Salmos
Tayta Diosta agradëcikushqan
116 Ruwakushqäta mayamaptinmi TAYTA DIOSTA pasaypa *kuyä.
2 Manakushqäta chaskimaptinmi imaypis payta manakü.
3 Wanuypis janächönami karqan.
Pampamänanpaq kashqantanami yarparqä.
Tsaymi pasaypa mantsakur lakikurqä.
4 TAYTA DIOSTA kayno nirmi ruwakurqä:
“¡TAYTA DIOS, wanuypita salvaykalämay!”*
5 TAYTA DIOSQA ali shonqu y alilata ruraqmi kaykan.
Payqa kuyapäkuqmi kaykan.
6 Humildi kaqkunataqa TAYTA DIOS alimi rikan.
Noqatapis kalpaynaq kaykaptïmi yanapamashqa.
7 TAYTA DIOS yanapamaptinmi kananqa jawkalana kawaykä.
8 Wanuypitapis paymi salvamashqa.
Waqaptïpis paymi shoqamashqa.
Mana kachaypami yanapamashqa.
9 Kay patsacho kawashqäyaq TAYTA DIOSTAMI imaypis cäsukushaq.
10 Pasaypa lakikurpis paymanmi yärakuykä.
11 Ima ruraytapis mana kamäpakurmi lapan runa lulakuq kashqanta nirqä.
12 TAYTA DIOS yanapamashqanpita manami imanöpapis pägayta atipätsu.
13 Salvamashqanpitami TAYTA DIOSTA imaypis agradëcikushaq.
Jutinta joqarirmi payta alabashaq.
14 TAYTA DIOSTA promitishqätaqa kuyashqan runakuna juntakashqanchömi cumplishaq.
15 TAYTA DIOSQA pasaypami kushikun payta sirviq runakuna wanur nawpanman chayaptin.
16 TAYTA DIOS, qamtami imaypis sirvishayki.
Sirvishuqniki warmipa wawanmi kaykä.
Pitirpunäpaqna kaykaptïmi salvamashqanki.
17 Tsaymi agradëcikushpä sacrificiukunata qampaq apamushaq.
Jutikita joqarirmi alabashayki.
18 TAYTA DIOSTA promitishqätaqa kuyashqan runakuna juntakashqancho
19 y Jerusalén chawpincho TAYTA DIOSPA templun patiuchömi cumplishaq.
¡Aleluya!