Tsawraqa Jesús kayno nirqan: “Tsayno kaptinqa tsurinkuna manami pägantsu. 27 Tsayno kaptinpis cobraqkuna mana rabyakunanpaq qochaman aywar anzuëluwan pescäduta tsarimuy. Punta kaq pescäduta tsarimushqaykipa shiminchömi qellay kaykanqa. Tsay qellaywan ishkantsipita impuestuta pägamuy”.