Hechos
22 “Wawqikuna y taytakuna, kanan mayapäkamay”.
2 Hebreo idiömacho parlashqanta mayarmi lapan upälakurqan. Tsawraqa Pablo kayno nirqan: 3 “Ciliciapa capitalnin Tarsucho yuriq Israel runami kä. Kay Jerusalénchömi winashqä. Tayta Gamalielmi* unay ayluntsikuna yachatsishqan leykunata yachatsimashqa. Tsaymi qamkunanöla Tayta Diosta lapan shonqüwan sirviyta munä.
4 “Diospa Nänin qatiraqkunata* ushakätsiyta munarmi warmitapis olqutapis prësu tsariykur carcilman wichqatsirqä. 5 Tsayno rurashqäta mas mandaq cüra y lapan Israel mayor runakunapis musyanmi. Paykunapitami ordinta chaskirqä Damascuman aywar Jesúsman yärakuqkunata Jerusalénman prësu apaykamur castigatsinäpaq.*
Jesucristo parlapashqanta Pablo wilakushqan
6 “Damascuman yaykuykaptïmi pulan junaqno ciëlupita atski elaqpita chipchipyar noqaman chayamurqan. 7 Tsawraqa pampaman tunir mayarqä kayno nimuqta: ‘Saulo, Saulo, ¿imanirtaq qatikachaykämanki?’ 8 Tsayta mayarmi kayno tapurqä: ‘¿Pitaq kanki, Tayta?’ Tsawraqa nimarqan: ‘Noqaqa Nazaretpita kaq Jesúsmi kaykä. Noqatami qatikachaykämanki’.
9 “Noqawan aywaqkuna atskita rikar [pasaypa mantsakashqami rikakurqan]. Parlapämashqantaqa manami tantiyapäkurqantsu. 10 Noqanami kayno nirqä: ‘¿Imatataq ruräman, tayta?’ Tsaynami kayno nimarqan: ‘Sharkur Damascuman ayway. Tsaychönami imata ruranaykipaqpis wilashunki’. 11 Atski chipchipyämuptin qaprayashqa rikakuptïmi noqawan aywaykaqkuna janchaylapa Damascuman pushamarqan.
12 “Tsaychömi Ananías jutiyuq runa tarqan. Paymi *Moisés qelqashqan leykunata cumplir Tayta Dios munashqanno kawarqan. Damascucho taq Israel runakunaqa lapanmi paypaq ali kashqanta nipäkuq. 13 Ananías rikamaq shamurmi kayno nimarqan: ‘Wawqi Saulo, rikayna’. Tsayno nimaptinmi jinan höra nawï aliyaptin payta rikarqä. 14 Nirkurmi kayno nimarqan: ‘Unay ayluntsikuna adorashqan Tayta Diosmi akrashushqanki munashqanta ruranaykipaq, Jutsaynaq Kaqta* rikanaykipaq y parlamushqankunatapis mayanaykipaq. 15 Kananqa paypa testïgun kar rikashqaykita y mayashqaykita pïmaytapis wilapanki. 16 Jukla *bautizakur Tayta Diosta manakuy jutsa rurashqaykikunapita perdonashunaykipaq’.
Mana Israel runakunaman Pabluta Tayta Dios kachashqan
17 “Damascupita Jerusalénman kutiykamurmi Tayta Diosta manakunäpaq templuman yaykurqä. Manakuykaptïmi revelacioncho 18 Jesucristo yuriparkamar kayno nimarqan: ‘Jerusalénpita jukla yarquy. Kaychöqa noqapita wilakuptiki manami chaskishunkitsu’. 19 Tsayno nimaptinmi kayno nirqä: ‘Tayta, ¿imanirtaq mana chaskikamanmantsu? Paykuna musyapäkunmi maytsay *sinagögaman aywarpis qamman yärakuqkunata maqa maqarkur carcilman apashqäta. 20 Wilakuqniki Estebanta wanutsiptinpis tsay runakunapa röpanta täpakurmi kushishqa tsaycho kaykarqä’.* 21 Tsayno niptïpis nimarqan: ‘Ayway. Qamta kachaykä karu markakunacho kaykaq mana Israel runakunamanmi’ ”.
Comandantipa munaynincho Pablo kashqan
22 Mana Israel runakunaman wilakuq aywananpaq nishqanta Pablo wilakuptinmi runakuna fiyupa rabyashpan kayno nipäkurqan: “¡Tsay runa ama kawatsuntsu! ¡Jukla wanutsun!”
23 Tsawraqa fiyupa qaparashpan janan kaq röpantapis loqtiriykur alpatapis altupa matsipäkurqan.
24 Tsayno ruraptinmi Pabluta cuartel rurinman yaykaykatsir soldädukunata comandanti kayno nirqan: “Kay runata astapäkuy. Tsayraqmi wilamäshun imanir contran sharkapäkushqantapis”.
25 Castigananpaq pankaraykätsiptinnami capitanta Pablo kayno nirqan: “Roma runa kaykaptï y autoridäkuna manaraq juzgamaptin ¿imanirtaq astamänaykipaq kamarikurkaykanki?”
26 Tsayno niptinmi comandantiman aywar capitán kayno nirqan: “¡Imanirtaq astanäpaq nimashqanki! ¡Tsay runaqa Roma runashi!”
27 Tsayno niptinmi comandanti aywaykur Pabluta tapurqan kayno nir: “¿Rasunpaku Roma runa kaykanki?”
Niptinmi Pablo kayno nirqan: “Rasunpami Roma runa kaykä”.
28 Tsawraqa comandanti kayno nirqan: “Noqa Roma runa kanäpaqqa atska qellaytaraqmi pägashqä”.
Pablunami kayno nirqan: “Noqaqa yurishqäpita patsami Roma runa kä”.
29 Tsayno niptinmi Pabluta astananpaq kaykaq soldädukuna jukla kachariykurqan. Roma runa Pablo kashqanta musyarmi comandantipis pankatsishqanpita mantsakurqan.
Autoridäkuna juntakashqancho Pablo parlashqan
30 Pablupa contran imanir runakuna sharkushqantapis musyayta munarmi tsaypita jukaqnin junaq mandaq cürakunata y lapan *Sanedrín juezkunata tsay comandanti qayatsirqan. Nirkurmi paykuna juntakashqanman Pabluta apatsirqan.