Juan
16 “Lapan kaykunata niykä noqaman imaypis yärakärimänaykipaqmi. 2 *Sinagögapitapis qarqupäkushunkipaqmi. Tayta Dios munashqanno rurarkaykashqanta yarparmi wanutsipäkushunkipaq. 3 Tsayno rurapäkushunki noqata mana reqimar ni Taytätapis mana reqirmi. 4 Qamkunata kayno niykä nishqäno pasashuptiki lapanpis nishqänöla kashqanta tantiyakärinaykipaqmi. Nawpataqa manami wilarqäraqtsu tsayno pasashunaykipaq kashqanta. Kananmi itsanqa aywakunäpaqna kar wilaykä.
Espíritu Santu shamunanpaq Jesús nishqan
5 “Kananqa kachamaqnï Taytä kaqman kutikunäpaqnami kaykä. Tsayno kaptinpis maypa aywanäpaq kashqanta manami mayqanikipis tapumankitsu. 6 Tapumänaykipa trukanqa tsaykunata nishqäpitami lakishqa karkaykanki. 7 Rasunpami kayno nï: Qamkunapaq mas ali kaykan noqa aywakushqämi. Mana aywakuptïqa Yanapakuq Espíritu Santu* manami shamunqatsu. Aywakurmi itsanqa payta kachamushaq.
8 “Espíritu Santu shamurnami runakunata tantiyatsinqa jutsayuq kashqanta, Tayta Dios munashqanno kawapäkunanpaq kashqanta y juzgashqa kananpaq kashqanta. 9 Jutsayuq kashqanta tantiyatsinqa noqata mana chaskikärimaptinmi. 10 Tayta Dios munashqanno kawapäkunanpaq tantiyatsinqa Taytä kaqman kutikuptïmi. Kutikuptï manami rikapäkamankipaqnatsu. 11 Juzgashqa kananpaq kashqanta tantiyatsinqa kay patsapa mandaqnin* vincishqana kaptinmi.
12 “Atskaraqmi kaykan qamkunata yachatsinäpaq. Lapanta yachatsiptïqa manami tantiyapäkunkipaqtsu. 13 Rasun kaqta tantiyatsikuq Espíritu Santu shamurnami Diospa wilakuyninta lapanta tantiyatsishunki. Payqa manami kikinpa yarpaynilanpitatsu tantiyatsishunki, sinöqa noqa nishqäkunalatami. Tsaynölami ima pasananpaq kaqkunatapis tantiyatsishunki. 14 Noqa nishqäkunata tantiyatsishunki noqata alabamänaykipaqmi. 15 Taytä nishqankunaqa noqa nishqäkunami kaykan. Tsaymi Espíritu Santu nishqäkunata tantiyatsishunaykipaq nishqä.
Lakikushqanpita kushikunanpaq Jesús nishqan
16 “Walkalanami pishiykan mana rikapäkamänaykipaq. Tsaypita warantinkunaqa yapaymi rikapäkamankipaq”.
17 Tsayno niptinmi discïpulunkuna jukninpis jukninpis kayno nipäkurqan: “Tsayno nishpan ¿imataraq niykämantsi? ¿Imanirraq niykämantsi: ‘Walkalanami pishiykan mana rikapäkamänaykipaq’? ¿Imanirraq niykämantsi: ‘Tsaypita warantinkunaqa yapaymi rikapäkamankipaq’? Tsaynöpis ¿imanirraq niykämantsi Taytan kaqman aywakunanpaq kashqanta? 18 ‘Walkalanami pishiykan’ nishqanqa ¿ima ninantaq? Manami tantiyantsitsu imapita parlaykashqantapis”.
19 Discïpulunkuna tapukuyta munashqanta musyarmi Jesús kayno nirqan: “¿‘Walkalanami pishiykan mana rikapäkamänaykipaq’ y ‘tsaypita warantinkunaqa yapaymi rikapäkamankipaq’ nishqäpitaku yarpachakurkaykanki? 20 Rasunpami kayno nï: Aywakuptï Diosta mana cäsukuq runakuna kushikärinqami. Qamkunami itsanqa lakikushpayki waqapäkunkipaq. Tsayno lakikurpis nirkurqa kushikärinkipaqmi. 21 Warmikuna wachay nanay tsariptin waqarpis yuripakurirnaqa kushikärinmi. Tsaymi nanaywan nakashqantapis mana yarpannatsu. 22 Tsaynölami qamkuna kanan lakikurpis yapay tinkuptintsi kushikärinkipaq. Tsay kushikuytaqa manami pipis qechushunkipaqtsu. 23 Yapay tinkuptintsiqa mananami imatapis tapumankipaqnatsu.
“Rasunpami kayno nï: Noqapa jutïcho imatapis manakärishqaykitami Taytä qoshunkipaq. 24 Noqapa jutïcho manami Taytäta imatapis manakärishqankiraqtsu. Kananpitaqa jutïcho manakäriy. Manakur chaskipäkunkimi. Tsaynöpami pasaypa kushikärinkipaq.*
25 “Kananyaqqa tumatsipaylapami qamkunata yachatsishqä. Nirkurnami itsanqa mana tumatsipaylapana Tayta Diospa wilakuyninta yachatsishayki. 26 Tsay witsanqa manami noqanatsu qamkunapaq Taytäta manakuykäshaq, sinöqa kikikikunami jutïcho manakärinki. 27 Tsayno manakärinki Taytä kuyashuptikimi. Paymi kuyashunki paypita shamushqäta criyir kuyamaptiki. 28 Taytä kaqpita kay patsaman shamushqa karmi Taytä kaqman kutikushaqpaq”.
29 Tsayno niptinmi discïpulunkuna kayno nipäkurqan: “¡Kananmi itsanqa nimashqaykita tantiyapäkü! ¡Mana tumatsipaylapanami parlapaykämanki! 30 Kananqa tantiyakärïmi lapanta musyashqaykita. Tsaymi yachaq kashqaykita musyananpaq pipis tapuykäshunkinatsu. Kananmi itsanqa Tayta Dios kaqpita shamushqaykita criyipäkü”.
31 Tsaymi Jesús kayno nirqan: “¿Tsayraqku criyipäkunki? 32 Walka junaqlanami pishiykan japaläta kachariykamar wakpa kaypa aywakärinaykipaq. Tsayno aywakuptikipis manami japalätsu kaykäshaq, sinöqa Taytämi noqawan kaykanqa.
33 “Lapan kaykunata wilapashqä noqaman yärakamar jawkala kawapäkunaykipaqmi. Kay patsacho kawashqaykiyaqqa nakankiraqmi. Tsayno kaptinpis valurakäriy. Noqami kay patsacho lapan mana alikunata vincishqä”.*