1 Corintios
Jesucristo kawarimushqan
15 Wawqi panikuna, Jesucristupa wilakuyninta wilapashqäta yarpapäkuy. Wilapashqäta chaskikurmi Tayta Diosman yärakurkaykanki. 2 Tsay wilapashqäno kawarqa salvakärinkimi. Tsayno mana kawarqa manakaqlapaqmi chaskikärishqanki.
3 Yachakushqalätami nawpatapis qamkunata yachatsirqä. Tsay yachatsishqä kaynömi niykan: Tayta Diospa palabran nishqannölami* jutsantsipita perdonamänantsipaq Jesucristo wanurqan. 4 Tsaynöpis nishqannölami* Jesucristo wanur pamparashqanpita kimsa junaqta kawarimurqan. 5 Kawarirkamurnami Cefasta* * yuriparqan. Tsaypitanami chunka ishkay apostolninkunata yuriparqan.* 6 Tsaypitanami pitsqa pachak (500) wawqi panikuna juntakashqa kaykaqtapis yuriparqan. Tsayno yuripashqanta rikaq wawqi panikuna juk ishkay wanushqana kaptinpis wakinqa kawarkaykanraqmi. 7 Santiaguta yuriparkurnami wakin *apostolninkunatapis yuriparqan. 8 Tsaypitaraqmi shuluno mana väliq kaykaptïpis noqata yuripämarqan.*
9 Manaraq yuripämaptinmi Tayta Diosman yärakuqkunata qatikacharqä.* Tsayno rurashqa karmi wakin apostolkunaman mana tinkütsu. Apóstol kanäpaqpis manami merecïtsu. 10 Tsayno kaykarpis Tayta Dios kuyapämaptinmi apóstol kaykä. Wakin apostolkunapitapis masraq Jesucristupa wilakuyninta wilakurmi tantiyakü Tayta Dios alipaq kuyapämashqanta. Imano kaptinpis Tayta Dios yanapamaptinmi wilakuykä. 11 Mayqanï wilakurpis Jesucristupa wilakuynintami wilakurkaykä. Wilakushqäta mayarmi qamkunapis Jesucristuta chaskikärishqanki.
Wanuqkuna kawarimunanpaq kashqanta yachatsishqan
12 Jesucristo kawarimushqanta wilakurkaykaptïqa ¿imanirtaq wakinniki nirkaykanki wanushkuna mana kawarimunanpaq kashqanta? 13 Wanushkuna mana kawarimunanpaq kaptinqa Jesucristupis manami kawarimunmantsu karqan. 14 Mana kawarimushqa kaptinqa manakaqlapaqmi wilakuynintapis wilaküman. Tsayno kaptinqa Jesucristuman manakaqlapaqmi yärakärinkiman karqan. 15 Wanushkuna mana kawarimunanpaq kaptinqa Jesucristuta Tayta Dios kawaritsimushqanta wilakurpis lulakurmi puripäküman.
16 Wanushkuna mana kawarimunanpaq kaptinqa Jesucristupis manami kawarimunmantsu karqan. 17 Y Jesucristo mana kawarimushqa kaptinqa payman yärakushqaykipis manakaqlapaqmi kanman. Jutsata rurashqaykipitapis manami perdonashqatsu kaykankiman. 18 Tsayno kaptinqa Jesucristuman yärakuykar wanuqkunapis wanushqalanchömi usharanman. 19 Jesucristo kay vïdalacho yanapamänantsipaq kashqanta criyirqa lapan runapitapis mas kuyapaypaqmi kaykantsi.
20 Itsanqa Jesucristo rasunpami wanushqanpita kawarimushqa. Pay puntata kawarimushqa kaptinmi musyantsi noqantsipis kawarimunantsipaq kashqanta. 21 Juk runala* jutsata rurashqanpita lapantsi wanunantsipaq kashqantsinölami juk runala* kawarimushqanpita lapantsi kawarimunantsipaq kaykantsi. 22 Jutsata Adán rurashqanpitami lapantsipis wanukuqla kaykantsi. Jesucristo kawarimushqanpitami itsanqa lapantsi kawarimunantsipaq kaykantsi.*
23 Kawarimurqa Tayta Dios kamakätsishqannömi kawarimushun. Puntataqa Jesucristutami Tayta Dios kawaritsimushqa. Jesucristo kutimuptinraqmi payta chaskikuqkunata kawaritsimunqa. 24 Tsaypitanami juiciu final kanqa. Tsaychönami Satanásta y lapan *supaykunata Jesucristo ushakätsinqa. Nirkurnami Tayta Diospa munayninman lapanta churanqa. 25 Contrankunata vincishqanyaqmi lapantapis Jesucristo makincho tsararanqa. 26 Vinciykurnami wanuytapis vincinqa.
27 Tayta Diospa palabranchöpis Jesucristupaq kaynömi niykan: “Paypa makinmanmi lapantapis Tayta Dios churashqa”.*
Paypa makinman lapanta churashqanta nirpis manami kikin Tayta Dios paypa makincho kashqantatsu niykan. Tsaypa trukanqa Tayta Diosmi Jesucristupa makinman lapanta churashqa. 28 Paypa makinman lapantapis churashqana kaptinmi Tayta Diospa makinman lapanta kutitsinqa. Tsaynöpami Tayta Dios lapan imaykatapis makincho tsararanqa.
29 Wawqi panikuna, ¿imanirtaq yarparkaykanki wanushkuna mana kawarimunanpaq kashqanta? Wanushkunata Tayta Dios mana kawaritsimunanpaq kaptinqa ¿imalapaqtaq wanushkunapa jutincho wakinniki *bautizakunkipis?
30 Tsaynöpis wanushkuna mana kawarimunanpaq kaptinqa ¿imalapaqtaq wanuy kawaypis wilakur purirkaykäman? 31 Wawqi panikuna, waran waranmi wanutsimayta munarkaykan. Tsayno kaptinpis Señor Jesucristuta chaskikärishqaykipitami kushikü. 32 Éfeso markachöpis chikimashpan fiyu animalnömi runakuna wanutsimayta munapäkurqan. Wanushkuna mana kawarimunanpaq kaptinqa ¿imalapaqtaq tsayjinanpa chikimaptinpis purïman? Tsaypa trukanqa kaynömi nïman: “Kawashqantsiyaq mikushun upushun. Wanurqa pachantsitami apashun”.*
33 Lutanta ama yarpapäkuytsu: mana ali amïgukunaqa ali runakunatapis mana ali ruraykunamanmi inkitan. 34 Shumaq tantiyakur jutsa ruraykunata kachariyna. Wakinnikiqa Tayta Diospa wilakuyninta manami shumaqtsu tantiyarkaykanki. Tsayno kapäkushqayki penqaypaqmi kaykan.
Kawarimur cuerpuntsi imano kananpaq kashqan
35 Wanushkuna kawarimunanpaq kashqanta mana criyirmi wakinniki kayno nirkaykanki: “¿Imanöpanashi wanushkuna kawarimunman? Kawarimuptin ¿imanöraq cuerpun kanqa?”
36 Tsayno yarparqa ¡tsaki toqshumi karkaykanki! Imatapis murur mana pampaptintsiqa manami winamuntsu. 37 Tsaynöpis manami yörantatsu muruntsi, sinöqa trïgu kaptinpis o mayqan tsaki mikuy kaptinpis murutami muruntsi. 38 Murushqana kaptinqa Tayta Diosmi winatsimun. Cada casta murupitami Tayta Dios munashqannöla yöranta winatsimun.
39 Runapis, uywapis, päriqpis y pescädupis jukniraq jukniraqmi kaykan. 40 Jana patsacho kaqkunapis manami kay patsacho kaqkunanötsu kaykan. 41 Tsaynölami intipis, killapis y qoylarkunapis jukno jukno atsikyapäkun.
42 Tsaynölami runa wanushqanpita kawarimuptin cuerpun mushuqna kanqa.
Pampashqan kaqqa ushakanqami.
Kawarimuq kaqmi itsanqa mana ushakanqanatsu.
43 Pampashqan kaqqa ismunqami.
Kawarimuq kaqmi itsanqa kuyaylapaq kanqa.
Pampashqan kaqqa elqanqami.
Kawarimuq kaqmi itsanqa mana elqanqatsu.
44 Yurishqantsi cuerpuqa kay patsacho kawanalantsipaqmi kaykan.
Kawarimuq cuerpumi itsanqa mushuq patsacho kawanantsipaq kanqa.
Kay patsacho kawanantsipaq kaq cuerpupis kanmi y mushuq patsacho kawanantsipaq kaq cuerpupis kanqami.
45 Tayta Diospa palabranchöpis kaynömi qelqaraykan: “Punta kaq Adántami kawaq runa kananpaq kamarqan”.*
Qepa kaq Adántami* itsanqa kawatsikuq espíritu kananpaq kawaritsimushqa. 46 Manami mushuq patsacho kawanantsipaq kaq cuerputatsu puntata chaskintsi, sinöqa kay patsacho kawanantsipaq kaq cuerputami. Tsaypitaraqmi mushuq patsacho kawanantsipaq kaq cuerputaqa chaskintsi. 47 Punta kaq runaqa alpapitami karqan. Qepa kaq runa [Señor Jesucristumi] itsanqa jana patsapita kaykan. 48 Kay patsacho kawanantsipaq kaq cuerpuntsiqa alpapita rurashqa Adánpa cuerpunnölami kaykan. Mushuq patsacho kawanantsipaq kaq cuerpuntsimi itsanqa jana patsacho taykaq Jesucristupa cuerpunno kanqa. 49 Kananqa alpapita rurashqa Adán niraqlami kaykantsi. Tsaypitanami jana patsacho taykaq Jesucristunöna kashun. 50 Wawqi panikuna, shumaq tantiyakäriy. Aytsantin tuluntinqa manami pipis Tayta Dios *mandaykashqanman chayanqatsu. Ushakaq cuerpuntsiqa manami mushuq patsacho kawanantsipaqtsu kaykan, sinöqa kay patsacho kawanalantsipaqmi.
51 Tayta Dios pitapis mana musyatsishqanta musyapäkunaykitami munä: Manami lapantsiraqtsu wanushun. Itsanqa lapantsitami mushuq cuerputa Tayta Dios qomäshun. 52 Mushuq cuerpuyuqqa elaqpita tikrashun ultimu kaq *cornëtata tukaramuptinmi. Tsay junaqmi mana ushakaq mushuq cuerpuyuqna wanushkuna kawarimunqa. Tsaynölami noqantsi kawaykaqkunapis mushuq cuerpuyuq rikakushun.* 53 Ushakaqla kashqantsipitami mana ushakaqna tikrashun. Wanuqla kashqantsipitami mana wanuqna tikrashun.
54 Ushakaqla cuerpuntsi mana ushakaqmanna tikraptinmi y wanuqla kashqantsipita mana wanuqna tikraptintsimi Tayta Diospa palabran kayno nishqan cumplikanqa:
“¡Wanuyqa vincishqanami kaykan!*
55 Wanuy, ¡maychötaq munayniki kaykan!
Sepultüra, ¡maychötaq mikukuq kayniki kaykan!”*
56 Wanuy ushakätsimantsi jutsata ruraptintsimi. Jutsapis Tayta Diospa leyninkunapitaraqmi tunitsimänantsipaq munayninta chaskin.* 57 Tsayno kaptinpis Señor Jesucristuta kawaritsimurmi wanuypita Tayta Dios salvamantsi. Tsaypita imaypis payta agradëcikushun.
58 Tsayno kaykaptinqa, kuyay wawqi panikuna, mana qelanaypa y mana ajayaypa Señor Jesucristuta imaypis sirvipäkuy. Musyashqaykinöpis payta sirvishqayki manami manakaqlapaqtsu kaykan.