Génesis
Ismael yurishqan
16 Abrampa warmin Sarai qoluq kaptinmi wawan mana karqantsu. Saraipa ashmayninmi Agar jutiyuq jipash karqan. Payqa karqan Egiptupitami. 2 Saraimi Abramta kayno nirqan: “Qoluq kanäpaqmi TAYTA DIOS destinamashqa. Tsayno kaykaptïqa wamrayuq kanäpaq ashmaynï Agarwan punuykulay. Paycho tsuriki yuriptinqa kikïpa wawänömi kanqa”.
Tsayno ruwakuptinmi Abram awnirqan Sarai nishqanta.
3 Awniptinmi Saraiqa Abramta punutsirqan Egiptupita apamushqan ashmaynin Agarwan. Tsayqa karqan *Canaáncho chunka watana Abram taykaptinmi. 4 Abramwan punurkurnami qeshyaq rikakur Agarqa patrönan Saraita mamatupayta qalaykurqan.
5 Tsaymi Abramta Sarai kayno nirqan: “Agarwan pununaykipaq kikï niykaptïpis qeshyaq rikakur manakaqman churamänanpaq qammi jutsayuq kaykanki. Tsayno kashqaykipitami TAYTA DIOS juzgashunkipaq”.
6 Tsayno niptinmi warmin Saraita Abram kayno nirqan: “Ashmaynikiqa makikichömi kaykan. Tsayno kaykaptinqa qampitanachari imata ruraptikipis”.
Tsayno niptinmi Saraiqa ashmaynin Agarta witsaypa uraypa mandakurqan. Tsayno nakatsiptinmi Agarqa qeshpir aywakurqan.
7 Tsayno qeshpikuykaptinmi TAYTA DIOSPA *angilnin yuriparqan chunyaq jirka pukyu nawpancho. Tsay pukyu karqan Shur partipa aywana nänichömi. 8 Tsaychömi ángel tapurqan kayno nir: “Saraipa ashmaynin Agar, ¿maypitataq aywaykämunki? Y ¿maypataq aywaykanki?”
Tsawraqa Agar nirqan: “Patrönä Saraipitami qeshpikuykä”.
9 Tsawraqa TAYTA DIOSPA angilnin kayno nirqan: “Patrönayki Saraiman kutiykur pay mandashushqaykita imatapis ruray”.
10 Nirkurmi yapay kayno nirqan:
“Wawaykipita miraqkuna yupaytapis mana atipaypaqmi mirapäkunqa.
11 Qeshyaq kaykashqayki wawayki olqumi kanqa.
TAYTA DIOSMI mayashushqanki lakikur manakushqaykita.
Tsay wawaykipa jutinmi kanqa Ismael.*
12 Tsay wawaykiqa kanqapaq chucaru cawallunömi.
Pïmaywan pelyaptinmi pïmaypis chikir contran sharkunqa.
Aylunkunawanpis chikinakurmi kawanqa”.
13 TAYTA DIOSWAN parlashqanta tantiyarmi Agarqa kayno nirqan: “Qamqa rikamaqnï Diosmi kaykanki”.
Tsaypitami Diospa jutinta churaparqan El-Roí* kananpaq. 14 Tsaymi tsay pözupa jutinta churaparqan Beer Lahai-Roí jutin kananpaq.* Tsay pözuqa kaykan Cadespita Beredman pasaq nänichömi.
15 Kutiykurnami Abrampa tsurinta Agar wacharqan.* Tsurinpa jutintami Abram churaparqan Ismael jutin kananpaq. 16 Ismael yuriptin Abram kaykarqan pusaq chunka soqta (86) watayuqmi.