2 Corintios
Tayta Diospa wilakuyninta Pablo wilakushqan
4 Tayta Dios kuyapämashpan wilakuyninta wilakunäpaq churamashqa kaptinmi runakuna conträ sharkuptinpis mana lakikärïtsu. 2 Noqakunaqa manami imatapis lutankunata ni penqakuypaq kaqkunata rurapäkütsu. Manami pitapis engañaykätsu ni Tayta Diospa wilakuyninman ituykatsilar kikïkunapa yarpaynïkunata yapapäkütsu. Tsaypa trukanqa wilakuyninta pïmaypis musyananpaqmi Tayta Dios munashqanno kawapäkü.
3 Tsayno kaptinpis infiernuman qaykushqa kananpaq kaqkunaqa wilakushqäta manami chaskikärintsu. 4 Tsayno mana chaskikärintsu kay patsacho kaykaq dios* yarpayninkunata upatakätsishqa kaptinmi. Tsaymi Jesucristupa wilakuynin atskino kaykaptinpis paykunaqa mana rikaqno kar tsay wilakuyninta mana tantiyapäkuntsu. Jesucristuchömi Tayta Dios imano kashqantapis tantiyantsi.
5 Manami noqakunapa munaynïcho kawapäkunaykipaqtsu wilakärï, sinöqa Señor Jesucristupa munaynincho kawapäkunaykipaqmi. Noqakunaqa Jesucristuta sirvir qamkunapa ashmaynikinölami karkaykä. 6 Tsayno karkaykä chipchipyaykaq atskitano ali wilakuyninta shonqüman Tayta Dios churamushqa kaptinmi. Tsayno churamushqa kay patsata kamar tsakaycho atsikyaq kananpaq nishqannölami.* Tsaymi Tayta Dios imano kashqantapis Jesucristucho shumaq tantiyarkaykä.
Imano nakarpis Pablo wilakushqan
7 Tsay ali wilakuyqa shonqücho kaykan mitu mankacho pasaypa väliq riquëza kaykaqnömi. Noqakuna mitu mankanöla karmi kikïkunapa podernïwantsu wilakärï, sinöqa Tayta Diospa poderninwanmi. 8 Tsaymi imano nakatsimaptinpis mana ajayaypa wilakurkaykä. Ima rurayta mana kamäpakurpis manami aläpa lakikärïtsu. 9 Chikipäkamaptinpis Tayta Dios manami imaypis kachamantsu. Conträ sharkapäkuptinpis Dioslamanmi imaypis yärakurkaykä. 10 Maypa aywaptïpis Jesucristo nakashqanno nakashqätami runakuna rikapäkaman. Payta cäsukurmi wanuymanpis cäsi cäsi chayä. Tsaynöpami runakuna tantiyapäkun wanuypita salvamänanpaq Jesucristo munayniyuq kashqanta. 11 Jesucristupa wilakuyninta wilakushqäpita wanutsimayta munaptinpis Jesucristo noqakunawan kawaykashqanmi musyakaykan. 12 Tsaymi wanuy qatirämaptinpis *mana ushakaq kawayta taripäkunaykipaq wilakurkaykä.
13 Tayta Diospa palabrancho kayno nirmi qelqaraykan: “Payman yärakurmi wilakushqä”.*
Tsay qelqaraykashqannölami noqakunapis Tayta Diosman yärakur wilakuyninta wilakurkaykä. 14 Payman yärakurmi musyantsi Señor Jesucristuta kawaritsimushqanno kawarirkatsimashpantsi nawpanman pushamänantsipaq kashqanta. 15 Tsaymi imano nakarpis salvakärinaykipaq wilakärï. Tsaynöpami wakin runakunatapis Tayta Dios kuyapar salvaptin maytsaychöpis payta agradëcikur alabanqa.
16 Tsaymi Tayta Diospa wilakuyninta mana ajayaypa wilakü. Cuerpuntsi awkisyar lasaptinpis shonquntsichöqa waran waran mas mözunömi kaykantsi. 17 Kay patsacho kashqantsiyaqla nakarpis gloriacho imayyaqpis kawanantsipaqmi kamarikuykantsi. Tsay kawaymanqa manami imapis kay patsacho kaqkuna tinkuntsu. 18 Manami kay patsacho kawanalantsipaqtsu yarpachakuntsi, sinöqa gloriacho kawanantsipaqmi. Kay patsacho kawayqa ushakaqlami kaykan. Gloriacho kawaymi itsanqa mana ushakaq kaykan.