Salmos
Tayta Dios lapanta musyashqanpita alabashqan
(1a) Cantaqkunapa mandaqninpaqmi. David qelqashqan salmu.
139 (1b) TAYTA DIOS, imano kashqätapis musyankimi.
2 Musyankimi imay jamashqäta y imay sharkushqätapis.
Karupitami yarpashqäkunatapis musyaykanki.
3 Tutala sharkushqäpita tsakay punushqäyaqmi imata rurashqäkunatapis musyaykanki.
Maypa aywaptïpis rikaykämankimi.
4 TAYTA DIOS, manaraq rimaptïmi imata ninäpaq kashqantapis musyanki.
5 Maycho kaptïpis rikaykämankimi.
Maki paltaykiwanmi tsapaykämanki.
6 Tsayno kashqaykiqa pasaypa kushikuypaqmi kaykan.
Manami imano tantiyaytapis atipätsu.
7 Espïrituyki rikaykämaptinqa ¿maylamanraq pakaküman?
Nawpaykipita ¿maylamanraq qeshpïman?
8 Qoylarkuna kaqman aywaptïpis tsaychömi kaykanki.
Patsa ruriman pakakuptïpis tsaychömi kaykanki.
9 Inti yarqamunan lädupa pärir aywakuptïpis y lamarpa jukaq kuchuncho taptïpis 10 qamqa nawpächömi kaykanki.
Maycho kaykaptïpis alawqa kaq makikiwanmi jancharaykämanki.
11 Mayjina tsakayman pakakurpis 12 qampita manami pakakuyta kamäpakütsu.
Tsakaypapis junaqpanölami qam rikaykanki.
Paqaspis junaqpis qampaqqa iwal-lami kaykan.*
13 Qammi mamäpa pachancho lapan cuerpüta kamamashqanki.
14 Kushikuypaq kamamashqaykikunata rikarmi qamta alabä.
Rurashqaykikunaqa pasaypa kushikuypaqmi kaykan.
Tsayno kashqanta lapan shonqüwanmi criyï.
15 Mamäpa pachancho kaykaptï pipis manami rikamashqatsu.
Tulükuna yurishqanta qamlami rikashqanki.
Patsa rurinchönöpis mana rikakaylami kamamashqanki.
16 Tsayraq rurakaykaptïpis rikamashqankimi.
Manaraqpis juk junaqniyuq kaykaptïmi ayka wata kawanäpaq kashqantapis libruykiman mayna qelqarqayki.
17 Tayta Dios, noqapaq yarpashqaykikunaqa pasaypa kushikuypaqmi kaykan.
Tsay yarpashqaykikunaqa tsaytsikami kaykan.
18 Yupayta munaptïpis aquyshapitapis mas atskami kaykan.
Punushqäpita rikcharkurpis qamwanmi imaypis kaykä.
19 Tayta Dios, fiyu runakunata lapanta ushakaykatsilay.
Wanutsikuq runakunata nawpäpita qarquykulay.
20 Paykunaqa contraykimi rimarkaykan.
Jutikitapis lutalami joqarirkaykan.
21 TAYTA DIOS, qamqa musyankimi chikishuqnikikunata rikaytapis mana munashqäta.
Mana cäsukushuqnikikunata fiyupami rabyapä.
22 Paykunata pasaypami chikï.
Paykunaqa noqapapis conträmi kaykan.
23 Tayta Dios, imano kawashqätapis rikaykalämay.
Shonqü alita o mana alita yarpashqantapis musyaykulay.*
24 Yarpashqäpis, parlashqäpis o rurashqäpis mana ali kaptinqa tantiyaykatsilämay.
Qamwan imayyaqpis kawanäpaq yachaykatsilämay.