Salmos

42 (2) Yakunashqa luychu yakuta ashishqannöraqmi noqapis qamta *ashï, Tayta Dios.

 2 (3) Imayyaqpis kawaq Dios kaptikimi yakunaypanöraq qamta ashiykä.*

¡Imayraq nawpaykiman chayamushaq qamta adoranäpaq!

 3 (4) Runakunaqa imay hörapis asipaykäman kayno nirmi: “¿Maytaq Diosniki?”

Tsaymi pasaypa lakikur shonqüpis mana mikanantsu.

Wararküpis qoyarküpis waqaykälarmi.

 4 (5) Nawpataqa atska runakunata pushakurkurmi Tayta Diospa wayinman aywaq kä.

Tsaychömi fiestata rurar Tayta Diosta kushishqa alabaq kä.

Tsayno kashqäta yarparkurmi pasaypa lakikü.

 5 (6) Ay vïdala vïda, ¿imanirtaq turwatä?

¿Imanirtaq lakikü?

Tayta Dioslamanmi imaypis yärakushaq.

Paytami imaypis alabashaq.

Paymi salvamaq Tayta Diosnï.

 6 (7) Imata ruranäpaqpis gänasnï manami kantsu.

Hermón y Mizar puntakunapita Jordán mayu qalaykamuqcho kaykarpis qamlatami yarparaykä.

 7 (8) Manana yanapamaptikimi pasaypa lakishqa kaykä.*

Bunyaypa bunyar mayu aywar mantsariypaq kashqannömi lakikuynïkuna kaykan.

 8 (9) Tsayno kaptinpis TAYTA DIOSMI kuyakuq kashqanta waran waran tantiyatsiman.

Tsakaypapis alabanäpaqmi yanapaman.

Kawayta qomaqnï Tayta Diostami lapan shonqüwan manakü.

 9 (10) Imapitapis tsapämaq Tayta Diosnïta manakurmi kayno nï:

“¿Imanirtaq qonqaykalämashqanki?

Conträ sharkuptinpis lakishqa mana purinäpaq yanapaykalämay”.

 10 (11) Chikimaqnïkunami waran waran kayno nirkaykäman:

“¿Maychötaq Diosniki kaykan?”

Tsayno nir asipämaptin toqshüyaqmi nanaypis chayaykun.

 11 (12) Ay vïdala vïda, ¿imanirtaq turwatä?

¿Imanirtaq lakikü?

Tayta Dioslamanmi imaypis yärakushaq.

Paytami imaypis alabashaq.

Paymi salvamaq Tayta Diosnï.