1 Samuel
Saúl y tsurinkuna guërracho wanushqan
31 Gilboa jirkacho filisteo runakuna atacaptinmi Israel runakuna qeshpir aywakärirqan. Tsayno qeshpiykaqtami filisteo runakuna atskata wanutsipäkurqan. 2 Tsaynölami Saúlta y tsurinkunatapis qatikacharqan. Tsaychömi wanutsipäkurqan Saúlpa tsurinkuna Jonatánta, Abinadabta y Malquisúata.
3 Tsaypitana filisteo runakuna Saúlta flëchaykärirqan. Tsaymi qeshpiyta mana kamäpakur 4 armanta apapaq yanapaqnin soldäduta Saúl kayno nirqan: “Espädaykiwan wanuratsimay. Manami munätsu Diosta mana reqiq filisteo runakuna wanurkatsimar kushikärinanta”.
Tsayno niptinpis yanapaqnin soldädu pasaypa mantsakushpan manami wanutsiyta munarqantsu. Mana munaptinmi espädanta jawirkur puntanman Saúl lätakuykurqan. 5 Saúl wanushqanta rikaykurmi yanapaqnin soldädupis kikin tuksikurirqan. Tsaynöpami paypis Saúl wanushqan kaqlacho wanurqan. 6 Tsaynöpami Saúl, kimsan tsurinkuna, yanapaqnin soldädu y lapan soldädunkunapis wanupäkurqan.
7 Saúlta y tsurinkunata filisteo runakuna wanutsishqanta y soldädukunapis qeshpir aywakushqanta mayaykurmi Jezreel pampa tsimpacho y Jordán mayu tsimpacho taq Israel runakuna markankunapita qeshpir aywakärirqan. Tsaymi filisteo runakunana tsay markakunacho tarqan.
8 Saúl wanushqanpita jukaqnin junaqnami wanushkunapa imaykantapis apakunanpaq filisteo runakuna aywapäkurqan. Tsaychömi Saúlta y kimsa tsurinkunata Gilboa jirkacho wanushqa jitarpaykaqta taripäkurqan. 9 Tsawraqa Saúlpa umanta roqurishpan espädanta y pelyananpaq kaq röpanta shuntapäkurqan. Nirkurmi intëru markakunaman diosninkunapa templunman wilakuqkunata kachapäkurqan Saúl wanushqanta wilakärinanpaq. 10 Saúlpa espädanta y pelyananpaq kaq röpantanami churapäkurqan *Astarot diösapa templunman. Saúlpa cuerpuntana Bet-sán markapa murällanman warkupäkurqan.
11 Saúlta tsayno rurapäkushqanta Galaad particho kaykaq Jabes markacho taq Israel runakuna mayaykurmi 12 alinnin kaq soldädukuna wilanakurkur tsay tsakay aywapäkurqan Bet-sán markayaq. Chayaykurmi Saúlpa y tsurinkunapa cuerpun warkaraykaqta jorqurir apakärirqan. Nirkurnami Jabesman chayaykatsir rupatsipäkurqan. 13 Tulunkunatanami juk yöra sikinman pampaykur qanchis junaqyaq ayunapäkurqan.