Salmos

50 (1b) Munayniyuq TAYTA DIOSMI kay patsacho taqkunata qayaykätsin.

Inti jeqamunan kaq läducho taq runakunatapis y inti jeqanan kaq läducho taq runakunatapis lapantami qayaykätsin.

 2 Tayta Diosqa *Sión jirkanpita patsami chipchipyämun.

Tsay jirkanqa lapanpitapis mas kuyaylapaqmi kaykan.

 3 Tayta Diosnintsiqa aywaykämunnami.

Shamushqanqa mayakaykämunnami.

Puntantami aywaykämun imaykatapis rupar ushaq nina.

Nawpankunapami löcu tamya y räyupis kaykan.

 4 Israel runakunata juzgarmi jana patsata y kay patsatapis qayan testïgu kananpaq.

 5 Paymi kayno nin: “Sacrificiuta rurar noqawan *pactu ruraqkunata* shuntamuy”.

 6 Jana patsapis wilakun Tayta Dios ali juzgaq kashqantami.

Paymi pïmaytapis juzgan. Selah

 7 Tayta Dios kaynömi nin:

“Kuyashqä Israel runakuna, kanan nishqäta shumaq mayapäkamay.

¡Noqa Diosmi kä!

¡Noqalami Diosniki kaykä!

Tsaymi jutsa rurashqaykipita juzgar careashayki.

 8 “Sacrificiukunata noqapaq rupatsishqaykiqa alimi kaykan.

Nawpächo imaypis rupatsiptiki kushikümi.

 9 Tsayno kaptinpis corralnikipita turitukunata manami munätsu.

Qenchaykipita cabrakunatapis manami manakütsu.

10 Noqapami kaykan munticho kaq uywakunapis y maytsay jirkakunacho kaykaq wäkakunapis.

11 Lapan casta pishqukunatapis reqïmi.

Tukuy casta uywakunapis noqapami kaykan.

12 Kay patsapis y kay patsacho kaqkunapis noqapa kaykaptinqa mikanarpis manami qamkunataraqtsu manaküman.

13 Törupa aytsanta mikurtsu ni chïvupa yawarninta upurtsu kawä.

14 “Apapäkamushqayki sacrificiuqa kanman lapan shonquykiwan agradëcikamashqaykimi.

Tsaynöpis lapan promitimashqaykita cumplipäkuy.

15 Nakaykuna shamuptin noqata manakamay.

Manakamaptikiqa yanapashaykimi.

Yanapashqäta tantiyakurmi alabamankipaq”.

16 Fiyu runataqa Tayta Dios kaynömi nin:

“Qamqa ¿imanirtaq leynïkunata wilakur puriykanki?

Runakunawan pactu rurashqäpitapis ¿imanirtaq rimar puriykanki?

17 Qamqa astaptïpis manami wanakunkitsu*.

Yätsishqäkunatapis manami chaskikunkitsu.

18 Suwakunawanpis tsay yarpaylami kaykanki.

Majanta jarukuqkunawanpis iwal iwalmi puriykanki.

19 Shimiki tarishqantami manakaqkunata rimaykanki.

Lulakunaykipaqqa mamalayki wachashqami kaykanki.

20 Wawqikitapis manakaqkunatami jitapaykanki.

Tsay mamalapita kaykarpis ashliykankimi.

21 Tsaykunata ruraptiki manami imatapis rimakurqätsu.

¿Mana rimakuptïku qamno kashqäta yarpanki?

Kananqa shumaq ichiykatsirmi qamta careashayki.

Lapan rurashqaykipitami acusashayki.

22 “Mana cäsukamaqkuna, nishqäkunata shumaq tantiyakäriy.

Elaqpita shamur ushakätsiptï manami pipis salvashunkipaqtsu.

23 Agradëcikamashqaykimi rasunpa kaq sacrificiuqa kaykan.

Agradëcikamarqa respitamankimi.

Munashqäno kawaqkunataqa salvashaqmi”.