Ezequiel
Mandaqkunatapis jutsata rurashqanpita castigananpaq nishqan
11 Tsaypitanami Espíritu apamarqan TAYTA DIOSPA templuncho kaykaq juk punkuman. Tsay punkuqa inti jeqamunan kaq lädupa kaykaq punkumi karqan. Punku yaykunachömi rikarqä ishkay chunka pitsqa (25) runakunata. Paykunawanmi kaykarqan Azurpa tsurin Jaazanías y Benaíapa tsurin Pelatíaspis. Jerusalén runakunapa mandaqninkunami paykunaqa karqan.
2 Tsaymi Tayta Dios kayno nimarqan: “Runapa tsurin, paykunaqa mana alita ruranalanpaqmi yarpachakurkaykan. Tsaynölami kay markacho pïmaytapis lutanta rurananpaq yätsirkaykan. 3 Paykunami kayno nipäkun: ‘Höra chayaykämunnami wayikunata sharkatsinantsipaq. Mankacho aytsa tsaparashqannömi kay markacho kaykantsi’.* 4 Runapa tsurin, tsayno niptinpis nishqäkunata wilay”.
5 Tsaypitanami TAYTA DIOSPA Espïritun tantiyatsimarqan runakunata kayno wilanäpaq: “TAYTA DIOSMI kayno nin: Israel runakuna, imata yarpaykashqaykitapis y imata niykashqaykitapis noqa musyaykämi. 6 Tsaynölami musyä kay markacho atska runakunata wanutsiptiki cällikunacho tsaytsika aya jitarpashqanta.
7 “Tsaymi noqa TAYTA DIOS kayno nï: Nipäkushqaykinölami Jerusalén marka mankano kaykan. Tsayno kaptinpis mankapita aytsata jorquqnömi Jerusalénpita jorqushaykipaq. Wanutsishqayki runakunapa ayankunalami mankacho aytsa quëdaqno Jerusaléncho quëdanqa. 8 Guërrata mantsakäriptikipis guërrawanmi ushakätsishayki. Noqa TAYTA DIOSMI tsayno nï.
9 “Qamkunata kay markapita qarqurmi jäpa runakunapa makinman churashayki. 10 Nacionnikipa lindëruncho juzgashpämi espädawan wanutsishayki. Tsayraqmi TAYTA DIOS kashqäta tantiyakärinkipaq.
11 “Manami mankacho aytsa winaraqnötsu qamkuna karkaykanki. Kay markapis manami mankanötsu tsapäshunaykipaq kanqa. Tsaypa trukanqa qamkunata juzgashpämi nacionnikipa lindërunkunachöpis wanutsishayki. 12 Tsayraqmi TAYTA DIOS kashqäta tantiyakärinkipaq. Qamkuna manami munashqänötsu kawarkaykanki ni leynïkunatapis manami cumplirkaykankitsu. Tsaypa trukanqa nawpaykicho kaq nacionkunapa costumbrinkunata yachakurmi lutanta rurarkaykanki”.
13 Tayta Dios nishqankunata tsayno wilakuykaptïmi Benaíapa tsurin Pelatías elaqpita wanurqan. Tsaymi pampaman lätakuykur ruwakur kayno nirqä: “¡Ay TAYTA DIOS! Juk ishkay quëdaqkunatapis Israel runakunata ¿lapantatsuraq ushakätsinki?”
Mushuq shonquyuq kananpaq nishqan
14 Tsaymi TAYTA DIOS kayno nimarqan: 15 “Runapa tsurin, Babiloniacho taykaq ayluykikunapaq, wawqikikunapaq y lapan Israel marka mayikikunapaqmi Jerusaléncho taq runakuna kayno nirkaykan: ‘¡Babiloniaman apakushqa kaptinmi paykunaqa TAYTA DIOSPITA karuchöna karkaykan! Tsaymi kay nacioncho chakrankunata noqantsitana kachapaykamashqantsi’.
16 “Tsayno nipäkuptinpis Babiloniacho taykaq Israel marka mayikikunata kayno ninki: ‘Munayniyuq TAYTA DIOS kaynömi nin: Juk lädu nacionkunaman qarqushqa karpis y mana reqishqayki markakunaman jitarishqa karpis tsay nacionkunacho qamkunawanmi kaykäshaq’.
17 “Mastapis kayno ninki: ‘TAYTA DIOSMI kayno nin: Tiempu cumplirkuptinqa maytsay markakunapitami shuntamushayki. Maytsaycho mashtakashqa karkaykaptikimi Israel nacioncho yapay tänaykipaq kutitsimushayki. 18 Kutitsimuptïmi lapan ïdulukunata jitarishpayki melanaypaq mana ali ruraykunatapis mana rurapäkunkipaqnatsu. 19 Mushuq shonquta y mushuq espïritutami qamkunaman churamushaq. Rumi shonquykita jorqurirmi ali shonqutana qoykushayki. 20 Tsaymi leynïkunata y lapan nishqäkunata cumplir kawapäkunkipaq. Qamkunami kuyashqä runakuna kankipaq. Noqanami qamkunapa Diosniki kashaqpaq.* 21 Melanaypaq ïdulukunata adoraqkunatami itsanqa rabyanätsimashqanpita kikï juzgashaq. Noqa TAYTA DIOSMI tsayno nï’ ”.
Jerusalénpita Tayta Diospa chipchipyaynin aywakushqan
22 Tsaypitanami querubinkuna pärir ruëdantin Jerusalénpita aywakur inti jeqamunan kaq läducho kaykaq jirkanman chayarqan. Paykuna jananchömi Israel runakunata kuyaq Tayta Diospa chipchipyaynin kaykarqan.* 23 -
24 Tsaypitanami Tayta Diospa Espïritun revelacioncho joqarkamar Babiloniacho taykaq Israel marka mayïkunaman kutitsimarqan. Nirkurnami tsay revelación rikaykashqä elqakäkurqan. 25 TAYTA DIOS lapan rikatsimashqankunata y musyatsimashqantami tsaycho taykaq Israel marka mayïkunata wilarqä.