Deuteronomio
Tayta Dios munayniyuq kashqan
11 Tsaypita Moisés mastapis kayno nirqan: “TAYTA DIOSTA *kuyashpayki yachatsikuyninkunata, estatütunkunata, leyninkunata y mandamientunkunata imaypis cumplipäkuy. 2 Kanan junaq yarpapäkuy TAYTA DIOSNINTSI castigakuq y munayniyuq kashqanta. Tsayno kashqanta manami tsurikikunatsu rikapäkurqan, sinöqa kikikikunami. 3 Tsaynöpis manami tsurikikunatsu rikapäkurqan Faraónta y Egiptucho taq runakunata TAYTA DIOS munayninwan castigashqanta, sinöqa kikikikunami.* 4 Tsaynöpis manami tsurikikunatsu rikapäkurqan Egipto soldädukunata cawalluntinta carrëtantinta TAYTA DIOS Puka Lamarcho ushakätsishqanta, sinöqa kikikikunami*. 5 Yarpapäkuy chunyaq jirkapa pasamuptiki kayman chayamunaykipaq TAYTA DIOS imano yanapashushqaykitapis. 6 Tsaynöpis yarpapäkuy runakuna rikaykaptin Rubén trïbu Eliabpa tsurinkuna Datánta y Abiramta TAYTA DIOS castigashqanta. Paykunata castigarmi lapan aylunkunata, toldunkunata y imaykankunatapis patsata kichakarkatsir ultarkatsirqan.* 7 Kikikikunami rikapäkurqayki poderninwan TAYTA DIOS tsayno rurashqankunata.
Tayta Diospita bendicionta chaskinanpaq nishqan
8 “Tsaykunata rikashqa kaykarqa kanan tantiyatsishqä lapan mandamientukunata cumplipäkuy. Lapanta cumpliptikiqa *Canaánman yaykuptiki TAYTA DIOSMI kalpata qoshunki tsaycho taq runakunata ushakätsinaykipaq. 9 Tsaynöpis awkinyashqaykiyaq tsaycho kushishqa kawapäkunkipaq. Tsaycho kawapäkunaykipaqmi Abrahamta, Isaacta y Jacobta TAYTA DIOS promitirqan. Tsaychöqa lëchipis abëjapa mishkinpis yakunöraqmi atska kaykan.
10 “Tänaykipaq kaykaqchöqa chakra manami Egiptucho tashqayki chakranötsu kaykan. Egiptuchöqa murushqayki chakrakunatapis huertata parquqnömi parqupäkushqanki. 11 Itsanqa yaykapäkunaykipaq kaykaq partichöqa imaypis tamyaptin jalqakuna y raqrakunapis munapaylapaq verdila kaykan. 12 Tsaycho kaq chakrakunataqa tamya tiempuchöpis usya tiempuchöpis kikin TAYTA DIOSMI mana qonqaypa rikaykan.
13 “Kanan junaq tantiyatsishqä mandamientukunata cumplir TAYTA DIOSNINTSITA kuyapäkuptiki y lapan shonquykiwan y voluntänikiwan payta sirviptikiqa 14 punta kaq tamyata y qepa kaq tamyatapis tiempulanchömi tamyatsimunqa. Tsaymi trïgupis ni vïnupis ni aceitipis pishïshunkipaqtsu. 15 Qewakunapis intëru jalqakunacho loqluypa loqluyraqmi uywaykikunapaq kanqa. Tsaynölami mikupäkunaykipaqpis mikuy atska wayunqa.
16 “Tsayno kaykaptinqa cuidädu pipis engañashuptiki TAYTA DIOSTA qonqaykur juk dioskunata adorapäkunkiman. 17 Juk dioskunata adorapäkuptikiqa TAYTA DIOS fiyupa rabyakushpanmi manana tamyatsimuptin mikuynikikunapis wayunqanatsu. TAYTA DIOS entregashushqayki ali nacioncho tarpis lapaykimi wanur ushakankipaq.*
18 “Tsayno kaykaptinqa lapan tantiyatsishqä mandamientukunata chaskikur imaypis yarparanki. Mana qonqanaykipaq tsay mandamientukunata qelqarkur rikraykiman y urkuykimanpis watakäriy. 19 Tsurikikunata mana qonqaypa yachatsipäkunki wayikichöpis, nänikunachöpis, manaraq punurpis y punushqaykipita sharkurpis. 20 Tsaynöla qelqapäkunki wayi punkupa quiciunman y marka yaykuna punkukunamanpis.* 21 Tsaynöpami unay ayluntsikunata TAYTA DIOS promitishqan nacioncho qamkuna y tsurikikuna kay patsa y jana patsa ushakashqanyaq atska wata kushishqa kawapäkunkipaq.
22 “Kanan junaq tantiyatsishqä mandamientukunata cumpliptiki, TAYTA DIOSNINTSITA kuyaptiki y pay munashqanno kawaptikiqa 23 TAYTA DIOS yanapashunkipaq Canaánman yaykur tsaycho taq runakunata ushakätsinaykipaq. Tsayno ushakätsinkipaq qamkunapita mas atska y mas munayniyuq kaptinpis. 24 Tsaymi Canaáncho may markaman yaykushqaykipis qamkunapaqna kanqapaq. Lindëruykipis kanqa tsaki jirkapita Líbano nacionyaq y Éufrates mayupita hasta Mediterráneo Lamaryaq. 25 Mayman chayaptikipis TAYTA DIOSNINTSI promitishqanno yanapashuptiki runakuna mantsakushushpayki manami ichipäshunkipaqtsu.*
26 “Bendicionta karpis o maldicionta karpis qamkuna kanan akrapäkuy. 27 TAYTA DIOSNINTSIPA mandamientunkunata kanan junaq tantiyatsishqäta cäsukurqa bendicionnintami chaskipäkunkipaq. 28 TAYTA DIOSNINTSITA qonqaykur, mandamientunkunata mana cäsukur y imaypis mana adorashqayki dioskunata adorarmi itsanqa maldicionashqa kawapäkunkipaq.
29 “Canaánman yaykunaykipaq TAYTA DIOS yanapashuptiki Gerizim puntaman witsarkur fuerti nipäkamunki TAYTA DIOSTA cäsukuptiki bendicionninta qoshunaykipaq kashqanta. Tsaynöpis Ebal puntaman witsarkur fuerti nipäkamunki TAYTA DIOSTA mana cäsukuptiki maldicionashqa kanaykipaq kashqanta.* 30 Tsay ishkay puntakunaqa Jordán mayu tsimpan inti jeqanan kaq lädupami kaykan. Tsaynöpis tsay puntakuna kaykan Gilgal marka tsimpancho y More encina yörakuna cercanchömi. Tsayqa kaykan *Arabá pampacho taq cananeo runakuna tashqanchömi.
31 “Qamkuna Jordán mayuta tsimpanaykipaqnami karkaykanki. Tsimpaptikimi tsay nacionman yaykuykur tänaykipaq TAYTA DIOSNINTSI yanapashunkipaq. Tsaycho taykarnaqa 32 kanan junaq lapan tantiyatsishqä mandamientunkunata y leyninkunata mana qonqaypa cumplipäkunki”.