Salmos

83 (2) Tayta Dios, noqakunapa favornï sharkuykulay.

Upälaqa ama rikaraykalämaytsu.

 2 (3) Chikishuqniki runakunami achäquita ashiparkaykäman.

Qampapis contraykimi sharkurkaykan.

 3 (4) Kuyashqayki runakuna karkaykaptïpis atacamänanpaqmi wilanakurkaykan.

Cuidashqayki runakuna karkaykaptïpis conträmi sharkurkaykan.

 4 (5) Tsay runakunami kayno nirkaykan:

“Paykunata nacionninpa chipyaq elqätsishun.

Israel runakunapaq pipis mana yarparaykänanpaq chipyaq ushakätsishun”.

 5 (6) Tsay yarpaylami lapanpis wilanakärishqa contrayki sharkapäkunanpaq.

 6 (7) Paykuna karkaykan edomita runakuna, ismaelita runakuna, moabita runakuna y agareno runakunami.

 7 (8) Tsaynöpis karkaykan Gebal runakuna, amonita runakuna, amalecita runakuna, filisteo runakuna y Tiro runakunami.

 8 (9) Lotpita miraqkunatami* Asiria runakunapis yanaparkaykan. Selah

 9 (10) Paykunata wanuykatsilay madianita runakunata unay wanutsishqaykino.*

Paykunata ushakaykatsilay Sísaratapis Jabíntapis Cisón raqra nawpancho ushakätsishqaykino.*

10 (11) Endorchömi paykunata ushakätsirqayki.

Ayankunapis tsaychömi ismur ushakarqan.

11 (12) Orebta y Zeebta wanutsishqaykino paykuna respitashqan runakunatapis wanuykatsilay.*

Zebata y Zalmunata wanutsishqaykino mandaqnin reykunatapis wanuykatsilay.*

12 (13) Paykunami noqakunata qomashqayki nacionta qechumayta munarkaykan.

13 (14) Tayta Diosnilä, huracán wayra imaykatapis ushashqanno conträ sharkuq runakunata ushakaykatsilay.

Wayra apashqan tsaki punshano kaykulätsun.

14 (15) Muntita nina rupar ushaqno y jirkata nina ushaqno 15 (16) qampis löcu tamyaykiwan qatikachaykulay y löcu wayraykiwan mantsakaykatsilay.

16 (17) Paykunata pasaypa penqayman churaykulay.

Munayniyuq kashqaykita musyapäkunanpaq tsayno ruraykulay, TAYTA DIOS.

17 (18) Imaypis penqaytukushqala y mantsakashqala kapäkutsun.

Tsayno puriykashqalancho ushakätsun.

18 (19) Lapanpis musyaykulätsun qam japalayki poderniyuq TAYTA DIOS kashqaykita.

Tantiyaykulätsun kay patsacho lapanpaq munayniyuq kashqaykita.