2 Reyes
Judá nacioncho Atalía reina kashqan
11 Atalíaqa wawan Ocozíasta Jehú wanutsishqanta musyaykurmi reina kayta munar Ocozíaspa wawqinkunata y tsurinkunata Judácho wanutsiyta qalaykurqan.* 2 Wanuykätsishqanta mayaykurmi Jorampa tsurin y Ocozíaspa panin Josaba juk sobrinunta y ashmaqninta juk cuartuman pakaykurqan.* Tsay wamrapa jutinmi karqan Joás. Tsaynöpami Joásta mana wanutsirqantsu. 3 Soqta watami TAYTA DIOSPA templun cuartucho Joásta pakarätsirqan. Tsayyaqmi Atalíaqa Judá nacionpa mandaqnin reina karqan.
4 Tsaypita qanchis watachönami TAYTA DIOSPA templunman juntakänanpaq cüra Joiada qayatsirqan soldädukunapa capitanninkunata, cereteo soldädukunata y templu täpaq wardiakunata. Juntakaptinnami paykunawan *pactuta rurar juratsirqan rey Ocozíaspa tsurin Joáspa favornin sharkunanpaq. Tsaycho lapan jurarkuptinnami Joásta pakarätsishqanpita apamurqan reqipäkunanpaq.
5 Nirkurmi cüra Joiada kayno yätsirqan: “Jamay junaq vigilaq batallón kimsa puntaman rakikanki. Juk punta kanqa palaciuta täpananpaq. 6 Juk puntanami kanqa Shur nishqan punkuta täpananpaq. Juk puntanami kanqa cuartel punkuta täpananpaq. Tsaynöpami palaciuta mana kachaypa täpapäkunkipaq. 7 Jamay junaq mana vigilaq ishkay batallonkunanami templucho reyta cuidapäkunkipaq. 8 Armayki aptashqa lapayki reyta tumariq tsaparpanki. Pipis payta wanutsinanpaq yaykuyta munaptinqa jukla wanutsipäkunki. Reytaqa maypa aywaptinpis ama kachaykunkitsu”.
9 Cüra Joiada mandashqankunata capitankuna rurarmi lapan vigilaqkunata shuntapäkurqan reyta tsapänanpaq. Tsaymi turnunkuna cumpliq vigilaqkunata y jamay junaqcho vigilananpaq yaykuqkunatapis shuntaykur cüra Joiadaman pushapäkurqan. 10 Tsay vigilaqkunatami Joiada kamariparqan rey David ruratsishqan lanzakunata y escüdukunata. Tsaykunaqa templu rurinchömi churararqan. 11 Kamariparkuptinmi reyman pipis wanutsiq mana yaykunanpaq tsay vigilaqkuna lanzan aptashqa tumariq churanakurqan. Tsayno churanakurqan templupa sur kaq lädunpita qalaykur *altar nawpanpa tumar norti kaq lädunyaqmi.
12 Nirkurnami Joiadaqa reypa tsurinta pushaykamur corönata jatiparqan. Jatiparkurnami Israel runakunawan Tayta Dios rurashqan *Pactu Libruta* aptaparqan y aceitita umanman winaparqan. Winaparkuptinnami tsaycho kaykaq runakuna makinta paqchir kayno nipäkurqan: “¡Viva mandamaqnintsi rey!”
13 Lapan soldädukuna y runakuna kushikur qaparpashqanta mayarmi Atalíaqa TAYTA DIOSPA templunman aywarqan ima pasashqantapis musyananpaq. 14 Chayaykurmi reyta rikarqan costumbri kashqanno columna nawpancho ichiraykaqta. Reypa nawpanchömi mayor runakuna y *cornëta tukaq runakuna kaykarqan. Tsaynömi intëru Judá nación runakunapis kushikur cornëtata tukapäkurqan. Tsayno kaykaqta rikaykurmi Atalíaqa röpanta rachirishpan kayno nirqan: “¡Traicionëru! ¡Traicionëru!”
15 Tsawraqa cüra Joiada soldädukunapa capitanninkunata kayno nirqan: “Atalíata templupita juk läduman jorqurkur wanutsipäkuy. Pipis favornin sharkuptinqa paytapis espädawan wanutsipäkuy”.
Templupita juk läduman apaykur wanutsinanpaq niptinmi 16 Atalíata prësu tsariykur apapäkurqan cawallukuna yaykukunan palaciupa punkunman. Tsaychömi wanutsipäkurqan.
17 Tsaypitanami TAYTA DIOSWAN pactuta rurar runakunata y reyta Joiada promititsirqan TAYTA DIOSTA cäsukur kawapäkunanpaq. Tsaynöpis reyta promititsirqan runakunata ali rikananpaq y runakunatana promititsirqan reyta respitananpaq. 18 Nirkurnami lapan runakuna aywaykur *Baalpa templunta juchutsipäkurqan. Tsaynölami Baal ïdulukunata y altarninkunatapis lapanta talamar ushapäkurqan. Tsaypitanami talamashqan altarkunapa nawpancho Baalpa cüran Matánta wanutsipäkurqan.
Tsaypita kutiykurmi wardiakunata Joiada churarqan TAYTA DIOSPA templunta täpananpaq. 19 Nirkurnami capitankunawan, cereteo soldädukunawan, wakin soldädukunawan y lapan runakunawan rey Joásta templupita palaciuman pushapäkurqan. Palaciuman yaykaykatsiptinmi rey jamakunan trönuman Joás jamakurqan. 20 Tsaymi lapan runakuna pasaypa kushikärirqan. Atalíata palaciu punkucho espädawan wanutsishqanpitaqa lapanpis jawkanami kawapäkurqan.
21 (12.1) Mandayta qalaykushqan witsan qanchis watayuqlaraqmi Joás kaykarqan.